చంద్రబాబు ప్రమాణ స్వీకారం అమరావతిలో కాకుండా కేసరపల్లిలోనే ఎందుకంటే

నవ్యాంధ్ర నూతన ముఖ్యమంత్రిగా టీడీపీ అధినేత చంద్రబాబు నాయుడు ప్రమాణ స్వీకారం జూన్ 12న జరగనుంది. గన్నవరం ఎయిర్ పోర్టు సమీపంలోని కేసరపల్లి ఐటీ పార్క్ వద్ద జూన్ 12న ఉదయం 11: 27 నిమిషాలకు చంద్రబాబు నాయుడు సీఎంగా ప్రమాణ స్వీకారం చేస్తారు. అయితే అమరావతిలో కాకుండా కేసరపల్లి వద్ద చంద్రబాబు ప్రమాణ స్వీకారం చేస్తుండటంపై ఆసక్తికర చర్చ నడుస్తోంది. అమరావతి రాజధాని అనే పదే పదే చెప్తున్న టీడీపీ.. అమరావతిలో ఎందుకు ప్రమాణ స్వీకారం చేయలేదనే వార్తలూ వస్తన్నాయి. అయితే దీనికి అనేక కారణాలు కనిపిస్తున్నాయి.

కేసరపల్లి ఐటీ పార్క్ వద్దనున్న మైదానంలో చంద్రబాబు ప్రమాణ స్వీకారం జరగనుంది. కేసరపల్లి ఐటీ పార్క్‌ను 2006 లో అప్పటి ముఖ్యమంత్రి వైఎస్ రాజశేఖర్ రెడ్డి ప్రారంభించారు.. విజయవాడను ఐటీ హబ్‌గా తీర్చిదిద్దాలనే ఆలోచనతో కేసరపల్లి ఐటీ పార్క్ ఏర్పాటైంది. 2010లో అప్పటి సీఎం కొణిజేటి రోశయ్య కేసరపల్లి ఐటీ పార్క్‌లో మేధ టవర్స్ ప్రారంభించారు. అయితే నారా చంద్రబాబు నాయుడు ప్రమాణ స్వీకారం కార్యక్రమాన్ని ఇక్కడ నిర్వహించడానికి కొన్ని కారణాలు ఉన్నాయి. ప్రమాణ స్వీకారానికి ప్రధానమంత్రి నరేంద్ర మోదీ సహా పలువురు జాతీయ నాయకులు, బీజేపీ పెద్దలు హాజరుకానున్నారు. కేసరపల్లి ఐటీ పార్క్ గన్నవరం విమానాశ్రయానికి కేవలం ఒకటిన్నర కిలోమీటర్ల దూరంలో ఉంది. అలాగే విజయవాడ నగరానికి 20 కిలోమీటర్ల దూరంలో ఉంటుంది.

గన్నవరం ఎయిర్ పోర్టుకు, విజయవాడ సిటీకి దగ్గరగా ఉన్న నేపథ్యంలో ప్రముఖులు, వీవీఐపీలు సులభంగా చేరుకోవచ్చనే ఆలోచనతో ప్రమాణ స్వీకారం కార్యక్రమాన్ని ఇక్కడ ఏర్పాటు చేశారు. దీనికి తోడు ప్రమాణ స్వీకారం జరిగే ప్రాంతంలో ఒకేసారి 50 వేలమందికి పైగా కూర్చునేందుకు వీలుంది. మొత్తం 18 నుంచి 20 ఎకరాల విస్తీర్ణంలో ఉన్న ఈ ప్రాంగణం లక్ష మంది హాజరైనా సరిపోతుంది. ప్రమాణ స్వీకారానికి మూడు పార్టీల నుంచి పెద్దఎత్తున కార్యకర్తలు హాజరుకానున్నారు. ఈ నేపథ్యంలోనే ముందుజాగ్రత్తగా విశాలమైన ఈ స్థలాన్ని ఎంపిక చేసినట్లు తెలిసింది.

ఇక అమరావతిలో ప్రమాణ స్వీకారం కార్యక్రమాన్ని నిర్వహించడానికి కూడా కొన్ని పరిమితులు ఉన్నాయి. విజయవాడ ఎయిర్ పోర్టుకు అమరావతి 35 కిలోమీటర్ల దూరంలో ఉంది. అలాగే ప్రముఖుల విమానాలు దిగేందుకు ఏకంగా ఆరు హెలీ ప్యాడ్లు ఏర్పాటు చేయాల్సి ఉంటుంది. వీటికి తోడు గత ఐదేళ్లకాలంలో అమరావతి అభివృద్ధిని విస్మరించడంతో మౌలిక సౌకర్యాల కల్పన కష్టంగా మారుతోంది. ఈ విషయాలను పరిగణనలోకి తీసుకునే.. చంద్రబాబు ప్రమాణ స్వీకారాన్ని అమరావతిలో కాకుండా కేసరపల్లి ఐటీ పార్క్ వద్ద ఏర్పాటు చేశారు.