చంద్రబాబుకు అవమానంతో నాడు పోలీస్ ఉద్యోగానికి రాజీనామా.. మళ్లీ తీసుకోవాలంటూ రిక్వెస్ట్

2021లో ఆంధ్రప్రదేశ్ అసెంబ్లీలో జరిగిన పరిణామాలతో టీడీపీ అధినేత, అప్పటి ప్రతిపక్ష నేత చంద్రబాబు కన్నీళ్లు పెట్టుకున్న ఘటన గురించి తెలిసిందే. అయితే చంద్రబాబును ఆ పరిస్థితుల్లో చూసి ఆవేదనతో ఓ హెడ్ కానిస్టేబుల్ తన ఉద్యోగానికి రాజీనామా చేశారు. అయితే ఏపీలో టీడీపీ కూటమి తిరిగి అధికారంలోకి రావడంతో ఆ కానిస్టేబుల్‌ను తిరిగి ఉద్యోగంలోకి తీసుకోవాలని ఆయన సోదరుడు రిక్వెస్ట్ చేశారు. సోషల్ మీడియా వేదికగా నారా లోకేష్‌‌ను ట్యాగ్ చేస్తూ.. న్యాయం చేయాలని కోరారు.

 'మా అన్న గారు హెడ్ కానిస్టేబుల్ కె. విజయ్ కృష్ణ గారు అసెంబ్లీ లో నారా చంద్రబాబు నాయుడు గారికి జరిగిన అవమానం చూసి తట్టుకోలేక ఆవేదన తో తన ఉద్యోగానికి రాజీనామా చేశారు.. ఇప్పుడు తెలుగుదేశం ప్రభుత్వంలో ఇతనికి న్యాయం చేయాలని కోరుకుంటున్నా.. మంత్రి నారా లోకేష్ గారు ప్లీజ్' అంటూ రిక్వెస్ట్ చేశారు. ఆయనకు న్యాయం చేయాలని కొందరు నెటిజన్లు కామెంట్స్ చేస్తున్నారు.

ప్రకాశం జిల్లాకు చెందిన విజయ్ కృష్ణ 1998 బ్యాచ్ సివిల్ కానిస్టేబుల్.. అసెంబ్లీలో పరిణామాలను చూసి 2021లో తన ఆవేదనను వ్యక్తం చేశారు. రిటర్న్ టెస్ట్‌లో టాపర్‌ని అని చెప్పారు. 2002, 2003లో ఒంగోలు పీటీసీలో బెస్ట్ షూటర్‌గా అవార్డు అందుకున్నట్లు వివరించారు. చంద్రబాబు ముఖ్యమంత్రిగా ఉన్నప్పుడే తనకు కానిస్టేబుల్ ఉద్యోగం వచ్చిందని ఆయన గుర్తు చేసుకున్నారు. తాను నిజాయితీగా ఉద్యోగం చేశానని.. ఎక్కడా చేయి చాచలేదన్నారు. అసెంబ్లీలో చంద్రబాబు విషయంలో జరిగిన పరిణామాలు తనను బాధించాయి అన్నారు.. అందుకే ఉద్యోగానికి రాజీనామా చేస్తున్నట్లు ప్రకటించారు. తన సర్వీస్‌లో ఏ రోజూ ఎవరికి తలొగ్గలేదని.. నిజాయితీగానే ఉద్యోగం చేశానన్నారు.

ఈ క్యాప్, బెల్ట్ వద్దంటూ వీడియోలోనే తీసి పక్కనపెట్టారు.. ఇన్ని రోజులు తనకు తిండి పెట్టిన ఈ ఉద్యోగం అంటే ఎంతో గౌరవమని.. అందుకే తాను ఎవర్నీ విమర్శించుకుండా తన ఉద్యోగానికి రాజీనామా చేస్తున్నానన్నారు. ఈ ఉద్యోగం మానేసి అవసరమైతే టీకొట్టు, టిఫిన్ సెంటర్ పెట్టుకుంటానన్నారు. అవసరమైతే తన చిన్న బిడ్డ బొమ్మలు వేసి తనను పోషిస్తుందన్నారు. ఈ ఉద్యోగంలో కొనసాగుతూ ఎవరి మోచేతి నీళ్లు తాగి బతకలేనన్నారు. ఈ వీడియో అప్పట్లో సోషల్ మీడియాలో వైరల్ అయ్యింది. అంతేకాదు కొంతకాలానికి ఆయన్ను సస్పెండ్ కూడా చేశారు.. ఆ తర్వాత ఆయన ఉద్యోగం గురించి క్లారిటీ లేదు. ఇప్పుడు టీడీపీ కూటమి అధికారంలోకి రావడంతో న్యాయం చేయాలని కోరుతున్నారు.. మళ్లీ ఉద్యోగంలోకి తీసుకోవాలంటున్నారు. మరి ఈ రిక్వెస్ట్‌పై ప్రభుత్వం పెద్దలు ఎలా స్పందిస్తారన్నది చూడాలి.