7 ఏళ్లుగా ముస్లిం మహిళ నిరీక్షణ.. ప్రభుత్వం ఇల్లు ఇచ్చినా అడుగుపెట్టనివ్వని స్థానికులు

పేదలను ఆదుకునేందుకు ప్రభుత్వాలు ఎన్నో పథకాలు ప్రవేశపెడుతూ ఉంటాయి. ఇల్లు లేని వారికి ఇల్లు కట్టి ఇవ్వడమో లేక డబ్బులు ఇవ్వడమో చేస్తూ ఉంటాయి. ఈ నేపథ్యంలోనే గుజరాత్ ప్రభుత్వం కూడా గూడు లేని నిరుపేదలకు.. ముఖ్యమంత్రి ఆవాస్ యోజన కింద ఇల్లు కట్టించి ఇస్తోంది. అయితే ప్రభుత్వం నిర్మించిన ఇళ్లను.. అర్హులకు అందిస్తోంది. ఈ నేపథ్యంలోనే గతంలో 7 ఏళ్ల క్రితం ఓ ఇంటిని ముస్లిం మహిళకు కేటాయించారు. కానీ ఆ మహిళను ఇంట్లోకి వెళ్లకుండా స్థానికంగా ఉన్నవారు అడ్డుకున్నారు. అదేంటని అడగ్గా.. ఆమె ముస్లిం అని.. గుజరాత్ ప్రభుత్వం అమలు చేస్తున్న చట్టం ప్రకారం.. హిందువులతో కలిసి ఉండటం కుదరదని స్థానికులు తేల్చి చెప్పారు. ఆమె ఇంట్లో ఉండొద్దని వారు ధర్నా చేయడంతో చేసేదేమీ లేక ఆ ముస్లిం మహిళ ఏడేళ్లుగా పోరాటం చేస్తూనే ఉన్నారు.

గుజరాత్‌ వడోదరలోని హార్నీ ప్రాంతంలో ముఖ్యమంత్రి ఆవాస్‌ యోజన పథకం కింద మోట్‌నాథ్‌ హౌసింగ్ కాంప్లెక్స్‌ను ఆ రాష్ట్ర ప్రభుత్వం నిర్మించింది. అయితే 2017 లో ఓ ముస్లిం మహిళకు ఒక ఫ్లాట్‌ను కేటాయించారు. ఆ ఫ్లాట్ కేటాయించి 7 ఏళ్లు అయినా ఆ మహిళ మాత్రం ఇంట్లో అడుగు పెట్టలేకపోయింది. వడోదర మున్సిపల్‌ కార్పొరేషన్‌లోని ఆ మోట్‌నాథ్ హౌసింగ్ కాంప్లెక్స్‌లో మొత్తం 462 ఇళ్లు ఉన్నాయి. ఆ హౌసింగ్‌ కాంప్లెక్స్‌లో ఉండే 33 మంది మిగిలిన లబ్ధిదారులు ఆ ముస్లిం మహిళకు ఇంటికి కేటాయించడంపై తీవ్ర అభ్యంతరాలు వ్యక్తం చేశారు. ఆమె ముస్లిం అని.. ఆమె అక్కడ ఉంటే.. హిందూ ముస్లింల మధ్య గొడవలు జరిగే అవకాశం ఉందంటూ 2020 లోనే గుజరాత్ ముఖ్యమంత్రి కార్యాలయానికి.. వడోదర కలెక్టర్‌కు.. స్థానిక అధికారులకు వారు లేఖలు రాశారు. అంతటితో ఆగకుండా నిరసన కూడా వ్యక్తం చేయడంతో ఆ మహిళ అక్కడి నుంచి వెళ్లిపోయారు.

 ఆ ముస్లిం మహిళ భర్త చనిపోవడంతో ఆమె గత కొన్నేళ్లుగా పుట్టింట్లోనే ఉండిపోయింది. అయితే తన కుమారుడితో కలిసి.. ఆ ఇంట్లోకి వెళ్లేందుకు ప్రయత్నించగా.. మళ్లీ అక్కడ ఉన్న స్థానికులు ధర్నాకు దిగారు. 7 ఏళ్లు అయినా పరిస్థితులు ఏ మాత్రం మారలేదని ఆమె తీవ్ర ఆవేదన వ్యక్తం చేశారు. అయితే మతపరమైన ఘర్షణలు జరగకుండా గుజరాత్ ప్రభుత్వం ఒక చట్టం తీసుకువచ్చింది. డిస్టర్బ్డ్ ఏరియా యాక్ట్ ప్రకారం.. మతపరంగా సున్నితమైన ప్రాంతాల్లో ఆస్తులు కొనుగోలు చేయడం, విక్రయించడం వంటి వాటికి సదరు జిల్లా కలెక్టర్ నుంచి అనుమతి తప్పనిసరిగా తీసుకోవాల్సి ఉంటుంది. అంతేకాకుండా దానికి స్థానికంగా ఉండేవారి నుంచి నో అబ్జెక్షన్ సర్టిఫికేట్ తీసుకోవాల్సి కూడా ఉంటుంది.