అహం పెరిగింది, అందుకే రాముడు 241 సీట్ల వద్దే ఆపేశాడు.. బీజేపీపై ఆరెస్సెస్ నేత పరోక్ష విమర్శలు

2014, 2019 లోక్‌సభ ఎన్నికల్లో ఎన్డీఏ కూటమిగానే పోటీ చేసినా.. బీజేపీకి సొంతంగానే మెజార్టీకి మించి స్థానాలు లభించాయి. అయితే ఇటీవల జరిగిన ఎన్నికల్లో ఆ పార్టీ కేవలం 241 స్థానాల్లో మాత్రమే విజయం సాధించింది. ఈసారి ఎన్నికల్లో ఎన్డీఏ కూటమి 400 కు పైగా స్థానాలు వస్తాయని.. అందులో 370 సీట్లు బీజేపీ సొంతంగా గెలుచుకుంటుందని.. ఎన్నికల వేళ.. ప్రధానమంత్రి నరేంద్ర మోదీ మొదలుకుని, కేంద్రమంత్రులు, బీజేపీ పెద్దలు, నేతలు, కార్యకర్తలు విస్తృత ప్రచారం చేశారు. అయితే మ్యాజిక్ ఫిగర్ కూడా అందుకోలేని బీజేపీ.. ఈ ఎన్నికల్లో చతికిలపడింది. ఈ నేపథ్యంలోనే రాష్ట్రీయ స్వయం సేవక్ సంఘ్ ఆరెస్సెస్ నేతలు.. వరుసగా బీజేపీ లక్ష్యంగా తీవ్ర స్థాయిలో మండిపడుతున్నారు. ఇటీవలె ఆరెస్సెస్ చీఫ్ మోహన్ భగవత్.. బీజేపీ మండిపడగా.. తాజాగా మరో నేత కూడా అవే వ్యాఖ్యలు చేయడం గమనార్హం.

ఈసారి లోక్‌సభ ఎన్నికల ఫలితాలపై ఆరెస్సెస్ నేత ఇంద్రేష్‌ కుమార్‌.. బీజేపీ ప్రదర్శనపై పరోక్షంగా కీలక వ్యాఖ్యలు చేశారు. అహం పెరిగిపోవడం వల్లే ఈ ఎన్నికల్లో అలాంటి ఫలితాలు వచ్చాయంటూ తీవ్రంగా మండిపడ్డారు. రాజస్థాన్‌ జైపూర్‌లోని కనోటాలో గురువారం సాయంత్రం నిర్వహించిన ఓ కార్యక్రమంలో మాట్లాడిన ఇంద్రేష్ కుమార్.. రాముడిని ఆరాధించే వారిలో అహం బాగా పెరిగిపోయిందని. వాళ్లు తమను తాము అతిపెద్ద పార్టీగా ప్రకటించుకున్నారని మండిపడ్డారు. కానీ చివరికి ఏం జరిగింది.. వాళ్లు అనుకున్నది జరగలేదని.. రాముడు కూడా వాళ్లను 241 దగ్గరే ఆపేశాడని పరోక్షంగా విమర్శలు చేశారు.

ఇదే సమయంలో ప్రతిపక్షంలో ఉన్న ఇండియా కూటమి లక్ష్యంగా కూడా ఆయన తీవ్రంగా ధ్వజమెత్తారు. అయితే ఇండియా కూటమి పేరును ప్రస్తావించకుండానే విమర్శలు గుప్పించడం గమనార్హం. ఎవరైతే రాముడి మీద విశ్వాసం లేకుండా పోయారో.. వాళ్లను కూడా దేవుడు 234 దగ్గరే ఆపేశాడని పేర్కొన్నారు. అయితే ఈ ఎన్నికల తర్వాత బీజేపీపై ఆరెస్సెస్ మండిపడటం ఇదేమీ కొత్త కాదు. కొన్ని రోజుల క్రితం.. ఈ లోక్‌సభ ఎన్నికల ఫలితాల గురించి, బీజేపీ గురించి పరోక్షంగా వ్యాఖ్యానించిన ఆరెస్సెస్‌ చీఫ్‌ మోహన్‌ భగవత్‌ కూడా ఈ తరహా వ్యాఖ్యలే చేశారు. నిజమైన సేవకుడు ఎప్పుడూ చేసిన సేవను చెప్పుకోడని.. ప్రజా సేవకులకు అహంకారం ఉండరాదని మోహన్ భగవత్ పేర్కొన్నారు.

గత రెండు సార్వత్రిక ఎన్నికల్లో ఎన్డీఏ కూటమిలో భాగంగానే బీజేపీ పోటీ చేసినా.. సొంతంగానే 272 సీట్ల మెజారిటీ మార్కు కంటే ఎక్కువగానే ఎంపీ స్థానాలను దక్కించుకుంది. కానీ ఈ ఎన్నికల్లో మాత్రం బీజేపీ ఘోరంగా విఫలం అయింది. కేవలం 241 సీట్లే సాధించిన బీజేపీ.. చివరికి మిత్రపక్షాల మీద ఆధారపడి సంకీర్ణ ప్రభుత్వాన్ని ఏర్పాటు చేసింది.