కన్నడ నటుడు దర్శన్ కేసులో కీలక పరిణామం.. వారితో రూ.30 లక్షలకు డీల్

యూట్యూబర్ రేణుకాస్వామి హత్య కేసులో ఆరోపణలు ఎదుర్కొంటున్న కన్నడ నటుడు దర్శన్‌ను పోలీసులు అరెస్ట్ చేసిన విషయం తెలిసిందే. తన ప్రియురాలు, నటి పవిత్రాగౌడపై సోషల్ మీడియాలో అనుచిత వ్యాఖ్యల చేసి, అశ్లీల ఫోటోలు పంపుతున్నాడని చిత్రదుర్గకు చెందిన యూట్యూబర్ రేణుకాస్వామిని కన్నడ నటుడు దర్శన్, అతడి అనుచరులు అపహరించి హత్య చేశారు. చిత్రదుర్గకు వెళ్లి జూన్‌ 8న ఉదయం 11 గంటలకు రేణుకాస్వామిని అపహరించి, బెంగళూరుకు తీసుకొచ్చి హత్య చేసినట్టు పోలీసులు గుర్తించారు. ఈ కేసులో శుక్రవారం కీలక పరిణామం చోటుచేసుకుంది. దర్శన్ డ్రైవర్ రవి పోలీసులకు లొంగిపోయాడు. రేణుకాస్వామిని చిత్రదుర్గ నుంచి తీసుకొచ్చినవారిలో రవి ఒకడని పోలీసులు తెలిపారు. గురువారం రాత్రి అతడు తమ ఎదుట లొంగిపోయాడని చెప్పారు.

ఈ కేసులో మొత్తం 11 మంది నిందితులను అరెస్ట్ చేసినట్టు పోలీసులు పేర్కొన్నారు. ఇంకో నిందితుడు రఘు అలియాస్ రాఘవేంద్రతో కలిసి రేణుకాస్వామిని చిత్రదుర్గ నుంచి బెంగళూరుకు తీసుకొచ్చేందుకు వాహనం ఏర్పాటుచేశారని అన్నారు. ఆ క్యాబ్‌ను రవి నడిపినట్టు వెల్లడించారు. వారిని బెంగళూరులో వదిలిపెట్టిన తర్వాత రవి అజ్ఞాతంలోకి వెళ్లాడు. అక్కడ నుంచి చిత్రదుర్గలోని టాక్సీ అసోసియేషన్‌కు చేరుకున్న నిందితుడు.. పోలీసులకు లొంగిపోవాలని భావిస్తున్నట్టు చెప్పాడని విశ్వసనీయ వర్గాలు తెలిపాయి.

చిత్రదుర్గలో తన అభిమాన సంఘాన్ని నడుపుతున్న రఘును రేణుకా స్వామి గురించిన సమాచారం సేకరించేందుకు దర్శన్ నియమించుకున్నాడని పోలీసులు తెలిపారు. రేణుకా స్వామిని తమ ఇంటి దగ్గర నుంచి కిడ్నాప్ చేశారని ఆయన భార్య ఆరోపించింది. రేణుకాస్వామిని హత్యచేసిన తర్వాత.. మృతదేహాన్ని ఆ రోజు రాత్రి రెండు కార్లలో తీసుకెళ్లినట్టు సీసీటీవీ ఫుటేజ్‌లో రికార్డయ్యింది.

తన బూటు కాలితో రేణుకాస్వామి మర్మాంగంపై దర్మన్ తన్నడంతోనే అతడు మరణించాడని విచారణలో వెల్లడయ్యింది. ‘మొదట మొహంపై దర్శన్‌ పిడిగుద్దులు కురిపించాడు.. కింద పడుతున్న స్వామి తల పక్కనే ఉన్న టెంపోకు తగిలింది. స్పృహ కోల్పోయే స్థితికి చేరుకుంటున్న అతడి మర్మాంగంపై దర్శన్‌ తన్నడంతోనే చనిపోయాడు’ అని నిందితులు పోలీసుల విచారణలో ఘటనను వివరించారు. పోస్ట్‌మార్టమ్ నివేదికలోనూ రేణుకాస్వామి మరణానికి ఇదే కారణమని ఉందని పోలీసులు గుర్తించారు. రేణుకాస్వామిని హత్య చేసి, ఆ నేరాన్ని ఒప్పుకునేందుకు నలుగురు యువకులకు రూ.30 లక్షలు ఇచ్చేలా డీల్‌ కుదిరినట్లు పోలీసుల విచారణలో తేలింది.