దారుణం.. షుగర్ వ్యాధి ఉందని మహిళ ఉద్యోగం తొలగించిన బాస్

షుగర్ వ్యాధి. ప్రస్తుత కాలంలో చిన్న పిల్లల దగ్గరి నుంచి పండు ముసలి వరకు చాలా మంది ఈ మధుమేహ వ్యాధితో బాధపడుతున్నారు. దీర్ఘ కాలిక వ్యాధి అయిన ఈ డయాబెటిస్‌ను నియంత్రించేందుకు ఎన్నో రకాల పద్దతులు ఉన్నాయి. అయితే ఒకప్పుడు షుగర్ వ్యాధి అంటే చాలా తక్కువ మందికే ఉండేది.. కానీ ప్రస్తుతం చాలా మంది మధుమేహ వ్యాధితో సతమతం అవుతున్నారు. అయితే దీర్ఘకాలికంగా ఉండే ఈ షుగర్ వ్యాధి వచ్చిందని తెలియగానే చాలా మంది కుమిలిపోతారు. అలాంటి పరిస్థితుల్లోనే ఉన్న ఓ మహిళకు ఊహించని అనుభవం ఎదురైంది. షుగర్ వ్యాధి కారణంగా ఆ మహిళ ఉద్యోగం పోయింది.

ఈ వార్త ప్రస్తుతం సోషల్ మీడియాలో తెగ హల్‌చల్ చేస్తోంది. తన బాస్ నుంచి ఎదురైన అనూహ్య సంఘటనను ఓ మహిళ బాధతో రెడిట్ అనే సోషల్ మీడియా ప్లాట్‌ఫామ్‌లో ఒక సుదీర్ఘ పోస్ట్ పెట్టింది. ఓ మహిళ ఆఫీస్‌లో పనిచేస్తూ ఉండగా.. ఒక్కసారిగా శరీరంలో షుగర్ లెవల్స్ భారీగా పెరిగిపోయాయి. దీంతో ఆమెకు కళ్లు తిరిగినట్లు అనిపించింది. వెంటనే తన ఇంటికి వెళ్లిపోయింది. అయితే ఆఫీస్‌కు వచ్చిన బాస్.. ఆమె లేకపోవడంతో తీవ్ర ఆగ్రహానికి గురయ్యాడు. మహిళా ఉద్యోగి.. పని వేళల్లో కనిపించకపోవడంతో ఉద్యోగం నుంచి ఆమెను తొలగిస్తున్నట్లు మెసేజ్ పంపించాడు.

అయితే దానికి ఆమె సమాధానం ఇచ్చింది. తనకు ఒక్కసారిగా షుగర్ లెవల్స్ పెరిగాయని.. అందుకే ఇంటికి వెళ్లినట్లు చెప్పింది. కావాలంటే డాక్టర్ వద్దకు వెళ్లినట్లు రిపోర్ట్స్, షుగర్ లెవల్స్‌కు సంబంధించిన రిపోర్ట్స్ పంపిస్తానని పేర్కొంది. తాను జరిగి విషయం మొత్తాన్ని మళ్లీ ఆఫీస్‌కు వచ్చాక చెబుతానని వెల్లడించింది. అయితే అవేమీ పట్టించుకోని ఆ బాస్.. ఆమెను అప్పటికప్పుడు జాబ్ నుంచి తొలగిస్తున్నట్లు పేర్కొన్నాడు. అంతటితో ఆగకుండా ఆఫీస్‌లో ఆ మహిళకు సంబంధించిన వస్తువులన్నింటినీ ఆమె ఇంటికే పంపించేశాడు. ఇక ఆఫీస్‌కు రావాల్సిన అవసరం లేదని చెప్పాడు.

ఇక ఈ విషయాన్ని ఆ మహిళ సోషల్ మీడియాలో పంచుకోవడంతో వైరల్‌గా మారింది. ఇది నిజం అని చెప్పేందుకు తన బాస్‌తో జరిగిన చాటింగ్‌ను కూడా షేర్ చేసింది. దీంతో ఆ మహిళ బాస్‌పై నెటిజన్ల తీవ్ర స్థాయిలో మండిపడుతున్నారు. ఇలాంటి అనారోగ్యంతో బాధపడుతున్నవారిని అప్పటికప్పుడు ఉద్యోగంలో నుంచి తొలగించడం ఏంటని ఆగ్రహం వ్యక్తం చేస్తున్నారు. ఇక అనారోగ్యంతో బాధపడుతున్న ఉద్యోగి బాగోగులు చూసుకోవడం మానేసి.. ఉద్యోగం తొలగించడం ఏంటని తీవ్ర విమర్శలు చేస్తున్నారు. ఇక ఈ ఘటనపై న్యాయపరంగా చర్యలు తీసుకోవాలని బాధితురాలికి సలహాలు ఇస్తున్నారు.