వీళ్లు ఎంపీలా, వీధి రౌడీలా.. పార్లమెంటులోనే ఇలా కొట్టుకున్నారేంటీ

ఇటలీలో ప్రస్తుతం జీ7 సదస్సు జరుగుతోంది. ఈ సమ్మిట్ కోసం వివిధ దేశాల అధినేతలు ఇప్పటికే రష్యా చేరుకున్నారు. అయితే ఇటలీ పార్లమెంటులో మాత్రం ఓ యుద్ధమే జరిగింది. ఓ బిల్లు విషయంలో అధికార పార్టీ ఎంపీలు, ప్రతిపక్ష పార్టీల మధ్య తలెత్తిన మాటల తూటాలు కాస్త.. దాడి చేసుకునే వరకు వెళ్లాయి. దీంతో గురువారం ఇటలీ పార్లమెంట్ రణరంగంగా మారింది. ఎంపీలు ఒకరిపై మరొకరు పిడిగుద్దులు కురిపించుకుంటూ.. తన్నుకుంటూ నానా హంగామా సృష్టించారు. ఇక స్పీకర్ పోడియం ముందుకు వచ్చిన ఎంపీలు మరింత భీకరంగా దాడి చేసుకున్నారు. అయితే ఇటలీ ఎంపీలు.. పార్లమెంటులో చేసిన రచ్చకు సంబంధించిన వీడియో ప్రస్తుతం నెట్టింట తెగ వైరల్ అవుతోంది.

ఇటలీలోని కొన్ని ప్రాంతాలకు ఆర్థికంగా మరింత స్వేచ్ఛ కల్పించేందుకు.. ప్రభుత్వం ఒక బిల్లును రూపొందించింది. అయితే ఆ బిల్లును అధికార పార్టీ.. పార్లమెంటులో ప్రవేశపెట్టింది. అయితే ప్రజల నుంచి సేకరించిన పన్నులను తిరిగి వినియోగించడంపై ఆయా ప్రాంతాలకు మరింత స్వేచ్ఛను ఇచ్చేలా ఈ బిల్లును తయారు చేశారు. అయితే ఈ బిల్లును ప్రతిపక్ష పార్టీ ఎంపీలు తీవ్రంగా ఖండించారు. ఈ క్రమంలో సెంటర్-లెఫ్ట్ ఫైవ్ స్టార్ ఉద్యమానికి చెందిన ఓ చట్టసభ సభ్యుడు.. పార్లమెంటులో ఇటలీ జాతీయ జెండాను ప్రదర్శించేందుకు ప్రయత్నం చేశారు. ఈ క్రమంలోనే అధికార, ప్రతిపక్ష పార్టీల ఎంపీల మధ్య ఘర్షణ, తోపులాట చోటు చేసుకుంది.

అయితే ఈ బిల్లును తీవ్రంగా వ్యతిరేకిస్తున్న ప్రతిపక్ష పార్టీ.. ఇది కాస్తా ఆమోదం పొందితే ఇటలీలోని ఉత్తర - దక్షిణ విభజన మరింత తీవ్రం అవుతుందని తీవ్ర ఆందోళన వ్యక్తం చేసింది. ఇప్పటికే పేదరికంలో కూరుకుపోతున్న ఇటలీలోని దక్షిణాది ప్రాంతాలు మరింత ఇబ్బందుల్లో పడతాయని ఆవేదన వ్యక్తం చేస్తోంది. అయితే ప్రతిపక్షాలు చేస్తున్న ఆరోపణలను అధికార పార్టీ తీవ్రంగా ఖండిస్తోంది.

 మరోవైపు.. ప్రస్తుతం ఇటలీలో జీ7 శిఖరాగ్ర సదస్సు జరుగుతున్న వేళ.. పలు దేశాధినేతలు ఇటలీకి చేరుకుంటున్న సమయంలోనే.. ఆ దేశ పార్లమెంటులో జరిగిన ఈ వ్యవహారం తీవ్ర సంచలనంగా మారింది. ఎంపీలు ఇలా విచక్షణ, చట్టసభల గౌరవాన్ని మరిచిపోయి.. పరస్పరం దాడులు చేసుకోవడం తీవ్ర చర్చనీయాంశం అయింది. ఘటనపై స్పందించిన ఇటలీ విదేశాంగ మంత్రి.. తీవ్ర విచారం వ్యక్తం చేశారు. జరిగిన ఘటనపై తనకు మాటలు రావడం లేదని చెప్పారు. ఇక గురువారం ప్రారంభమైన జీ7 శిఖరాగ్ర సమావేశాలు శనివారం వరకు కొనసాగనుండగా.. అందులో పాల్గొనేందుకు యూరోపియన్ యూనియన్‌తోపాటు మరో ఆరు దేశాల అధినేతలు ఇటలీ చేరుకున్నారు. ఇక జీ7 సభ్యదేశం కాని భారత్ తరఫున కూడా ప్రధానమంత్రి నరేంద్ర మోదీ ఈ సమావేశాల్లో పాల్గొనడం విశేషం.