ఏపీలో అప్పటి నుంచే అన్న క్యాంటీన్లు.. మంత్రి నారాయణ

ఆంధ్రప్రదేశ్‌లో పాలనను ప్రక్షాళన చేసే దిశగా టీడీపీ కూటమి ప్రభుత్వం అడుగులు వేస్తోంది. అందులో భాగంగా 2014లో టీడీపీ ప్రభుత్వం తీసుకువచ్చిన అన్న క్యాంటీన్లను తిరిగి ప్రారంభించాలని.. సీఎం చంద్రబాబు నాయుడు నిర్ణయించారు. ఈ క్రమంలోనే ముఖ్యమంత్రిగా బాధ్యతలు స్వీకరించిన వెంటనే అన్న క్యాంటీన్ల ప్రారంభంపై సంతకం చేశారు. ఇచ్చిన మాట ప్రకారం రాష్ట్రంలో అన్న క్యాంటీన్లను త్వరగా ప్రారంభించేందుకు చర్యలు చేపట్టారు. మరోవైపు.. మున్సిపల్, పట్టణాభివృద్ధిశాఖ మంత్రిగా బాధ్యతలు స్వీకరించిన మంత్రి నారాయణ.. అన్న క్యాంటీన్ల ఏర్పాటుపై సమీక్షించారు. అన్న క్యాంటీన్లను ఎప్పటిలోగా ప్రారంభిస్తామనే దానిపైనా కీలక వ్యాఖ్యలు చేశారు.

మూడు వారాల్లోగా 100 అన్న క్యాంటీన్లను తెరిచేందుకు ఏర్పా్ట్లు చేస్తున్నట్లు మంత్రి నారాయణ చెప్పారు. అలాగే అన్న క్యాంటీన్ల నిర్వహణను ఎవరికి అప్పగించాలనే దానిపై.. ఆలోచనలు చేస్తున్నట్లు చెప్పారు. అయితే వీటి నిర్వహణను మళ్లీ ఇస్కాన్‌కు ఇవ్వాలా లేదా.. టెండర్లు పిలవాలా అనే దానిపైన అధ్యయనం చేస్తున్నట్లు మంత్రి నారాయణ తెలిపారు. ఇస్కాన్ ప్రతినిధులతో మాట్లాడితే మూడు వారాల్లో వంద క్యాంటీన్లను ఏర్పాటు చేయగలమని చెప్పినట్లు మంత్రి తెలిపారు. త్వరలోనే వంద క్యాంటీన్లను తెరిచి నిరుపేదల ఆకలి తీర్చేందుకు ప్రయత్నిస్తున్నట్లు చెప్పారు.

2014లో అధికారంలోకి వచ్చిన తర్వాత టీడీపీ ప్రభుత్వం అన్న క్యాంటీన్లను ఏర్పాటు చేసింది. 184 చోట్ల అన్న క్యాంటీన్లను ఏర్పాటు చేశారు. వీటి ద్వారా నాలుగుకోట్ల మందికి పైగా నిరుపేదలకు ఆకలి తీర్చినట్లు టీడీపీ వర్గాలు చెప్తున్నాయి. అయితే వైసీపీ ప్రభుత్వం అధికారంలోకి వచ్చిన తర్వాత అన్న క్యాంటీన్లు మూతపడ్డాయి. ఈ నేపథ్యంలోనే తాము అధికారంలోకి వచ్చిన తర్వాత తిరిగి అన్న క్యాంటీన్లు తెరుస్తామని హామీ ఇచ్చిన చంద్రబాబు.. ముఖ్యమంత్రిగా ప్రమాణ స్వీకారం చేసిన వెంటనే అన్న క్యాంటీన్ల ప్రారంభంపై సంతకం చేశారు.

చంద్రబాబు ఆదేశాల మేరకు గతంలో ఉన్న 184 అన్న క్యాంటీన్లకు తోడుగా.. పెండింగ్‌లో ఉన్న 19 క్యాంటీన్లను పూర్తి చేసి మొత్తం 203 క్యాంటీన్లను సెప్టెంబర్ 21లోగా పూర్తి చేయాలని ప్రభుత్వం ఆలోచిస్తోంది. వీటిలో తొలి విడతగా వంద క్యాంటీన్లను మరో మూడు వారాల్లోగా ప్రారంభించేందుకు చర్యలు తీసుకుంటున్నట్లు మున్సిపల్ శాఖ మంత్రి నారాయణ తెలిపారు.