వైఎస్సార్‌సీపీ రిక్వెస్ట్.. వైఎస్ జగన్‌‌కు అసెంబ్లీలో గౌరవం, ఆ రూల్ పక్కన పెట్టిన సీఎం చంద్రబాబు

ఆంధ్రప్రదేశ్ అసెంబ్లీ సమావేశాలు ప్రారంభమయ్యాయి. తొలిరోజు సభలో కొత్తగా గెలిచిన ఎమ్మెల్యేలు ప్రమాణ స్వీకారం చేశారు.. ముందుగా ముఖ్యమంత్రి నారా చంద్రబాబు, డిప్యూటీ సీఎం పవన్ కళ్యాణ్, ఆ తర్వాత మంత్రులు, అనంతరం వైఎస్ జగన్, ఎమ్మెల్యేలు ప్రమాణ స్వీకారం చేశారు. అయితే ఏపీ శాసనసభా వ్యవహారాల మంత్రి పయ్యావుల కేశవ్ ఆసక్తికర విషయాన్ని చెప్పారు. మాజీ ముఖ్యమంత్రి వైఎస్ జగన్ కోసం అసెంబ్లీకి సంబంధించిన కొన్ని రూల్స్ పక్కన పెట్టినట్లు చెప్పారు.

వాస్తవానికి అసెంబ్లీలో ముఖ్యమంత్రికి ఎంట్రీ వేరేగా ఉంటుందని.. కానీ చంద్రబాబు మాత్రం తాను ఏ మెట్ల ద్వారా బయటకు వెళ్లానో ఆ మెట్ల ద్వారానే లోపలికి వస్తానన్నారని పయ్యావుల కేశవ్ చెప్పారు. ఎమ్మెల్యేలు సభ లోపలికి వచ్చే ఎంట్రీ నుంచి అసెంబ్లీలోకి అడుగు పెట్టారని.. రెండున్నరేళ్ల క్రితం జరిగిన అంశాన్ని ప్రస్తావించారు. అలాగే వైఎస్ జగన్‌ విషయంలో ముఖ్యమంత్రి చంద్రబాబు ఔదార్యంతో వ్యవహరించారన్నారు.

వైఎస్ జగన్ ఉదయం అసెంబ్లీ సమావేశాలకు వైఎస్సార్‌సీపీ ఎమ్మెల్యేలతో కలిసి బయలుదేరి వచ్చారు. అయితే జగన్‌కు విపక్ష హోదాకూడా లేకపోవడంతో.. ఆయన కారుతో పాటు మిగతా వైఎస్సార్‌సీపీ ఎమ్మెల్యేల కార్లను అసెంబ్లీ బయటే ఉంచి లోపలోకి నడుచుకుంటూ వెళ్లాల్సి ఉంటుంది. అయితే విపక్ష హోదా లేకపోయినా సరే.. వైఎస్ జగన్ మాజీ ముఖ్యమంత్రి కావడంతో ఆయనను కారుతో పాటు లోపలోకి అనుమతించేలా శాసనసభా వ్యవహారాల మంత్రి పయ్యావుల కేశవ్ ఆదేశాలు జారీ చేశారు. వైఎస్ జగన్ కారును అసెంబ్లీ సిబ్బంది ప్రాంగణంలోకి అనుమతించారు.

వైఎస్ జగన్‌కు ప్రతిపక్ష నేత హోదా లేకపోవడంతో ఆయన కారును అసెంబ్లీ బయటే ఉంచి లోపలోకి రావాల్సి ఉన్నా సరే.. ముఖ్యమంత్రి చంద్రబాబు ఆదేశాలతో జగన్ కారును అసెంబ్లీ లోపలికి అనుమతించినట్లు శాసనసభా వ్యవహారాల మంత్రి పయ్యావుల తెలిపారు. వైఎస్ జగన్ ఎమ్మెల్యే హోదాలో అసెంబ్లీ గేటు బయట కారు దిగి లోపలికి రావాల్సి ఉంటుందని.. ప్రమాణ స్వీకారం చేసే సమయంలో.. ఎమ్మెల్యేల పేరులో ఆంగ్లంలోని మొదటి అక్షరం ఆల్ఫాబెటికల్ ఆర్డర్‌లో సాధారణ సభ్యుల ప్రమాణం ఉంటుందన్నారు. కానీ వైఎస్సార్‌సీపీ నుంచి రిక్వెస్ట్‌ వచ్చిందని.. ఈ విషయాన్ని ముఖ్యమంత్రి చంద్రబాబు దృష్టికి తీసుకెళ్లగానే చాలా ఔదార్యంగా వ్యవహరించారన్నారు. ఇవి చిన్న విషయాలు.. కచ్చితంగా అనుమతి ఇద్దామని ముఖ్యమంత్రి వెంటనే ఆదేశాలు ఇచ్చారన్నారు.

వైఎస్ జగన్ కారు వస్తే అసెంబ్లీలోకి అనుమతించమని చెప్పారని.. అలాగే ముఖ్యమంత్రి, డిప్యూటీ సీఎం, మంత్రుల తర్వాత జగన్ ప్రమాణ స్వీకారం చేశారన్నారు. వాస్తవానికి ఎమ్మెల్యేల పేరులో మొదటి అక్షరం ప్రకారం ప్రమాణ స్వీకారం చేయాల్సి ఉంటుంది. కానీ ఆ విషయంలో కూడా చంద్రబాబు ఔదార్యంగా వ్యవహరించారన్నారు. ప్రజాస్వామ్యానికి గౌరవం ఇస్తూ తొలిరోజే ఇవన్నీ మొదలుపెట్టారన్నారు. మరోవైపు అసెంబ్లీ సమావేశాలు తొలిరోజు ఎవరికీ పాస్ ఎంట్రీలు లేవు అని అసెంబ్లీ వర్గాలు తెలిపాయి. సీటింగ్ లేని కారణంగా సభ్యుల కుటుంబ సభ్యులకు, సందర్శకులకు పాస్‌లు లేవని.. ఈ మేరకు అసెంబ్లీ అధికారులు నిర్ణయం తీసుకున్నారు. జగన్ హోదా తగ్గించవద్దని సీఎం చంద్రబాబు ఆదేశించారని.. దీంతో అసెంబ్లీలోనూ జగన్ కు ఆ మేరకు ఇబ్బందుల్లేకుండా చూసేందుకు ప్రభుత్వం సిద్దమైనట్లు సమాచారం.

మరోవైపు వైఎస్ జగన్ అసెంబ్లీ వెనక గేటు నుంచి లోపలికి వచ్చారు. గతంలో సీడ్ యాక్సెస్ రోడ్ నుంచి మందడం మీదుగా అసెంబ్లీకి వచ్చిన జగన్.. అమరావతి రైతులు నిరసన తెలుపుతారని బయటనుంచి అసెంబ్లీకి వచ్చారు. అసెంబ్లీ ప్రాంగణంలోకి వచ్చినా నేరుగా సభలోకి వెళ్లకుండా.. సభ ప్రారంభమైన 5 నిమిషాలకు వెళ్లారు. తన ప్రమాణస్వీకారం సమయం వచ్చినప్పుడే సభలోకి అడుగుపెట్టారు. ఎమ్మెల్యేగా ప్రమాణం చేసి సభలో కూర్చోకుండా ఛాంబర్‌లోకి వెళ్లిపోయారు.

మరోవైపు ముఖ్యమంత్రి చంద్రబాబుకు అసెంబ్లీ ప్రధాన ద్వారం వద్ద సీఎంకు స్వాగతం పలికారు. అసెంబ్లీ లోపలికి వచ్చేముందు మెట్లకు నమస్కారం చేశారు.. అనంతరం పూర్ణ కుంభంతో చంద్రబాబుకు వేద పండితులు స్వాగతించారు. అసెంబ్లీలోని తన ఛాంబర్‌లోకి వచ్చిన వెంటనే.. చంద్రబాబుకు పండితులు ఆశీర్వచనాలు అందజేశారు. ఆ తర్వాత అసెంబ్లీలోకి చంద్రబాబు అడుగు పెట్టారు. ఆయన సభలో అడుగు పెట్టగానే.. సభ్యులు లేచి నిలబడి హర్షధ్వానాలు చేస్తూ కూటమి ఎమ్మెల్యేలు, మంత్రులు స్వాగతం పలికారు.