ప్రియుడితో అల్లుడిని చంపించిన అత్త

విశాఖపట్నంలో దారుణం జరిగింది. కూతురు పసుపు కుంకుమలు కలకలం ఉండాలని దీవించాల్సిన తల్లి కర్కశంగా వ్యవహరించింది. ఆవేశంలో ఆమె తీసుకున్న నిర్ణయం.. పట్టుమని పదిరోజులు కూడా లేని ఓ చిన్నారికి తండ్రిని దూరం చేసింది. ప్రేమించి పెళ్లి చేసుకున్న ఓ యువతికి.. కట్టుకున్నోడి ప్రేమను లేకుండా చేసింది. మొత్తంగా రెండు కుటుంబాల్లో అంతులేని వేదనను మిగిల్చింది. పోలీసులు, స్థానికులు తెలిపిన వివరాల ప్రకారం.. అగనంపూడి సమీపంలోని హనుమాన్ కూడలిలో సోమవారం రాత్రి దారుణ హత్య జరిగింది. ఓ క్యాబ్ డ్రైవర్‌ను దారుణంగా హత్య చేశారు.

అల్లుడిని హత్య చేయించిన అత్త వ్యవహారం విశాఖలో కలకలం రేపుతోంది. మల్కాపురం ప్రకాష్ నగర్‌కు చెందిన దాడి సూర్యకిరణ్ అనే క్యాబ్ డైవర్.. గాజువాకకు చెందిన మేఘన అనే యువతిని ప్రేమించి పెళ్లి చేసుకున్నాడు. 2022 డిసెంబర్ 21న గన్నవరంలో వీరిద్దరూ ప్రేమ వివాహం చేసుకున్నారు. వీరికి ఇటీవలే ( జులై 1) కూతురు పుట్టింది. అయితే మేఘన తల్లి సుజాతకు ఈ ప్రేమ వివాహం ఇష్టం లేదు. దీనిపై సుజాతకు, మేఘనకు గతంలో పలుసార్లు గొడవలు కూడా జరిగినట్లు సమాచారం. దీంతో సూర్యకిరణ్ కాపురాన్ని హైదరాబాద్‌కు మార్చాడు. అయితే మేఘన గర్భం దాల్చడంతో ప్రసవం కోసం ఇటీవలే తిరిగి సొంతూరికి వచ్చాడు. జులై ఒకటో తేదీన అగనంపూడిలోని ఆస్పత్రిలో మేఘన ఆడబిడ్డకు జన్మనిచ్చింది.

మరోవైపు మేఘన తల్లి సుజాత భర్త గతంలోనే చనిపోగా.. కొర్లయ్య అనే వ్యక్తితో ఆమె సన్నిహితంగా ఉన్నట్లు తెలుస్తోంది. తన కూతురు మేఘనకు పాప పుట్టిందన్న విషయం తెలుసుకున్న సుజాత.. వారిని చూద్దామని జులై ఏడో తేదీన ఆస్పత్రికి వెళ్లారు. అయితే అక్కడే ఉన్న సూర్య కిరణ్ ఆమెను అడ్డుకున్నారు. ఈ సందర్బంగా అత్తా, అల్లుడి మధ్య వాగ్వాదం జరిగింది. దీంతో అల్లుడి మీద మరింత కోపం పెంచుకున్న సుజాత.. ఈ విషయాన్ని కొర్లయ్యకు చేరవేసింది. అల్లుడి అడ్డు తొలగించుకోవాలని భావించింది. దీంతో సోమవారం రాత్రి ఆస్పత్రిలోని భార్యాకూతురిని చూసి బైక్ మీద ఇంటికి వెళ్తున్న సూర్యకిరణ్‌పై కొర్లయ్య దాడి చేశాడు. కత్తితో దాడి చేయడంతో సూర్య కిరణ్ అక్కడిక్కడే ప్రాణాలు కోల్పోయాడు. అనంతరం నిందితుడు కొర్లయ్య దువ్వాడ పోలీస్ స్టేషన్‌లో లొంగిపోయాడు. ఈ ఘటనపై దువ్వాడ పోలీసులు కేసు నమోదు చేసి దర్యాప్తు చేపట్టారు.

మరోవైపు సూర్య కిరణ్ హత్య కేసులో ఆయన భార్య మేఘన ఇప్పుడు మరో ట్విస్ట్ ఇచ్చారు. తన భర్తకు డబ్బు పిచ్చి ఎక్కువని, పెళ్లికి ముందు ఒకలా, పెళ్లి తర్వాత మరోలా తయారయ్యారని చెప్తున్నారు. పెళ్లైన తర్వాత ఎప్పుడూ తనతో గొడవ పడుతూ ఉండేవాడని పోలీసులకు స్టేట్మెంట్ ఇచ్చారు. పెళ్లికి ముందే సూర్య కిరణ్‌కు, తన తల్లికి మధ్య గొడవ జరిగిందన్న మేఘన.. కొర్లయ్య విషయంలో తమకు, తన తల్లికి మధ్య గొడవ జరిగేదని చెప్పారు. తమ కుటుంబంపై కొర్లయ్య పెత్తనం ఉండటం తన భర్తకు నచ్చేది కాదని మేఘన పోలీసులకు తెలిపారు.