రిటైర్డ్ ప్రిన్సిపల్‌ రమాదేవి పెద్ద మనసు.. బసవతారకం ఆసుపత్రికి రూ.కోటి విలువైన ఆస్తి దానం

బసవతారకం క్యాన్సర్ ఆస్పత్రికి రిటైర్డ్ ప్రిన్సిపల్ భారీ విరాళాన్ని అంందజేశారు. గుంటూరు జిల్లా తెనాలికి చెందిన రిటైర్డ్ ప్రిన్సిపల్‌ పి రమాదేవి రూ.కోటి విలువ చేసే ఆస్తిని బసవతారకం క్యాన్సర్ ఆస్పత్రికి దానం చేశారు. తన తదనంతరం ఆస్తి ఆ ఆసుపత్రికి చెందేలా వీలునామాను రాశారు రమాదేవి. దీనికి సంబంధించిన పత్రాల్ని ఆమె సంరక్షకులు పి.చూడామణిరెడ్డి, శాస్త్రవేత్త డాక్టర్‌ సీతా దయాకర్, ప్రతాప్‌రెడ్డి.. అమరావతిలోని సచివాలయంలో ముఖ్యమంత్రి నారా చంద్రబాబు నాయుడికి అందజేశారు. రమాదేవి శ్రీకాకుళం ప్రభుత్వ మహిళా డిగ్రీ కళాశాల ప్రిన్సిపల్‌గా పనిచేశారు.. అనంతరం పదవీ విరమణ చేశారు. ఆమెకు ముగ్గురు కుమారులు సంతానం.. వారంతా అమెరికాలో స్థిరపడ్డారు. తెలుగు రాష్ట్రాల్లో క్యాన్సర్‌ సోకిన వారికి మెరుగైన వైద్య సదుపాయం అందిస్తున్న బసవతారకం ఆసుపత్రికి ఆస్తిని అందజేయడం ఆనందంగా ఉందన్నారు. తన ఆస్తిని సంతృప్తిగానే ఆస్పత్రికి అందజేస్తున్నట్లు రమాదేవి తెలిపారు. అంతేకాదు ఆంధ్రప్రదేశ్ రాజధాని అమరావతి నిర్మాణానికీ తన వంతుగా సాయం చేయడానికి ఆమె సిద్ధంగా ఉన్నట్లు సంరక్షకులు తెలిపారు.

బసవతారకం ఇండో అమెరికన్ క్యాన్సర్ ఆస్పత్రి హైదరాబాద్‌లో సేవలు అందిస్తోంది. అయితే ఏపీలో కూడా రాజధాని అమరావతిలో కూడా ఏర్పాటు చేయనున్నారు. గతంలో టీడీపీ ప్రభుత్వ హయాంలోనే ఆస్పత్రి కోసం స్థలం కేటాయించారు.. ఆ తర్వాత ప్రభుత్వం మారడంతో అడుగులు పడలేదు. అయితే తాజాగా కూటమి ప్రభుత్వం అధికారంలోకి రావడంతో ఆస్పత్రిని నిర్మిస్తామని ఇటీవల ఛైర్మన్ నందమూరి బాలకృష్ణ తెలిపారు. అమరావతిలో బసవతారకం హాస్పిటల్ పూర్తయితే ఆంధ్రప్రదేశ్ నుంచి హైదరాబాద్‌కి వచ్చే ఎంతోమంది పేద క్యాన్సర్ పేషెంట్లకు ఊరట దక్కతుంది.

హైదరాబాద్ బంజారాహిల్స్‌లో దాదాపు 650 పడకల సామర్థ్యంతో బసవతారకం క్యాన్సర్ ఆస్పత్రి నడుస్తోంది. ఇక్కడ మెడికల్ ఆంకాలజీ, రేడియేషన్ ఆంకాలజీ, సర్జికల్ ఆంకాలజీ, పెయిన్ అండ్ పాలియేటివ్ మెడిసిన్, ఓంకో అనస్థీషియా, ఆంకో పాథాలజీ, సోషల్ వెల్ఫేర్, లేబొరేటరీ మెడిసిన్ వంటి క్యాన్సర్ కేర్‌లో వివిధ ప్రత్యేకతలు బసవతారకం ఆస్పత్రిలో ఉన్నాయి. బసవతారకం ఆస్పత్రి.. 2021లో బెస్ట్ ఆంకాలజీ ఆసుపత్రుల్లో దేశంలోనే ఆరవ ఉత్తమ క్యాన్సర్ సెంటర్‌గా గుర్తింపు పొందింది.