తిరుమలలో మరింత రుచిగా అన్నప్రసాదం.. రంగంలోకి సౌతిండియా చెఫ్‌లు

తిరుమల వెంకన్నను దర్శించుకునేందుకు నిత్యం ఎక్కడెక్కడి నుంచో భక్తులు తరలివస్తుంటారు. వేలాది కిలోమీటర్ల దూరం నుంచి ప్రయాణం చేసి వచ్చి.. తిరుమల శ్రీవారిని దర్శించుకుంటూ ఉంటారు. అలా దర్శించుకున్న అనంతరం వెంగమాంబ అన్నప్రసాదం భవనంలో.. స్వామి వారి అన్నప్రసాదాన్ని స్వీకరించి తరిస్తూ ఉంటారు. అయితే తిరుమల అన్నప్రసాదంపై ఇటీవల అప్పుడప్పడూ ఫిర్యాదులు వస్తున్నాయి. ఈ నేపథ్యంలో శ్రీవారి అన్నప్రసాదాన్ని మరింత రుచికరంగా, నాణ్యంగా తీర్చిదిద్దేందుకు టీటీడీ చర్యలు ప్రారంభించింది. ఇందులో భాగంగా తిరుమలలోని గోకులం విశ్రాంతి భవనంలో సౌతిండియా చెఫ్‌లు, పాకశాస్త్ర నిపుణులతో టీటీడీ ఈవో సమీక్ష నిర్వహించారు.

ఈ సమావేశంలో శ్రీవారి భక్తులకు అన్నప్రసాదాన్ని మరింత రుచిగా, పరిశుభ్రంగా అందించేందుకు తిరుమల అన్నప్రసాదం తయారీ విధానాన్ని ఆధునీకరించాలని చెఫ్‌లు, నిపుణులతో కూడిన కమిటీ టీటీడీకి సూచించింది. అంతకుముందు తరిగొండ వెంగమాంబ అన్నప్రసాద కేంద్రాన్ని సందర్శించిన కమిటీ సభ్యులు.. అన్నప్రసాదాల నిల్వ, వడ్డన, శుభ్రపరచడాన్ని పరిశీలించారు. అనంతరం టీటీడీ ఈవోకు పలు సూచనలు చేశారు. అన్నప్రసాదం రుచి, నాణ్యతను మెరుగు పరిచేందుకు వంటశాలలను ఆధునీకరించాలని టీటీడీకి పాకశాస్త్ర నిపుణుల కమిటీ సూచించింది.

ప్రతిరోజూ లక్షల మందికి ఆకలి తీరుస్తున్న వెంగమాంబ అన్నప్రసాదం పనితీరును అభినందించిన కమిటీ సభ్యులు.. పెరుగుతున్న భక్తుల సంఖ్య దృష్ట్యా కొన్ని సూచనలు చేశారు. వంటశాలలను ఆధునీకరించడం సహా.. సిబ్బందికి ట్రైనింగ్ ఇవ్వాలని సూచించారు.ఇన్ హౌస్ ల్యాబ్‌లను ఏర్పాటు చేసి అన్నప్రసాదాన్ని తనిఖీ చేస్తుండాలని సూచించారు. అలాగే ఆహార పదార్థాల పరిశుభ్రత, వ్యర్థ పదార్థాల నిర్వహణ, పరికరాల యాంత్రీకరణపైనా టీటీడీకి పలు సూచనలు చేశారు. ప్రతి మూడు నెలలకు ఓసారి ఫుడ్ అనలిస్టుల సలహాలు తీసుకోవడం ద్వారా శ్రీవారి భక్తులకు మరింత రుచికరమైన, నాణ్యమైన ఆహారాన్ని అందించవచ్చని టీటీడీకి నిపుణుల కమిటీ సూచించింది.

మరోవైపు దక్షిణ భారతదేశానికి చెందిన చెఫ్‌లు, పాకశాస్త్ర నిపుణులు చేసిన సలహాలను స్వీకరించిన టీటీడీ ఈవో.. ఇందుకు అవసరమైన ఏర్పాట్లు చేస్తామని తెలిపారు. పక్కా ప్రణాళికను రూపొందించి, మరోసారి అన్నప్రసాద కార్యకలాపాలపై త్వరలో మరోసారి సమావేశం నిర్వహించనున్నట్లు టీటీడీ ఈవో శ్యామలరావు తెలిపారు.