ఏపీలో రైలు ప్రయాణికులకు గుడ్‌న్యూస్.. ఈ రైళ్లకు అదనపు బోగీలు

ఏపీలో రైలు ప్రయాణికులకు అధికారులు శుభవార్త చెప్పారు. ప్రయాణికుల రద్దీ దృష్టిలో ఉంచుకుని.. మొత్తం 12 ఎక్స్‌ప్రెస్‌ రైళ్లకు రెండు అదనపు జనరల్‌ బోగీలు ఏర్పాటు చేస్తున్నట్లు రైల్వే అధికారులు ప్రకటన విడుదల చేశారు. సికింద్రాబాద్ గూడూరు మధ్య నడిచే సింహపురి ఎక్స్‌ప్రెస్ (12709/12710).. సికింద్రాబాద్ హౌరా మధ్య నడిచే ఫలక్‌నుమా ఎక్స్‌ప్రెస్ (12703/12704) రైళ్లకు అదనపు బోగీలు ఏర్పాటు చేశారు. హైదరాబాద్ విశాఖపట్నం మధ్య నడిచే ఎక్స్‌ప్రెస్ (12727) కు కూడా అదనపు బోగీలు ఏర్పాటు చేశారు.

  కాకినాడ పోర్ట్ నుంచి లింగంపల్లికి వచ్చే గౌతమి ఎక్స్‌ప్రెస్ (12737/12738).. కాకినాడ పోర్టు నుంచి భావనగర్ వెళ్లే రైలు (12755/12756)కు, కాకినాడ పోర్ట్ నుంచి సాయినగర్‌ షిర్డీ ఎక్స్‌ప్రెస్ (17205/17206) , హైదరాబాద్ నుంచి తాంబరం వెళ్లే ఛార్మినార్ ఎక్స్‌ప్రెస్ (12759/12760), కాకినాడ పోర్ట్ నుంచి లింగంపల్లి వచ్చే రైలు (12775/12776), సికింద్రాబాద్ నుంచి భువనేశ్వర్ వెళ్లే‌ ఎక్స్‌ప్రెస్ (17015/17016), మచిలీపట్నం నుంచి యశ్వంత్‌పూర్‌ కొండవీడు ఎక్స్‌ప్రెస్ (17211/17212), మచిలీపట్నం నుంచి ధర్మవరం వెళ్లే మచిలీపట్నం ఎక్స్‌ప్రెస్ (17215/17216), కాకినాడ పోర్ట్ నుంచి లోకమాన్య తిలక్ (17221/17222) రైళ్లకు అదనపు బోగీలు ఏర్పాటు చేస్తున్నట్లు అధికారులు తెలిపారు. మరోవైపు సికింద్రాబాద్‌ డివిజన్‌లో నిర్వహణ పనుల కారణంగా ఇటీవల విజయవాడ- భద్రాచలం రోడ్‌ మధ్య నడిచే 07278/07279 నంబరు రైలును రద్దు చేసిన సంగతి తెలిసిందే. తాజాగా ఈ రైలును శనివారం నుంచి పునరుద్ధరిస్తున్నట్లు రైల్వేశాఖ అధికారులు తెలిపారు.

మరోవైపు విజయవాడ యార్డ్‌ పరిధిలో మరమ్మతుల కారణంగా పలు రైళ్లను రద్దు చేస్తున్నట్లు అధికారులు తెలిపారు. వీటిలో పినాకిని, జనశతాబ్ధి రైళ్లు ఉన్నాయి. విజయవాడ- చెన్నై సెంట్రల్‌ పినాకినీ ఎక్స్‌ప్రెస్ (12711/12712) ఆగస్టు 5 నుంచి 10 వరకు పూర్తిగా రద్దు చేశారు. డా.ఎంజీఆర్‌ చెన్నై సెంట్రల్‌-విజయవాడ జనశతాబ్ది ఎక్స్‌ప్రెస్ (12077 /12078) ఆగస్టు 5 నుంచి 10వ వరకు పూర్తిగా రద్దైంది. బిట్రగుంట- చెన్నై సెంట్రల్‌ ఎక్స్‌ప్రెస్ (17237, 17238) ఆగస్టు 4 నుంచి 11 వరకు రద్దు చేశారు. అలాగే హైదరాబాద్‌ నుంచి సాయంత్రం 6 గంటలకు తాంబరం వెళ్లే ఎక్స్‌ప్రెస్‌ (12760) ఆగస్టు 2 నుంచి 10 వరకు మళ్లించారు. వరంగల్‌, మహబూబాబాద్‌, డోర్నకల్‌, ఖమ్మం, విజయవాడకు బదులుగా.. పగిడిపల్లి, గుంటూరు, తెనాలి మీదుగా మళ్లించినట్లు తెలిపారు. ఈ రైలుకు నల్గొండ, గుంటూరులో అదనపు హాల్ట్‌ కల్పించారు. తాంబరం నుంచి సాయంత్రం 5.30 గంటలకు హైదరాబాద్‌ వెళ్లే రైలు (12759) ఆగస్టు 2 నుంచి 10 వరకు మళ్లించారు. ఈ రైలు విజయవాడ, ఖమ్మం, డోర్నకల్‌, మహబాబాబాద్‌, వరంగల్‌, ఖాజీపేట మీదుగా వెళ్లాల్సి ఉంది.. కానీ తెనాలి, గుంటూరు, పడిగిపల్లి మీదుగా మళ్లించినట్లు తెలిపారు. ఈ రైలుకు గుంటూరు, నల్గొండలో అదనపు హాల్ట్‌ కల్పించారు. ప్రయాణికులు ఈ విషయాన్ని గమనించాలని సూచించారు.. అందుకు తగిన విధంగా జర్నీలు ప్లాన్ చేసుకోవాలని రైల్వే అధికారులు తెలిపారు.