నారా లోకేష్ ఎంట్రీ.. కువైట్ శివ సేఫ్.. త్వరలోనే సొంతూరికి.

కువైట్ వెళ్లి కష్టాలు పడుతున్న తెలుగు కార్మికుడు శివను భారతీయ రాయబార కార్యాలయం కాపాడింది. ప్రస్తుతం అతను ఇండియన్ ఎంబసీ కార్యాలయంలో ఉన్నారు. ఎంబసీ అధికారులే శివకు ఆహారం, వసతి కల్పి్స్తున్నారు. త్వరలోనే అతన్ని భారతదేశానికి పంపించనున్నారు. ఈ నేపథ్యంలో తనకు సహకరించిన వారికి ధన్యవాదాలు చెప్తూ శివ మరో వీడియో విడుదల చేశారు. బతుకుదెరువు కోసం కువైట్ వచ్చి.. ఇక్కడ చిక్కుకుపోయానని శివ వాపోయారు. సోషల్ మీడియాలో తన వీడియోను చూసి ఎంబసీ అధికారులు స్పందించారని చెప్పారు. ఉండడానికి రూమ్, తినడానికి తిండి ఏర్పాటు చేశారన్న శివ.. ఇంటికి చేర్చే బాధ్యత తమదని హామీ ఇచ్చినట్లు చెప్పుకొచ్చారు. తనకు సాయపడిన అందరికీ ధన్యవాదాలు తెలియజేశారు.

మరోవైపు అన్నమయ్య జిల్లా వాల్మీకిపురం మండలం చింతపర్తికి చెందిన శివ.. ఉపాధి కోసం కువైట్ వెళ్లారు. అప్పులు చేసి మరీ రాయచోటికి చెందిన ఏజెంట్ సాయంతో నెలరోజుల కిందటే కువైట్ వెళ్లారు. అయితే ఎంతో ఆశతో కువైట్ వెళ్లిన శివకు అక్కడకు చేరగానే అసలు విషయం బోధపడింది. అక్కడికి వెళ్లగానే జనసంచారం లేని ఎడారిలో శివను పనిలో పెట్టారు. ఎడారిలో జనం, నీరు లేని ప్రాంతంలో కోళ్లు, పావురాలు, గొర్రెలు మేపే పనిని శివకు అప్పగించారు. అసలే ఎడారి, ఆపై తిండీనీరు లేకపోవటంతో శివ భయపడిపోయాడు. ఎవరికైనా చెప్పుకుందామంటే జనసంచారం లేని ప్రాంతం. దీంతో తన బాధను ఏజెంట్‌, భార్యకు తెలియజేశాడు. అయితే అక్కడే ఉండాలంటూ ఏజెంట్ స్పష్టం చేయడంతో.. ఏం చేయాలో తెలియక సోషల్ మీడియాలో తన బాధను వెళ్లగక్కాడు.

కువైట్‌లో తాను పడుతున్న కష్టాలను చెప్పుకుంటూ సోషల్ మీడియాలో శివ పెట్టిన వీడియో వైరల్ అయ్యింది. ఈ విషయం ఏపీ మంత్రి నారా లోకేష్ వరకూ చేరింది. దీంతో అతన్ని ఆదుకుంటామని నారా లోకేష్ మాటిచ్చారు. ఇచ్చిన మాట ప్రకారం కువైట్ శివ సంగతిని టీడీపీ ఎన్నారై బృందానికి చేరవేశారు. ఆ తర్వాత కేంద్ర ప్రభుత్వం సాయంతో.. ఎంబసీ అధికారులకు సమాచారం ఇచ్చారు.

భారత్ నుంచి శివ గురించి సమాచారం అందుకున్న కువైట్‍లోని ఇండియన్ ఎంబసీ అధికారులు వేగంగా స్పందించారు. శివ వద్దకు చేరుకుని.. ఆయనను ఎంబసీ కార్యాలయానికి తీసుకువచ్చారు. ప్రస్తుతం ఎంబసీ కార్యాలయంలోనే శివకు బస ఏర్పాటు చేసిన అధికారులు.. ఇండియాకు పంపేందుకు ఏర్పాట్లు చేస్తున్నారు. దీంతో తనను ఇండియాకు తీసుకువచ్చేందుకు సహకరించిన అందరికీ ధన్యవాదాలు చెప్తూ శివ వీడియో విడుదల చేశారు.