చికెన్ ముక్కలు ఎత్తుకెళ్లిన కాకిని కట్టేసిన షాప్ ఓనర్.. రివేంజ్ తీర్చుకున్న కాకులు!

కాకి కదా అని చిన్న చూపు చూడొద్దు.. వాటికి కూడా యూనిటీ, ఫాలోయింగ్ ఉంటుంది మరి. చూడటానికి చిన్న ప్రాణి అయినా దాని నుంచి మనుషులు నేర్చుకోవాల్సిన ఎన్నో మంచి విషయాలు ఉన్నాయి. సాటి మనిషి కష్టాల్లో ఉంటే పట్టించుకోని ఘటనలు చాలానే ఉన్నాయి.. కానీ కాకులు మాత్రం అలా కాదు. తోటి కాకికి కష్టం వచ్చిందని తెలిస్తే చాలు గుంపులు గుంపులుగా ఏకమై వచ్చేస్తాయి. సరిగ్గా అలాంటి ఘటనే .కోనసీమ జిల్లాలో జరిగింది.. ఆ వీడియో వైరల్ అవుతోంది.

రాజోలు సమీపంలోని తాటిపాకలో డైలీ మార్కెట్ ఉంది.. అక్కడ చికెన్ షాపులు ఉన్నాయి. ఓ చికెన్ షాపు దగ్గరకు ఓ కాకి వస్తోంది.. తరిమేసినా సరే పదే, పదే రావడంతో యజమాని విసిగిపోయాడు. ఈసారి కాకిని షాపు దగ్గరకు రానిచ్చి చాకచక్యంగా పట్టుకున్నాడు.. ఓ తాడు తెచ్చి కట్టేశాడు. అలా కాకిని బంధించాడో లేదో.. వెంటనే వందలాది కాకులు అక్కడికి వచ్చాయి. ఆ చుట్టుపక్కలే ఎగురుతూ పెద్దగా అరుస్తూ కనిపించాయి.. ఒక్క మాటల చెప్పాలంటే తమ మిత్రుడ్ని బంధించిన చికెన్ షాపుపై దండెత్తాయి.

ఆ షాపు చుట్టూ కాకులు చేరి పెద్దగా అరవడంతో అందరూ అవాక్కయ్యారు. కాకుల అరుపులు వినలేక ఆ చుట్టుపక్కల ఉన్నవారికి విసుగొచ్చింది. అయినా సరే సదరు చికెన్ షాపు యజమాని ఆ కాకిని వదల్లేదు.. ఇటు కాకులు కూడా వెనక్కు తగ్గేది లేదని అక్కడే తిరుగుతూ కనిపంచాయి. మార్కెట్‌కు వచ్చిన జనాలు ఈ కాకుల దెబ్బకు విసుగు చెందారు. ఎంకి పెళ్లి సుబ్బి చావుకొచ్చినట్లు.. ఈ కాకి పంచాయతీ ఆ మార్కెట్‌‌కి వచ్చిన వారికి చుక్కలు చూపించింది. చెవులు చిల్లులు పడేలా ఆ కాకులు అరిచే అరుపులకి మార్కెట్‌ మోతెక్కిపోయింది. ఈ కాకుల గోల భరించలేక.. ఆ బంధించిన కాకిని వదిలేయాలని తోటి దుకాణదారులు, స్థానికులు కోరారు. షాపు యజమాని ఆ కాకిని కట్టేసిన తాడును వదిలయడంతో.. బంధనాలు తెంపుకుని గాల్లోకి ఎగిరిన ఆ కాకి వెంట మిగతా కాకులు కూడా అరుచుకుంటూ వెళ్లిపోవడంతో కథ సుఖాంతమైంది.

కాకుల గుంపు అక్కడి నుంచి వెళ్లిపోవడంతో అందరూ ఊపిరి పీల్చుకున్నారు. మొత్తం మీద కాకులు కొద్దిసేపు జనాల్ని అల్లాడించాయి.. కాకులు చేసే శబ్దంతో విసుగు తెప్పించాయి. చివరికి అనుకున్నది సాధించి.. తమ తోటి మిత్రుడ్ని విడిపించుకుని వెళ్లాయి. ఈ సీన్ మొత్తాన్ని మార్కెట్‌కి వచ్చిన వినియోగదారులు చూసి ఆశ్చర్యపోయారు. ఇలా కాకులకు ఉన్న ఐక్యత నేటి సమాజంలో, మనుషుల్లో లేకుండా పోయిందని చర్చించుకున్నారు. ప్రస్తుతం ఈ వీడియో సోషల్ మీడియాలో కూడా బాగా వైరల్ అవుతోంది.