గుడిలో ఇదేంటి మేడమ్.. మాజీ మంత్రి రోజాపై నెటిజన్ల ఆగ్రహం

ఆంధ్రప్రదేశ్ అసెంబ్లీ ఎన్నికల తర్వాత మాజీ మంత్రి రోజా పెద్దగా ఎక్కడ కనిపించలేదు. ఇటీవల వైఎస్ రాజశేఖరరెడ్డి జయంతి కార్యక్రమంలో కనిపించారు. ప్రస్తుతం ఆమె తమిళనాడులోని ప్రముఖ పుణ్యక్షేత్రాలను భర్త సెల్వమణితో కలిసి దర్శించుకుంటున్నారు. ఈ క్రమంలో ఓ ఆలయంలో రోజా ప్రవర్తించిన తీరుపై విమర్శలు వస్తున్నాయి.. సెల్ఫీ తీసుకోవడానికి ప్రయత్నించిన పారిశుద్ధ్య కార్మికులను ఆమె దూరంగా నిల్చోమన్నట్లు చెప్పిన వీడియో సోషల్ మీడియాలో వైరల్ అవుతోంది. రోజా తీరుపై నెటిజన్లు ఆగ్రహం వ్యక్తం చేస్తున్నారు.

మాజీ మంత్రి రోజా సోమవారం తమిళనాడులోని తిరెచ్చెందూర్ సుబ్రహ్మణ్యస్వామి ఆలయంలో వరుణాభిషేకంలో పాల్గొన్నారు. ఆమెతో పాటూ భర్త సెల్వమణి కూడా వెళ్లారు.. అభిషేకం తర్వాత రోజా స్వామివారిని దర్శించుకుని ప్రత్యేక పూజలు నిర్వహించారు. అయితే రోజా గతంలో చాలా తమిళ సినిమాల్లో కూడా నటిచడంతో.. అక్కడ క్రేజ్ ఉంది. రోజా ఆలయానికి వచ్చారని తెలిసి కొందరు భక్తులు ఫోటోలు, సెల్ఫీల కోసం ఎగబడ్డారు. రోజా ఆలయంలో భక్తుల్ని నవ్వుతూ పలకరించారు.. సెల్ఫీలకు ఫోజులిచ్చారు.

రోజా భక్తులతో ఫోటోలు దిగే క్రమంలో క్లోజ్‌గా నిలబడ్డారు.. అయితే ఆలయ ప్రాంగణంలో తనతో ఫోటో తీసుకునేందుకు వచ్చిన పారిశుద్ధ్య మహిళా కార్మికులను మాత్రం దగ్గరికి రానివ్వలేదు. దూరంగా నిల్చోవాలంటూ వారికి రోజా సైగలు చేశారు. ఆ మహిళా పారిశుద్ధ్య కార్మికులు కాస్త దూరంగా నిలబడి ఆమెతో ఫోటోలు తీసుకున్నారు. ఈ వీడియో సోషల్ మీడియాలో బాగా వైరల్ అవుతోంది. కొంతమంది నెటిజన్లు రోజా తీరుపై ఆగ్రహం వ్యక్తం చేస్తున్నారు. 'పారిశుద్ధ్య కార్మికులంటే అంత చిన్నచూపా' అంటూ మండిపడుతున్నారు.

రోజా వీడియోను టీడీపీ కూడా తన అధికారిక ఎక్స్ (ట్విట్టర్) ఖాతాలో ట్వీట్ చేసింది. 'పారిశుధ్య కార్మికులపై వివక్ష చూపిస్తూ, అసహ్యంగా హావభావాలు పెట్టి వారిని అవమానించిన వైసీపీ నేత రోజా రెడ్డి. దుమ్మెత్తి పోస్తున్న తమిళ మీడియా' అంటూ ట్వీట్‌లో పేర్కొంది. మొత్తం మీద రోజాపై విమర్శలు వస్తుండగా.. ఈ వివాదంపై మాజీ మంత్రి రోజా స్పందించాల్సి ఉంది.