మైక్రోసాఫ్ట్ పై సోషల్ మీడియాలో పేలుతున్న మీమ్స్
international | Suryaa Desk | Published : Fri, Jul 19, 2024, 10:34 PM
సోషల్ మీడియాలో నెటిజన్లకు ఉండే క్రియేటివిటీ గురించి ప్రత్యేకంగా చెప్పాల్సిన అవసరం లేదు. ఏ విషయం ట్రెండింగ్లో ఉందో.. దానిపై తమదైన శైలిలో ట్రోల్స్, మీమ్స్తో తమ మార్క్ చూపిస్తూ ఉంటారు. ఈ క్రమంలోనే శుక్రవారం ప్రపంచవ్యాప్తంగా మైక్రోసాఫ్ట్ విండోస్ సేవల్లో అంతరాయం ఏర్పడిన సంగతి తెలిసిందే. దీంతో చాలా మంది మైక్రోసాఫ్ట్ యూజర్లు.. సోషల్ మీడియా వేదికగా తాము ఎదుర్కొంటున్న టెక్నికల్ సమస్యను పంచుకున్నారు. అదే సమయంలో టెక్నికల్ ఎర్రర్కు సంబంధించిన ఫోటోలు, వీడియోలు పోస్ట్ చేస్తు్న్నారు. దీంతో ఇవే ట్రోలర్స్, మీమర్స్కు బాగా స్టఫ్ ఇచ్చినట్లయింది. దీంతో వారు ఫన్నీగా ట్రోల్స్, మీమ్స్ చేస్తూ ఉన్నారు. మైక్రోసాఫ్ట్ విండోస్ సేవల్లో తలెత్తిన అంతరాయంపై నెట్టింట మీమ్స్ తెగ వైరల్ అవుతున్నాయి. వీకెండ్ ముందే వచ్చిందంటూ కొందరు నెటిజన్లు ట్వీట్లు చేస్తున్నారు. ఇక మరికొందరైతే శుక్రవారం నుంచే వీకెండ్ ప్రారంభమైందని.. శుక్ర, శని, ఆది వారాల్లో.. ఐటీ ఉద్యోగులకు సెలవులు వచ్చాయంటూ కామెంట్లు పెడుతున్నారు. ఈ వారం లాంగ్ వీకెండ్ అని పేర్కొంటున్నారు.
దీంతో ఇప్పుడు ట్విటర్లో #Microsoft హ్యాష్ట్యాగ్ ట్రెండ్ అవుతోంది. అంతేకాకుండా.. మైక్రోసాఫ్ట్ హాలిడే మూడ్లో ఉందని పేర్కొన్నారు. ఐటీ ఉద్యోగులు ఆఫీస్ నుంచి ముందుగానే లాగ్ అవుట్ చేయడానికి ఇప్పుడు ఒక బలమైన కారణం దొరికిందంటూ మీమ్స్ చేస్తున్నారు.
ఈ క్రమంలోనే ప్రపంచవ్యాప్తంగా ఉన్న ఐటీ ఉద్యోగులు తమ మనసుల్లో థ్యాంక్యూ మైక్రోసాఫ్ట్ అని అనుకుంటున్నారని నెటిజన్లు పోస్ట్లు పెడుతున్నారు. ఇక మూడు రోజులు సెలవులే కదా.. ఎటైనా ట్రిప్ వేద్దాం అంటూ ఐటీ ఉద్యోగులు ప్లాన్లు వేసుకుంటున్నారని మీమ్స్ పేలుస్తున్నారు. ఈ క్రమంలోనే ట్విటర్, స్పేస్ ఎక్స్ అధినేత ఎలాన్ మస్క్ కూడా.. మైక్రోసాఫ్ట్ విండోస్ టెక్నికల్ సమస్యపై తనదైన రీతిలో స్పందించారు. మైక్రోసాఫ్ట్.. మాక్రోహార్డ్గా మారిందంటూ ఎలాన్ మస్క్ వ్యంగ్యాస్త్రాలు సంధించారు.
ఇక మైక్రోసాఫ్ట్ క్లౌడ్ సర్వీసుల్లో ఏర్పడిన టెక్నికల్ సమస్య తలెత్తడంతో ప్రపంచ వ్యాప్తంగా అనేక వ్యాపారాలు, బ్యాంక్లు, ఎయిర్లైన్స్ సంస్థలపై కార్యకలాపాలపై తీవ్ర ప్రభావం ఏర్పడింది. దీంతో పలు కంపెనీలు తమ సంస్థ సేవా కార్యకలాపాల్లో ఏర్పడిన అంతరాయాలపై కస్టమర్లకు క్షమాపణలు చెబుతున్నాయి. ప్రపంచవ్యాప్తంగా అనేక మంది విండోస్ యూజర్లకు ఈ టెక్నికల్ సమస్య కారణంగా వారి డెస్క్ టాప్పై బ్లూ స్క్రీన్లు కనిపిస్తున్నాయి. అయితే క్రౌడ్ స్ట్రయిక్ అప్డేట్ కారణంగానే ఈ సమస్య ఏర్పడినట్లు మైక్రోసాఫ్ట్ సంస్థ వెల్లడించింది. వీలైనంత త్వరగా ఈ సమస్యను పరిష్కరించనున్నట్లు తెలిపింది.
|
|