వాటిపై జీఎస్టీ వసూళ్ల,,,, నిర్మలమ్మకు మమతా బెనర్జీ లేఖ

హెల్త్, లైఫ్ ఇన్సూరెన్స్‌లపై 18 శాతం జీఎస్టీ వసూలు చేయనున్నట్లు కేంద్ర బడ్జెట్ లో చేసిన ప్రకటనపై సర్వత్రా తీవ్ర విమర్శలు వెల్లువెత్తుతున్నాయి. ఇప్పటికే ఈ ఇన్సూరెన్స్‌లపై జీఎస్టీ వేసే నిర్ణయాన్ని వెనక్కి తీసుకోవాలని కేంద్రమంత్రి నితిన్ గడ్కరీ.. కేంద్ర ఆర్థిక శాఖ మంత్రి నిర్మలా సీతారామన్‌కు విజ్ఞప్తి చేసిన విషయం తెలిసిందే. తాజాదా తృణముల్ కాంగ్రెస్ అధినేత్రి, పశ్చిమ బెంగాల్ ముఖ్యమంత్రి మమతా బెనర్జీ కూడా స్పందించారు. ఇది ప్రజా వ్యతిరేక నిర్ణయమని.. వెంటనే ఈ నిర్ణయాన్ని కేంద్ర ప్రభుత్వం వెనక్కి తీసుకోవాలని డిమాండ్ చేశారు. ఇదే విషయంపై కేంద్రమంత్రి నిర్మలా సీతారామన్‌కు దీదీ లేఖ రాశారు.

జీవిత, ఆరోగ్య బీమా పాలసీలు, ప్రీమియంపై జీఎస్టీని ఉపసంహరించాలని మమతా బెనర్జీ పేర్కొన్నారు. వీటిపై 18 శాతం పన్నును విధిస్తున్నట్లు బడ్జెట్‌ ప్రసంగంలో కేంద్ర ఆర్థిక మంత్రి నిర్మలా సీతారామన్ ప్రకటించడాన్ని దీదీ తీవ్రంగా విమర్శించారు. ఈ నిర్ణయాన్ని సమీక్షించాలని కోరుతూ కేంద్ర ఆర్థిక శాఖ మంత్రి నిర్మలా సీతారామన్‌కు లేఖ రాశారు. ఊహించని కష్ట సమయాల్లో ఆర్థిక భద్రత అందించడమే.. జీవిత, ఆరోగ్య ఇన్సూరెన్స్‌ ప్రాథమిక లక్ష్యమని ఆమె తెలిపారు. అలాంటి సమయాల్లో వ్యక్తులు, వారి కుటుంబాలు కష్టాలను తట్టుకునేలా చేయడంలో ఇలాంటి పాలసీలు కీలక పాత్ర పోషిస్తాయని మమతా బెనర్జీ గుర్తు చేశారు.

అలాంటి బీమా పాలసీలు, ప్రీమియంపై 18 శాతం జీఎస్టీ విధించడం అంటే సామాన్య ప్రజలపై ఆర్థిక భారాన్ని పెంచుతుందని ఈ సందర్భంగా సీఎం మమతా బెనర్జీ తీవ్ర ఆందోళన వ్యక్తం చేశారు. అదనపు భారం వల్ల చాలా మంది జనం.. కొత్త పాలసీలు తీసుకోకుండా ఉంటారని.. ఒక వేళ ఇప్పటికే బీమా తీసుకున్న వారు.. వాటి ప్రీమియంలు చెల్లించకుండా ఉండే అవకాశం ఉందని తెలిపారు. ఇలాంటి సమయంలో ఏదైనా అనుకోని ప్రమాదం సంభవిస్తే వారు ఆర్థిక ఇబ్బందులకు గురవుతారని పేర్కొన్నారు. ఈ నేపథ్యంలోనే బీమా పాలసీలు, ప్రీమియంపై జీఎస్టీ విధింపు నిర్ణయాన్ని సమీక్షించాలని లేఖలో నిర్మలమ్మను కోరారు. మరోవైపు పన్నులపై నిర్ణయం తీసుకునే జీఎస్టీ కౌన్సిల్ ఈ నెలలోనే సమావేశం కానుంది.

ఇక జీవిత, వైద్య బీమా పథకాల ప్రీమియంలపై విధించిన జీఎస్టీని ఉప సంహరించుకోవాలని కేంద్ర మంత్రి, బీజేపీ సీనియర్ నేత నితిన్ గడ్కరీ ఇప్పటికే ఆర్థిక మంత్రి నిర్మలా సీతారామన్‌కు లేఖ రాయడం గమనార్హం. మహారాష్ట్రలోని నాగ్‌పూర్ డివిజనల్.. ఎల్ఐసీ ఎంప్లాయీస్ యూనియన్ నుంచి వచ్చిన విజ్ఞప్తి మేరకు నితిన్ గడ్కరీ ఈ లేఖ రాశారు.