స్విగ్గీ, జొమాటోలకు పోటీగా కొత్త యాప్,,,,10 నిమిషాల్లో ఫుడ్ డెలివరీ

మనం ఎక్కడ ఉన్నా.. ఆకలి అయిందంటే చాలు.. చేతిలో ఉన్న సెల్‌ఫోన్‌లో ఆర్డర్ చేస్తే.. మన వద్దకే ఫుడ్ వస్తుంది. ఫుడ్ డెలివరీ యాప్‌లు ఎన్ని ఉన్నా స్విగ్గీ, జొమాటో, ఉబర్ లాంటి కొన్ని సంస్థలు మాత్రమే కస్టమర్లకు బాగా పరిచయం. ఆఫీస్, ఇల్లు, అవుట్ స్టేషన్.. ఇలా ఎక్కడ ఉన్నా ఈ యాప్‌లలో బుక్ చేస్తే.. మనకు ఇష్టమైన ఫుడ్ వచ్చి చేరుతుంది. ఇక మనకు నచ్చిన వంటకం, నచ్చిన రెస్టారెంట్ నుంచి ఫుడ్ ఆర్డర్ చేసుకోవాలంటే కొన్నిసార్లు చాలా సమయం పడుతుంది. ఫుడ్ ఆర్డర్ చేసిన తర్వాత డెలివరీ కావడానికి అరగంట నుంచి గంట సేపు వెయిట్ చేయాల్సిందే. ఈ క్రమంలోనే తాజాగా వచ్చిన ఓ ఫుడ్ డెలివరీ యాప్.. ప్రస్తుతం సంచలన ప్రకటనతో సోషల్ మీడియాలో తెగ వైరల్ అవుతోంది. అయితే ఈ ప్రకటనపై సోషల్ మీడియాలో నెటిజన్ల నుంచి రకరకాల అభిప్రాయాలు వ్యక్తం అవుతున్నాయి.

కర్ణాటక బెంగళూరులో తాజాగా ఒక స్టార్టప్‌ కంపెనీ ప్రారంభం అయింది. స్విగ్గీ, జొమాటో లాంటి యాప్‌లకు పోటీగా స్విష్ అనే ఫుడ్ డెలివరీ యాప్‌ను మొదలు పెట్టారు. ఈ స్విష్ యాప్ గురించి దాని ఫౌండర్ ఉజ్వల్ సుఖేజా సోషల్‌ మీడియాలో పెట్టిన పోస్ట్‌ ఇప్పుడు తెగ వైరల్‌గా మారింది. తన ఫ్రెండ్స్‌తో కలిసి ఉజ్వల్ సుఖేజా ప్రారంభించిన స్టార్టప్‌ గురించి ట్విటర్ వేదికగా ఉజ్వల్ సుఖేజా ఒక పోస్ట్ పెట్టాడు. ఆన్‌లైన్‌లో ఫుడ్‌ ఆర్డర్‌ చేస్తే.. ఇప్పుడు ఉన్న ఫుడ్ డెలివరీ యాప్‌లు కస్టమర్‌కు ఆహారాన్ని అందించడానికి చాలా ఎక్కువ సమయం తీసుకుంటున్నాయని పేర్కొన్నాడు. అయితే ఆ సమయాన్ని తగ్గించేందుకే స్విష్‌ అనే ఫుడ్‌ డెలివరీ యాప్‌ను ప్రారంభించామని ఉజ్వల్ సుఖేజా తెలిపారు.

అయితే ఈ స్విష్ ఫుడ్ డెలివరీ యాప్‌లో ఫుడ్ ఆర్డర్‌ చేసినవారికి 10 నిమిషాల్లో.. ఆహార పదార్థాలను వారి వద్దకే డెలివరీ చేస్తామని ఉజ్వల్ సుఖేజా తేల్చి చెప్పాడు. దీంతో ఈ ప్రకటన కాస్తా సోషల్‌ మీడియాలో తెగ వైరల్ కావడంతో నెటిజన్లు తీవ్ర చర్చ ప్రారంభించారు. 10 నిమిషాల్లో ఫుడ్ డెలివరీ ఎలా చేస్తారు అంటూ కొందరు ప్రశ్నిస్తుంటే.. అలా చేస్తే మంచిదే అంటూ మరికొందరు కామెంట్లు చేస్తున్నారు. ప్రస్తుతం ఉన్న బిజీ బిజీ లైఫ్‌స్టైల్‌లో దేనికీ ఎక్కు సమయాన్ని కేటాయించలేకపోతున్నామని.. ఆర్డర్ చేసిన 10 నిమిషాల్లో ఫుడ్ డెలివరీ చేయాలి అనేది చాలా మంచి ఆలోచన అంటూ ఒక నెటిజన్‌ స్పందించాడు. అయితే ఇలా 10 నిమిషాల్లో డెలివరీ చేయాలంటే.. భోజనాన్ని ఆర్డర్‌ ఇవ్వడానికి ముందే వండి పెట్టుకోవాలని మరో నెటిజన్ తెలిపాడు.

అయితే 10 నిమిషాల్లోనే ఫుడ్‌ డెలివరీ చేస్తున్నారంటే ఆహారం తాజాగా తయారు చేసిందేనా లేక అంతకుముందే వండి పెట్టారా అనే ప్రశ్న కస్టమర్లకు అనుమానం వస్తుందని పేర్కొంటున్నారు. దాంతో ఈ యాప్ నుంచి బుక్ చేసుకోవడానికి వారు వెనకడుగు వేసే అవకాశం ఉంటుందని తెలిపారు. ఇలాంటి ఆలోచన స్విగ్గీ, జొమాటో లాంటి కంపెనీలకు రాలేదనుకుంటున్నారా అని మరికొందరు ప్రశ్నిస్తున్నారు.

అయితే ఇలాంటి 10 నిమిషాల డెలివరీ సాధ్యం కాని పని అంటూ మరో నెటిజన్‌ వ్యాఖ్యానించారు. అయితే ఇలా 10 నిమిషాల్లో ఫుడ్ డెలివరీ చేస్తామని గతంలో ఓసారి జొమాటో సరికొత్త ప్రయోగం చేసి ఫెయిల్ అయింది. 2022 మార్చిలో జొమాటో ఇన్‌స్టంట్ పేరుతో తీసుకువచ్చిన ఈ ప్రయోగం విఫలం అయింది. అయితే దానివల్ల లాభాలు రాకపోవడం పక్కనపెడితే.. రోజువారీ ఆర్డర్లు కూడా చాలా తక్కువ వచ్చాయి. దీంతో అలర్ట్ అయిన జొమాటో 2023 జనవరిలో ఆ సేవలను నిలిపివేసింది.