భారత్ చెప్పింది షేక్ హసీనా విని ఉంటే .. కొంపముంచిన ఆర్మీ చీఫ్

బంగ్లాదేశ్‌ ప్రధానమంత్రిగా తిరుగులేని నాయకురాలిగా పనిచేసిన షేక్ హసీనా.. ఇప్పుడు ఆశ్రయం కోసం ప్రపంచ దేశాల వైపు చూస్తున్నారు. కొన్ని దశాబ్దాలుగా బంగ్లాదేశ్ రాజకీయాల్లో చక్రం తిప్పిన ఆమె.. ఇప్పుడు సొంత దేశంలో తలెత్తిన సంక్షోభంతో గద్దె దిగడమే కాకుండా.. దేశాన్ని కూడా వదిలేసి పారిపోవాల్సిన దుస్థితి నెలకొంది. అయితే షేక్ హసీనాకు ఈ పరిస్థితి రావడానికి ఆమె తీసుకున్న కొన్ని నిర్ణయాలు కూడా కారణం అయ్యాయి. కొన్ని రోజుల క్రితమే బంగ్లాదేశ్ ఆర్మీ చీఫ్‌గా వకార్ ఉజ్ జమాన్‌ను.. షేక్ హసీనా నియమించారు. ఇప్పుడే అతడే ఆమెకు అల్టిమేటం జారీ చేసి.. దేశం విడిచి వెళ్లేందుకు కారణం అయ్యాడు. అయితే వకార్ ఉజ్ జమాన్ గురించి భారత్ ముందుగానే షేక్ హసీనాను హెచ్చరించినా ఆమె వినకుండా అతడ్ని సైనిక అధ్యక్షుడిగా నియమించడమే ఆమె కొంపముంచింది.

బంగ్లాదేశ్‌లో ప్రస్తుతం కొనసాగుతున్న అల్లర్లు, విధ్వంసం వెనక ఆర్మీ చీఫ్‌ వకార్ ఉజ్ జమాన్ ప్రధాన పాత్ర పోషించినట్లు తెలుస్తోంది. వకార్ ఉజ్ జమాన్ గురించి షేక్‌ హసీనాను భారత్‌ ముందే హెచ్చరించినా ఆమె వినలేదని సమాచారం. రిజర్వేషన్లకు వ్యతిరేకంగా దేశవ్యాప్తంగా విద్యార్థులు చేపట్టిన ఆందోళనలు కాస్తా తర్వాత రాజకీయ రంగు పులుముకున్నాయి. ఈ క్రమంలోనే ఆ ఆందోళనలను ఆపలేక షేక్‌ హసీనా ప్రధాని పదవికి రాజీనామా చేసి పరారీ కావడంతో బంగ్లాదేశ్‌లో సైనిక పాలన వచ్చింది. ఆర్మీ చీఫ్ జనరల్‌ వకార్‌ ఉజ్‌ జమాన్‌ నేతృత్వంలో ప్రస్తుతం బంగ్లాదేశ్‌ పాలన కొనసాగుతోంది.

ఇక నిరసనలు తీవ్ర హింసాత్మకంగా మారడంతో.. వాటిని అణిచివేయాల్సిన సైన్యమే ప్రధానిపైకి తిరగబడింది. ప్రధానమంత్రి పదవికి రాజీనామా చేయాలంటూ షేక్ హసీనాకు సైన్యం హెచ్చరికలు జారీ చేయడంతో ఆమెకు మరో గత్యంతరం లేకుండా పోయింది. కేవలం 45 నిమిషాల్లో ప్రధాని పదవి నుంచి దిగిపోయి.. పారిపోవాలని ఆర్మీ చీఫ్.. షేక్ హసీనాకు అల్టిమేటం జారీ చేయడంతో ఆమె పదవి నుంచి దిగిపోయి సోదరి షేక్‌ రెహానాతో కలిసి భారత్‌లోకి వచ్చారు. అయితే షేక్ హసీనా దేశం దాటిన వెంటనే ఆమె రాజకీయ ప్రత్యర్థి, మాజీ ప్రధాని ఖలీదా జియా జైలు నుంచి విడుదల చేయాలని అధ్యక్షుడు మహమ్మద్‌ షహబుద్దీన్‌ ఆదేశాలు జారీ చేయడం సంచలనంగా మారింది. ఈ పరిణామాలన్నీ చూస్తుంటే రిజర్వేషన్లపై విద్యార్థులు చేస్తున్న ఆందోళనలు రాజకీయ రంగు పులుముకొని చివరికి షేక్ హసీనాను గద్దె దింపేందుకు ఆమె ప్రత్యర్థులంతా ఏకమైనట్లు అర్థం అవుతోంది.

ఈ ఏడాది జూన్‌ 23 వ తేదీన బంగ్లాదేశ్ ఆర్మీ చీఫ్‌గా వకార్‌ ఉజ్‌ జమాన్‌‌ను ప్రధానమంత్రి షేక్ హసీనా నియమించారు. అయితే వకార్‌ ఉజ్‌ జమాన్‌‌ను ఆర్మీ చీఫ్‌ నియామకం విషయంలో షేక్ హసీనాను ఏడాది ముందే భారత్‌ హెచ్చరించినట్లు తెలుస్తోంది. చైనా అనుకూల వ్యక్తి అయిన వకార్ ఉజ్ జమాన్‌తో జాగ్రత్తగా వ్యవహరించాలని భారత జాతీయ భద్రతా మండలికి చెందిన కొందరు ఉన్నతస్థాయి అధికారులు.. షేక్ హసీనా ప్రభుత్వాన్ని అలర్ట్ చేసినట్లు విశ్వసనీయ వర్గాల ద్వారా తెలుస్తోంది. అయినా షేక్ హసీనా.. అతడ్నే సైనిక అధ్యక్షుడిగా నియామించడంతో.. చివరికి అతడే ఆమెకు అల్టిమేటం జారీ చేయడం సంచలనంగా మారింది.

58 ఏళ్ల వకార్‌ ఉజ్‌ జమాన్‌.. గత 40 ఏళ్లుగా బంగ్లాదేశ్ సైన్యంలో పనిచేస్తున్నారు. డిఫెన్స్‌ స్టడీస్‌లో మాస్టర్స్‌ డిగ్రీ పూర్తి చేసిన వకార్‌ ఉజ్‌ జమాన్‌.. గతంలో ప్రధానమంత్రి కార్యాలయం ఆధ్వర్యంలోని ఆర్మ్‌డ్‌ ఫోర్సెస్‌ విభాగంలో ప్రిన్సిపల్‌ స్టాఫ్‌ ఆఫీసర్‌గా బాధ్యతలు నిర్వర్తించారు. చీఫ్‌ ఆఫ్‌ జనరల్‌ స్టాఫ్‌గా విధులు చేపట్టారు. బంగ్లాదేశ్ ఆర్మీని ఆధునికీకరించడంలో వకార్‌ ఉజ్‌ జమాన్‌.. కీలక పాత్ర పోషించడంతో ఆర్మీ చీఫ్‌గా ఈ ఏడాది జూన్‌లో నియమితులయ్యారు. ఈ పదవిలో వకార్‌ ఉజ్‌ జమాన్‌ 3 ఏళ్ల పాటు పదవిలో ఉండనున్నారు. అయితే ఆర్మీ చీఫ్‌గా బాధ్యతలు చేపట్టిన నెల రోజులకే ప్రధాని షేక్ హసీనాను రాజీనామా చేయించి.. దేశం విడిచేలా వెళ్లడంలో కీలక పాత్ర పోషించారు. ఇక బంగ్లాదేశ్ ఆర్మీ మాజీ చీఫ్ ముస్తాఫిజుర్‌ రెహమాన్‌ కుమార్తెను వకార్ ఉజ్ జమాన్‌ వివాహం చేసుకోగా.. షేక్‌ హసీనాకు ముస్తాఫిజుర్‌ రెహమాన్‌ వరుసకు మామ అవుతారు.