టీడీపీలో చేరిన టీటీడీ మాజీ ఈవో ధర్మారెడ్డి మేనల్లుడు

ఉమ్మడి కర్నూలు జిల్లాలో వైఎస్సార్‌సీపీ సర్పంచ్ నాగిరెడ్డి టీడీపీలో చేరారు.. సర్పంచ్ చేరితో విశేషం ఏముంది అనుకుంటున్నారా.. నాగిరెడ్డి టీటీడీ మాజీ ఈవో ధర్మారెడ్డి మేనల్లుడని తెలుస్తోంది. మాజీ మంత్రి బైరెడ్డి రాజశేఖర్‌రెడ్డి సమక్షంలో నాగిరెడ్డి టీడీపీ కండువా కప్పుకున్నారు. నాగిరెడ్డి నంద్యాల జిల్లా జూపాడు బంగ్లా మండలం తర్తూరు గ్రామ సర్పంచ్‌గా ఉన్నారు. ఆయనతో పాటుగా ‌దాదాపు 150 కుటుంబాలు టీడీపీ కండువా కప్పుకున్నాయి. వారందరిని పార్టీలోకి ఆహ్వానిస్తున్నానని.. నియోజకవర్గ అభివృద్ధి కోసం అందరం కలిసి కట్టుగా పని చేద్దామని బైరెడ్డి రాజశేఖర్‌రెడ్డి పిలుపునిచ్చారు.

మాజీ ఎమ్మెల్యే బైరెడ్డి రాజశేఖర్‌రెడ్డి కీలక ప్రకటన చేశారు. నాగటూరు ఎత్తిపోతల పేజ్‌-1 నుంచి ప్రతి ఎకరాకు సాగు నీరు అందేలా కృషి చేస్తామని తెలిపారు. లక్ష్మాపురం అంచె సమీపంలో రైతులతో కలిసి నాగటూరు ఎత్తిపోతల నీటి కమిటీ ఎంపికపై సమావేశం నిర్వహించారు. ఈ ఎత్తిపోతల నుంచి ఎన్ని గ్రామాలకు నీరు అందాల్సి ఉందని అధికారులను అడిగారు. ఈ ఎత్తిపోతల నుంచి ఎందుకు పూర్తి స్థాయిలో నీరు అందడం లేదో రైతులను అడిగి సమస్యలు గురించి తెలుసుకున్నారు. నాగటూరు ఎత్తిపోతల నుంచి నీరు పారేందుకు కాలువలు లేకపోవడంతో పాటుగా నీటిని ఒక మోటార్‌ ద్వారా విడుదల చేయడంతో ఇబ్బందులు ఉన్నాయని రైతులు వివరించారు. అలాగే నీటి కమిటి నిర్వాహకుల ఇష్టానుసారంగా నీటిని విడుదల చేయడంతో పొలాలకు సక్రమంగా నీరు అందడం లేదని రైతులు బైరెడ్డి రాజశేఖర్ రెడ్డి దృష్టికి తీసుకువచ్చారు.

గత ప్రభుత్వంలో ఎత్తిపోతల పథకాలకు కమిటీ చైర్మన్‌గా ఉన్న వాళ్లు రైతుల నుంచి ఇష్టం వచ్చినట్లుగా డబ్బులు వసూళ్లు చేశారని బైరెడ్డి ఆరోపించారు. డబ్బులు వసూలు చేసినా.. రైతులకు నీరు అందజేసేందుకు ఎలాంటి పనులు చేపట్ట లేదన్నారు. మూడేళ్లుగా ట్రాన్స్‌ఫార్మర్‌ పనిచేయకున్నా.. మరమ్మత్తులు చేయడానికి కమిటీ సభ్యులు, అధికారులు ఎలాంటి చర్యలు తీసుకోకపోవడం దారుణం అన్నారు. ట్రాన్స్‌ఫార్మర్‌ను రిపేర్ చేయించి రెండు మోటార్ల ద్వారా నీటిని అందజేసేందుకు తన వంతుగా కృషి చేస్తానన్నారు బైరెడ్డి