రూ.3 కోట్ల విలువైన రేంజ్ రోవర్ కారు కొన్న సిరాజ్,,,తన కలల కారు ఇదేనని పోస్ట్

టీమిండియా స్టార్ పేసర్, హైదరాబాదీ క్రికెటర్ మహమ్మద్ సిరాజ్ తన కెంతో ఇష్టమైన లగ్జరీ కారు రేంజ్ రోవర్‌ను కొనుగోలు చేశాడు. ప్రస్తుతం భారత్ తరఫున అన్ని ఫార్మాట్‌లు ఆడుతున్న సిరాజ్.. శ్రీలంక పర్యటన తర్వాత దొరికిన విరామాన్ని కుటుంబంతో గడుపుతున్నాడు. ఈ క్రమంలోనే తన కుటుంబ సభ్యుల కోసం ఏకంగా రూ.3 కోట్లు విలువైన కారును కొనుగోలు చేశాడు. ల్యాండ్ రోవర్‌ కారును కొనుగోలుకు సంబంధించిన ఫొటోలను మహమ్మద్ సిరాజ్ సోషల్ మీడియా వేదికగా పంచుకున్నాడు. దేవుడి ఆశీర్వాదంతో తన కలల కారును సొంతం చేసుకున్నట్లు చెప్పుకొచ్చాడు సిరాజ్.

"కలలపై ఎలాంటి పరిమితులు ఉండవు. ఆ కలలే మీరు మరింత కష్టపడేలా ప్రోత్సాహాన్ని అందిస్తాయి. మంచి ఆలోచనతో మనం చేసే ప్రతీ ప్రయత్నం.. మనల్ని ముందుకు తీసుకెళ్తుంది. నా డ్రీమ్ కారును కొనుగోలు చేసేలా నాకు శక్తిని ఇచ్చిన భగవంతుడికి కృతజ్ఞతలు. నిన్ను నువ్వు నమ్ముకో. అనుకున్నది సాధిస్తావ్" అని మహమ్మద్ సిరాజ్ ఇన్‌స్టాలో పోస్టు చేశాడు. కాగా హైదరాబాద్‌లోని ఓ సాధారణ ఆటో డ్రైవర్ కొడుకుగా క్రికెట్ కెరీర్‌ను ప్రారంభించిన మహమ్మద్ సిరాజ్.. అసాధారణ ప్రదర్శనతో అంచెలంచెలుగా ఎదిగాడు. టీమిండియాలో నమ్మదగ్గ ప్లేయర్‌గా మారిపోయాడు. అన్ని ఫార్మాట్‌లలో ఆడుతూ జట్టు విజయాల్లో కీలక పాత్ర పోషిస్తున్నాడు. ఇటీవల వెస్టిండీస్, అమెరికా వేదికగా జరిగిన టీ20 ప్రపంచకప్‌ను గెలిచి భారత జట్టులో సిరాజ్ సభ్యుడిగా కూడా ఉన్నాడు. వన్డే ప్రపంచకప్ 2023, ప్రపంచ టెస్టు ఛాంపియన్ షిప్‌లో కూడా భారత్ తరఫున ఆడాడు. ఇటీవల టీ20 ప్రపంచకప్ గెలిచిన భారత జట్టుకు బీసీసీఐ రూ.125 కోట్లు ప్రైజ్ మనీ ప్రకటించిన విషయం తెలిసిందే. ఇందులో సిరాజ్‌కు రూ.5 కోట్లు దక్కాయి. దీంతో ఆ డబ్బుతోనే సిరాజ్ కారు కొని ఉంటాడని అంతా భావిస్తున్నారు.

కాగా ఇప్పటికే సిరాజ్ దగ్గర పలు ఖరీదైన కార్లు ఉన్నాయి. రూ.2.8 కోట్లు విలువైన రేంజ్ రోవర్ వాగ్యూ, రూ.1.86 కోట్ల విలువైన మెర్సిడెస్ బెంజ్ క్లాస్‌తో పాటు బీఎండబ్ల్యూ 5 సిరీస్, మహీంద్ర థార్ కార్లు ఉన్నాయి. ఐపీఎల్‌లో రాయల్ ఛాలెంజర్స్ బెంగళూరు తరఫున ఆడుతున్న సిరాజ్.. ఒక్కో సీజన్‌కు రూ. 7 కోట్ల చొప్పున వేతనం అందుకుంటున్నాడు. బీసీసీఐ సెంట్రల్ కాంట్రాక్టులో ఏ గ్రేడ్‌లో ఉన్న ఈ పేసర్‌కు.. రూ. 5 కోట్ల వార్షిక వేతనం లభిస్తోంది. మ్యాచ్ ఫీజులు, అలవెన్సులు అదనంగా వస్తాయి. అంతేకాకుండా యాడ్స్, ఇతర మార్గాల ద్వారా కూడా సిరాజ్‌ సంపాదిస్తున్నాడు. ఇవన్నీ కలుపుకుంటే అతడి వార్షిక ఆదాయం రూ.20 కోట్లుగా ఉంది. ప్రస్తుతం సిరాజ్ ఆస్తుల విలువ రూ.74 కోట్లుగా ఉన్నట్లు తెలుస్తోంది. టీమిండియాకు అందిస్తున్న సేవలను గుర్తించిన తెలంగాణ ప్రభుత్వం ఇటీవల గ్రూప్-1 ఉద్యోగంతో పాటు 600 గజాల అత్యంత ఖరీదైన ఇంటి స్థలాన్ని సిరాజ్‌కు ఇవ్వాలని నిర్ణయించింది.