చెప్పుతో కొట్టాడని.. టీడీపీ మాజీ సర్పంచ్ హత్య కేసులో కీలక విషయాలు

కర్నూలు జిల్లాలో జరిగిన టీడీపీ నేత శ్రీనివాసులు హత్య కేసులో కీలక వివరాలు వెల్లడయ్యాయి. పత్తికొండ నియోజకవర్గం హోసూరులో తెలుగుదేశం పార్టీకి చెందిన మాజీ సర్పంచ్ శ్రీనివాసులను ఇటీవల దారుణంగా హత్య చేశారు. గ్రామ శివార్లలో కాపుకాచిన కొంతమంది వ్యక్తులు.. కళ్లల్లో కారం చల్లి వేటకొడవళ్లతో నరికి హత్య చేశారు. ఈ విషయం స్థానికంగా సంచలనం రేపింది. వైసీపీ కార్యకర్తలే శ్రీనివాసులను హత్య చేశారంటూ ఆరోపణలు వ్యక్తమయ్యాయి. టీడీపీ శ్రేణులు సైతం దీనిపై ఆందోళనకు దిగాయి. స్వయంగా మంత్రి నారా లోకేష్ సైతం ఈ విషయమై స్పందించారు. సార్వత్రిక ఎన్నికల్లో టీడీపీ తరుఫున పనిచేశారనే కోపంతోనే శ్రీనివాసులను హత్య చేశారంటూ నారా లోకేష్ ఆరోపించారు. హత్య చేసిన వారిని ప్రభుత్వం కఠినంగా శిక్షిస్తుందని.. శ్రీనివాసులు కుటుంబానికి అండగా ఉంటామంటూ ట్వీట్ చేశారు.

అయితే ఈ ఘటనతో హోసూరులో ఉద్రిక్త పరిస్థితులు ఏర్పడ్డాయి. దీంతో ముందుజాగ్రత్త చర్యగా పోలీసులు పికెటింగ్ కూడా ఏర్పాటు చేశారు. గ్రామంలో ఘర్షణలు తలెత్తకుండా భద్రతా ఏర్పాట్లు చేశారు. ఈ ఘటనపై కేసు నమోదు చేసి దర్యాప్తు సాగిస్తున్న పోలీసులు.. కీలక పురోగతి సాధించారు. హత్యకు గురైన టీడీపీ మాజీ సర్పంచ్ శ్రీనివాసులకు.. రిటైర్డ్ హెడ్ కానిస్టేబుల్ నర్సింహులకు మధ్య గత కొంతకాలంగా విబేధాలు ఉన్నట్లు గుర్తించారు. రాజకీయ ఆధిపత్యం కోసం ఇద్దరి మధ్య గొడవలు జరిగినట్లు తెలుస్తోంది. ఈ క్రమంలోనే ఓ సందర్భంలో శ్రీనివాసులు నరసింహులను చెప్పుతో కొట్టినట్లు తెలిసింది. దీంతో నరసింహులు శ్రీనివాసులపై కక్ష, కోపం పెంచుకున్నట్లు తెలిసింది.

మరోవైపు ఏపీలో కూటమి ప్రభుత్వం అధికారంలోకి రావటంతో శ్రీనివాసులకు వ్యవసాయ సహకార సంఘం ఛైర్మన్ పదవి ఇస్తారంటూ ఆ ఊర్లో ప్రచారం జరుగుతూ వచ్చింది. దీంతో ఈ విషయాన్ని జీర్ణించుకోలేకపోయిన నరసింహులు.. శ్రీనివాసులను హత్య చేయించినట్లు పోలీసులు గుర్తించారు. పగతో పాటు రాజకీయంగా ఎదుగుతున్నాడనే అసూయతో మరో నలుగురి సాయంతో.. బహిర్భూమికి వెళ్ళిన శ్రీనివాసులుపై వేటకొడవళ్లతో దాడి చేసి హత్య చేసినట్లు పోలీసులు గుర్తించారు. ఇక పోలీసులకు దొరకకూడదనే ఉద్దేశం కారంపొడి చల్లినట్లు తేలింది. ఈ ఘటనలో ఇద్దరు మైనర్లు కూడా ఉన్నట్లు తెలుస్తోంది. మొత్తానికి నాలుగు రోజుల కిందట కర్నూలు జిల్లాలో సంచలనం రేపిన శ్రీనివాసులు హత్యకేసు మిస్టరీని పోలీసులు ఛేదించారు.