చివరి నంబర్లు మార్చి,,,తిరుమల శ్రీవారి దర్శనం టికెట్ల కోసం తమిళనాడు భక్తుల అతి తెలివి.. , ప్లాన్ రివర్స్

తిరుమల శ్రీవారి దర్శనాలకు సంబంధించి టీటీడీ కీలక ప్రకటన చేసింది. తిరుమల శ్రీ వెంకటేశ్వర స్వామి వారి దర్శనార్థం భక్తులు టీటీడీ అధికారిక వెబ్సైట్ https://ttdevasthanams.ap.gov.in ద్వారా మాత్రమే ఆన్లైన్‌లో తమ ఆధార్ కార్డ్ నంబర్, చిరునామాతో టికెట్లు బుక్ చేసుకోవాలని సూచించింది. దర్శనం కోసం దళారులను ఆశ్రయించి తమ దర్శన టికెట్లు నష్టపోవద్దని టీటీడీ మరోసారి విజ్ఞప్తి చేసింది.

  గురువారం ఉదయం తమిళనాడుకు చెందిన నలుగురు భక్తులు తిరుమల శ్రీవారి కళ్యాణోత్సవానికి నకిలీ టికెట్లతో వైకుంఠంలోనికి ప్రవేశించారు. వీరిని టీటీడీ విజిలెన్స్ అధికారులు గుర్తించి ప్రశ్నించగా మొత్తం తమిళనాడులో డొంక కదిలింది. వేలూరు జిల్లా తిరుపత్తూరులో ఇంటర్నెట్ సెంటర్ నిర్వాహిస్తున్న అన్నాదురై పాస్ పోర్ట్‌లోని చివరి నెంబర్లు మార్చి ఆన్ లైన్ లో కళ్యాణోత్సవం టికెట్లు బుక్ చేసి, అధిక ధరలకు విక్రయించినట్లు వారు తెలిపారు. వెంటనే టీటీడీ విజిలెన్స్ అధికారులు సదరు వ్యక్తులపై పోలీసులకు ఫిర్యాదు చేసి కేసు నమోదు చేయించారు.

కొంతమంది దళారులు తాము దర్శనం టికెట్లు బుక్ చేయిస్తామని భక్తుల నుంచి ఎక్కువ మొత్తం వసూలు చేస్తున్నారని టీటీడీ విజిలెన్స్‌ అధికారులకు ఫిర్యాదులు అందుతున్నాయి. ప్రస్తుత టీటీడీ యాజమాన్యం దళారుల ఏరివేత పట్ల అకుంఠిత దీక్షతో ఉందని.. దర్శనాల కోసం భక్తులు దళారులను ఆశ్రయించి ఇబ్బందులకు గురికావొద్దని టీటీడీ సూచించింది. భక్తులు పొందిన టికెట్లను, టీటీడీ విజిలెన్స్ సిబ్బంది దర్శనానికి వెళ్లే ముందు మరోసారి తనిఖీ చేస్తారని తెలిపారు. ఆ సమయంలో వారు పొందిన టికెట్లు నకిలీగా తేలితే భక్తులు అనవసరమైన ఇబ్బందులు గురికావాల్సి వస్తుందన్నారు. స్వామివారి దర్శనం టికెట్లు, సేవా టికెట్లతో వ్యాపారం చేసే దళారులపై కఠిన చర్యలు తీసుకుంటామని టీటీడీ మరోసారి హెచ్చరించింది.

ఇటీవల కాలంలో తిరుమల శ్రీవారి దర్శనం, ఆర్జిత సేవల నకిలీ టికెట్ల గుట్టురట్టు చేస్తున్నారు విజిలెన్స్ అధికారులు. ఇటీవల కాలంలో తమిళనాడు, కర్ణాటక, ఏపీకి చెందని పలువురు నకిలీ టికెట్లతో తిరుమల క్యూలైన్లలోకి వచ్చి విజిలెన్స్ సిబ్బందికి అడ్డంగా దొరికిపోయారు. దీంతో టీటీడీ విజిలెన్స్ అలర్ట్ అయ్యింది.. నకిలీ టికెట్లతో వచ్చేవారిపై నిఘా పెంచింది. భక్తులు కూడా దళారుల విషయంలో జాగ్రత్తగా ఉండాలని హెచ్చరించింది.. టీటీడీ అధికారిక వెబ్‌సైట్‌లోనే దర్శనం, ఆర్జిత సేవల టికెట్లు బుక్ చేసుకోవాలని.. దళారుల్ని నమ్మి మోసపోవద్దని పదే, పదే చెబుతోంది. కానీ కొందరు మాత్రం దళారుల్ని నమ్మి మోసపోతున్నారు.. అనవసరంగా కేసుల్లో కూడా ఇరుక్కుంటున్నారు. అందుకే టీటీడీ మరోసారి భక్తుల్ని హెచ్చరించింది.. నకిలీ టికెట్లతో కోరి కష్టాలు తెచ్చుకోవద్దని, కేసుల్లో ఇరుక్కోవద్దని సూచిస్తోంది.