తిరుమల శ్రీవారి సేవలో గోల్డెన్ గయ్స్,,,,వారి ఒంటిపై కిలోల కొద్ది బంగారం

తిరుమలలో కొలువై ఉన్న కలియుగ ప్రత్యక్ష దైవం శ్రీవారి దర్శనం కోసం నిత్యం వేలాదిమంది భక్తులు వస్తుంటారు. వీరిలో సామాన్యుల నుంచి అత్యంత ధనికుల వరకు అందరూ స్వామివారి సేవలో పాల్గొంటారు. అయితే మహిళు ఒంటిపై బంగారంతో స్వామిని దర్శించుకుంటారు. అయితే ఇప్పుడు మగవాళ్లు కూడా ఒంటిపై బంగారంతో ప్రత్యక్షమవుతున్నారు.. అది కూడా ఒంటిపై కేజీల కొద్ది బంగారంతో వస్తున్నారు. ఇటీవల కాలంలో ఇది కూడా ఓ ఫ్యాషన్ అయ్యింది.

ఇవాళ ఉదయం విఐపీ దర్శన సమయంలో తిరుమల శ్రీవారిని పుణెకు చెందిన గోల్డ్ బాయ్స్, సన్నీ నన వాగ్చోరీ , సంజయ్ దత్తత్రయ గుజర్ , ప్రీతి సోనిలు దర్శించుకుని మొక్కులు చెల్లించుకున్నారు. వీళ్ల ఒంటిపై ఉన్న బంగారాన్ని చూసి భక్తులు నోరెళ్లబెట్టారు. వీరు దర్శనం తర్వాత ఆలయం బయటకు రాగా.. వీరిని చూడటానికి, ఫోటోలు దిగడానికి భక్తులు ఎగబడ్డారు. వీరు ధరించిన ఆభరణాలు దాదాపు 10 కేజీలు ఉంటుందని చెబుతున్నారు.. ఈ బంగారం ధర రూ.కోట్లలో ఉంటుందని చెబుతున్నారు. కేజీల కొద్దీ బంగారాన్ని ఒంటిపై దిగేసుకుని రావడంతో ఈ ముగ్గుర్ని మిగతా భక్తులు కళ్లు పెద్దవి చేసి మరీ చూశారు. మెడలో తాళ్ల సైజులో గొలుసులు, చేతికి కడియాలు, ఉంగరాలు ఉన్నాయి.

గతేడాది కూడా మహారాష్ట్ర నుంచి ఓ కుటుంబం కూడా ఇలాగే బంగారంతో సందడి చేశారు. మహారాష్ట్రకు చెందిన సుభాష్ చంద్ర, సోనీ కుటుంబం స్వామివారి దర్శనానికి వచ్చారు. వీరు వేంకటేశ్వర స్వామి ప్రతిమలతో కూడిన బంగారు ఆభరణాలతో కనిపించారు. వీరిని చూసేందుకు భక్తులు ఉత్సాహం చూపించారు. వీరికి వేంకటేశ్వరస్వామి ఇలవేల్పు.. అందుకే ఎప్పుడు తిరుమల వచ్చినా సరే.. ఇలా స్వామి, అమ్మవార్ల ప్రతిమలతో కూడిన బంగారు ఆభరణాలను ధరించి దర్శనానికి వస్తారట. ఈ ఆభరణాలను కూడా వారి పూర్వీకులు తయారు చేయించారని చెబుతున్నారు. మొత్తం మీద ఈ గోల్డ్ బాయ్స్‌తో పాటూ ఏపీ, తెలంగాణకు చెందిన పలువురు గోల్డ్ మ్యాన్స్ కూడా గతంలో తిరుమలలో సందడి చేశారు.

తిరుమల శ్రీవారిని పలువురు ప్రముఖులు దర్శించుకున్నారు. ఉదయం వీఐపీ దర్శన సమయంలో.. ఏపీ హైకోర్టు న్యాయమూర్తి జస్టిస్ శ్యాంసుందర్, అనంతపురం టీడీపీ ఎంపీ అంబికా లక్ష్మీనారాయణ వాల్మీకి, తెలంగాణ స్టేట్ మాజీ ఎలక్షన్ కమిషనర్ ఐఏఎస్ పార్థసారథి, తెలంగాణ ఎమ్మెల్యే ధన్‌పాల్‌ సూర్యనారాయణ గుప్తాలు స్వామివారిని దర్శించుకొని మొక్కులు చెల్లించుకొన్నారు. దర్శనం అనంతరం రంగనాయకుల మండపంలో వేదపండితులు వేదాశీర్వచనం అందించగా.. ఆలయ అధికారులు శ్రీవారి తీర్థప్రసాదాలు అందజేసి పట్టువస్త్రంతో సత్కరించారు. ఇటు తిరుమలలో భక్తుల రద్దీ కొనసాగుతోంది.