చోరీకి వెళ్లిన దొంగ.. ప్రాణాలే పోయాయి

ఓ ఇంట్లో చోరీకి వెళ్లిన దొంగకు ఊహించని పరిణామం ఎదురైంది..దొరికిపోతోనన్న భయంతో భవనంపై నుంచి దూకేయడంతో ప్రాణాలే పోయాయి. అనంతపురం త్రీ టౌన్ పోలీస్‌స్టేషను పరిధిలో జరిగిన ఘటన తీవ్ర విషాదాన్ని నింపింది. బుక్కరాయసముద్రం మండలం చదల్లకు చెందిన రాగే వీరనారప్ప పల్లెల్లోకి వెళ్లి గుజిరీ సామాగ్రి సేకరించి వాటిని విక్రయించేవాడు. ఆ డబ్బులతో జల్సాలకు అలవాటుపడ్డాడు.. మద్యానికి బానిసైన వీరనారప్ప చోరీలు కూడా మొదలు పెట్టాడు.

వీరనారప్ప గురువారం తెల్లవారుజామున అనంతపురం నగరం శ్రీనివాసనగర్‌లో ఓ మూడంతస్తుల భవనంలో చోరీకి వెళ్లాడు. ఓ గదిని కియా పరిశ్రమలో పనిచేస్తున్న ఉద్యోగులు అద్దెకు తీసుకున్నారు.. వారుంటున్న గది తలుపు పగలగొట్టిన వీరనారప్ప లోపలికి వెళ్లాడు. ఈలోపు ఆ గదిలో ఉంటున్న ఉద్యోగులు రాత్రి విధులు ముగించుకుని వచ్చారు.. మెట్లపై వస్తున్నట్లుగా వారి బూట్ల చప్పుడు పసిగట్టాడు. తాను ఎక్కడ దొరికిపోతానన్న భయంతో అక్కడి నుంచి బయటకు పరుగులు తీశాడు.

వీరనారప్ప ఆ ఇంటి వెనుక నుంచి కిందికి దిగాలని ప్రయత్నించాడు.. ఈ క్రమంలో పక్కనున్న ఖాళీ స్థలంలోకి దూకాడు. అయితే అక్కడ బండరాళ్లు ఉండటంతో తలకు గాయాలు కావంతో అక్కడికక్కడే ప్రాణాలు కోల్పోయాడు. వెంటనే స్థానికులు పోలీసులకు సమాచారం ఇవ్వగా.. ఘటనాస్థలికి చేరుకున్న పోలీసులు కేసు నమోదు చేసుకుని మృతదేహాన్ని పోస్టుమార్టం నిర్వహించిన తర్వాత మృతుని కుటుంబ సభ్యులకు అప్పగించారు.

మరోవైపు కుందుర్పిలో ఓ వ్యక్తి బావిలో పడిపోయాడు. బోయ రంగస్వామి ఆరు నెలల నుంచి తీవ్ర అనారోగ్యంతో బాధపడుతున్నాడు.. కుటుంబ సభ్యులు ఆస్పత్రులకు తీసుకెళ్లి వైద్యం చేయించారు. రంగస్వామి ఆరోగ్యం కాస్త కుదుట పడటంతో నెల రోజులుగా ఇంటి దగ్గరే ఉండి విశ్రాంతి తీసుకుంటున్నాడు. బుధవారం బయటికి వెళ్లి వస్తానని చెప్పి వెళ్లి తిరిగి ఇంటికి రాలేదు.. రంగస్వామి కోసం కుమారుడు గాలించినా ఆచూకీ దొరకలేదు. గురువారం ఉదయం పొలాలకు వెళ్లిన రైతులకు బావిలో రంగస్వామి శవం కనిపించింది.. వెంటనే పోలీసులకు సమాచారమిచ్చారు. పొలం దగ్గరకు వెళ్లి ప్రమాదవశాత్తు బావిలో పడి చనిపోయినట్లు తెలుస్తోంది.