ఐదు ఉద్యోగాలు సాధించిన అద్దంకి యువతి

ప్రైవేట్ ఉద్యోగమైనా.. ప్రభుత్వ ఉద్యోగమైనా.. ఒక్కటైనా సాధిస్తే చాలని చాలా మంది భావిస్తుంటారు. అలాగే నచ్చిన కొలువు దక్కితే చాలని మరికొంత మంది ఆశలు పెట్టుకుంటూ ఉంటారు. కానీ ఒకటీ రెండు కాదు ఏకంగా ఐదు ఉద్యోగాలు సాధిస్తే .. ఏమనాలి.. వహ్వా అనాల్సిందే. అది కూడా అల్లాటప్పా ప్యాకేజీలతో కాదండోయ్.. మొదటిసారి ఎంపికైనా ఉద్యోగానికి దాదాపు నాలుగు రెట్లు అధికమైన ప్యాకేజీతో ఐదో ఉద్యోగం సొంతం చేసుకుందో అమ్మాయి. ఇవన్నీ ఏళ్ల వ్యవధిలో అనుకుంటే పొరబాటే. కేవలం రోజుల వ్యవధిలోనే ఐదు సాఫ్ట్‌వేర్ కొలువులను సొంతం చేసుకుని శెభాష్ అనిపించుకుంటోంది బాపట్ల జిల్లా అద్దంకికి చెందిన ఓ యువతి.

ఇక వివరాల్లోకి వెళ్తే.. బాపట్ల జిల్లా అద్దంకి మండలం బొమ్మనంపాడుకు చెందిన చిరంజీవి, భాగ్యలక్ష్మి దంపతులకు ఓ కుమార్తె, ఓ కుమారుడు సంతానం. కూతురు శ్రావణి చిన్నప్పటి నుంచి చదువుల్లో మెరిక. అందుకే వ్యవసాయ కుటుంబమైనప్పటికీ కుమార్తెను ఉన్నత చదువులు చదివించారు. అద్దంకిలో పదో తరగతి చదివిన శ్రావణి.. ఆ తర్వాత గుంటూరు‌లో ఇంటర్మీడియట్ చదివింది. అనంతరం ఎంసెట్ రాసి ఇంజనీరింగ్ విభాగంలో ఆరువేల ర్యాంకు సాధించింది. ఈ ర్యాంక్ ఆధారంగా పెదకాకాని మండలంలోని వీవీఐటీ కాలేజీలో సీఎస్‌సీ బ్రాంచిలో చేరింది. అక్కడే ఫైనల్‌ ఇయర్ చదువుతున్న సమయంలో జరిగిన క్యాంపస్ ఇంటర్వ్యూలలో అసెన్‌చ్యూర్ కంపెనీలో తొలిసారిగా ఉద్యోగం సాధించింది. ఏడాదికి రూ.4.5 లక్షల వేతనంతో ఉద్యోగం సాధించింది.

ఆ తర్వాత ఓడో కంపెనీలో ఉద్యోగం సాధించింది శ్రావణి. వార్షిక వేతనం రూ.5 లక్షలు. అయితే అక్కడితో ఆగిపోక.. ఐబీఎం సంస్థలో రూ.9 లక్షల వార్షిక వేతనంతో మరో ఐటీ జాబ్ కొట్టింది. ఆ తర్వాత ఫ్లిప్‌కార్ట్‌ సంస్థలో రూ.11 లక్షలు, చివరగా వాల్‌మార్ట్‌లో రూ.23 లక్షల వార్షిక వేతనంతో ఉద్యోగం సాధించింది. దీంతో ఐదు ఉద్యోగాలు సాధించిన శ్రావణిని అందరూ మెచ్చుకుంటున్నారు. లక్ష్యంతో ముందుకెళ్తే అనుకున్నది సాధించవచ్చని నిరూపించిందని అభినందిస్తున్నారు.

అయితే శ్రావణి పట్టుదల వెనుకున్న కారణం తెలిస్తే ఆశ్చర్యపోతారు. తల్లిదండ్రులకు సత్కారం చేయించాలనే పట్టుదలతోనే కృషిచేసినట్లు చెప్తోంది. తమ కాలేజీలో ఒకే విద్యార్థి మూడు ఉద్యోగాలు సాధిస్తే వారి తల్లిదండ్రులను సన్మానిస్తారంటున్న శ్రావణి.. అలాంటి సత్కారాన్ని తన తల్లిదండ్రులు కూడా పొందాలనే లక్ష్యంతోనే కష్టపడినట్లు చెప్తున్నారు. అందుకే మంచి సంస్థల్లో ఉద్యోగాలు వచ్చినప్పటికీ మెరుగైన ప్యాకేజీ కోసం ప్రయత్నించినట్లు చెప్పింది.