వడపావ్ కోసం ఆగితే..పట్టపగలు, నడిరోడ్డుపై

వడపావ్ తిందామని.. ఓ వృద్ధ దంపతులు ఓ హోటల్ ముందు ఆగడమే పాపం అయింది. స్కూటీపైన రూ. 5 లక్షల విలువైన బంగారు నగలను తీసుకెళ్తుండగా గమనించిన కొందరు ముఠా వారిని వెంబడించారు. ఈ క్రమంలోనే వడపావ్ కోసం వృద్ధుడు హోటల్ లోకి వెళ్లగా.. ఆ వృద్ధురాలు మాత్రం ఆ స్కూటీ పక్కనే నిలబడి ఉంది. ఇద్దరు దొంగలు.. ఆమెను ఏమార్చి.. ఆ నగల సంచితో ఉడాయించారు. అయితే అది గమనించిన వృద్ధురాలు కేకలు వేయగా.. అప్పటికే వారు పరారయ్యారు.

పట్టపగలే నడిరోడ్డుపై షాకింగ్ సంఘటన చోటు చేసుకుంది. రూ.5 లక్షల విలువైన నగలతో ఇద్దరు వృద్ధులు స్కూటీపై వెళ్తుండగా.. వారిని ఓ ఇద్దరు దొంగలు కనిపెట్టారు. వారి దగ్గరి నుంచి ఎలాగైనా ఆ బంగారు ఆభరణాలను కొట్టేయాలని పథకం రచించారు. అనుకున్నదే తడవుగా వారిని వెంబడించారు. వారు ఎక్కడికి వెళ్తున్నారో గమనించి వారి వెనకాలే వెళ్లారు. చివరికి ఆ వృద్ధ దంపతులు స్కూటీ ఆపడం చూసి.. అక్కడ తమ ప్లాన్‌ను అమలు చేశారు. కట్ చేస్తే.. వృద్ధ దంపతుల వద్ద ఉండాల్సిన రూ.5 లక్షల విలువైన నగల సంచి కాస్తా.. దొంగల చేతుల్లో పడింది. దీంతో వారు అక్కడి నుంచి పరారయ్యారు. అయితే ఈ దొంగతనం దృశ్యాలు కాస్తా.. అక్కడే ఉన్న సీసీటీవీ కెమెరాల్లో రికార్డ్ కావడంతో వారి బండారం బయటపడింది.

మహారాష్ట్రలోని పూణేలో గురువారం మధ్యాహ్నం జరిగిన ఈ సంఘటన అక్కడ ఉన్నవారిని షాక్‌కు గురి చేసింది. గురువారం మధ్యాహ్నం సమయంలో ఇద్దరు వృద్ధ దంపతులు.. బ్యాంకులో ఉన్న నగలను విడిపించి ఇంటికి తీసుకెళ్తున్నారు. అయితే నగలతోపాటు బ్యాంకు పేపర్లను వారి స్కూటీ ముందు భాగంలో ఓ సంచీలో పెట్టి ప్రయాణిస్తున్నారు. ఈ క్రమంలోనే వారిని ఇద్దరు దుండగులు ముందు నుంచీ గమనిస్తూ వస్తున్నారు. సరైన సమయం చూసి వారిదగ్గర ఆ నగల సంచీని దొంగిలించాలని ప్లాన్ వేశారు. దీంతో వారి వెంటే ప్రయాణించారు.

అయితే బ్యాంకు నుంచి నేరుగా ఇంటికి పోకుండా.. మధ్యలో ఓ హోటల్ కనబడటంతో ఆ ఇద్దరు వృద్ధులు ఆగారు. వడపావ్ తినేందుకు వారి స్కూటీని అక్కడే ఆపగా.. వృద్ధురాలిని అక్కడే ఉంచి ఆ వృద్ధుడు హోటల్ లోపలికి వెళ్లాడు. సరైన సమయం కోసం ఎదురు చూస్తున్న ఇద్దరు దుండగుల్లో ఒకరు.. ఆ స్కూటీ పక్కనే నిలబడ్డాడు. మరో వ్యక్తి మాత్రం బైక్‌పై ముందుకు వెళ్లిపోయి మళ్లీ తిరిగి రాంగ్ రూట్‌లో వెనక్కి వచ్చాడు. అక్కడ ఏదో పడి ఉందని ఆ వృద్ధురాలికి చెప్పి ఆమె దృష్టిని మరల్చాడు. ఇంతలో మరో వ్యక్తి ఆ స్కూటీపై ఉన్న నగల సంచిని ఎత్తుకెళ్లిపోయాడు.

అయితే నగలు ఎత్తుకెళ్తున్నాడని గమనించిన ఆ వృద్ధురాలు.. అరవడం ప్రారంభించింది. దీంతో అక్కడ ఉన్న వారంతా ఒక్కసారిగా ఆమె దగ్గరికి వచ్చారు. ఆమె భర్త కూడా హోటల్ నుంచి పరిగెత్తుకుంటూ బయటికి వచ్చాడు. ఈ మొత్తం ఘటనకు సంబంధించిన దృశ్యాలు అక్కడే ఉన్న సీసీటీవీ ఫుటేజ్‌లో రికార్డ్ అయ్యాయి. ప్రస్తుతం ఆ వీడియో సోషల్ మీడియాలో తెగ వైరల్‌గా మారింది. ఆ సంచిలో రూ.5 లక్షల విలువైన నగలు, బ్యాంకు పత్రాలు, సెల్‌‌ఫోన్‌ ఉన్నట్లు బాధిత వృద్ధ జంట తెలిపింది. ఈ ఘటనపై పోలీసులకు ఫిర్యాదు చేయడంతో వారు కేసు నమోదు చేసి దర్యాప్తు చేపట్టారు. సీసీటీవీ ఫుటేజ్‌ ఆధారంగా ఆ ఇద్దరు దొంగలను పట్టుకునే ప్రయత్నం చేస్తున్నారు.