పట్టాలపైకి మరో 3 రైళ్లు, ఆ రూట్లలోనే

2019 లో తొలిసారి మన దేశంలో స్వదేశీ పరిజ్ఞానంతో అందుబాటులోకి వచ్చిన వందే భారత్ రైళ్లపై.. రైలు ప్రయాణికుల నుంచి మంచి స్పందన లభించింది. దీంతో కేంద్ర ప్రభుత్వం వరుసగా మరిన్ని వందే భారత్ రైళ్లను విడతల వారీగా ప్రవేశపెడుతూ వస్తోంది. ఈ నేపథ్యంలోనే ఇప్పటివరకు 51 వందే భారత్ రైళ్లు దేశంలోని వివిధ మార్గాల్లో నడుస్తున్నాయి. అయితే సాధారణ రైళ్లతో పోల్చితే ఈ వందే భారత్ రైళ్లలో ఛార్జీలు అధికంగా ఉన్నప్పటికీ.. అందులో ఉండే సౌకర్యాలు, వేగవంతమైన ప్రయాణం, ఇతర సదుపాయాలతో ప్రయాణికులు మాత్రం సంతోషం వ్యక్తం చేస్తున్నారు. ఈ క్రమంలోనే తాజాగా మరో 3 రైళ్లు పట్టాలు ఎక్కాయి. వర్చువల్‌గా నిర్వహించిన కార్యక్రమంలో ప్రధాని నరేంద్ర మోదీ.. ఈ 3 రైళ్లకు జెండా ఊపి ప్రారంభించారు. వీటితో కలిపి ప్రస్తుతం దేశంలో వందే భారత్ రైళ్ల సంఖ్య 54కు పెరిగింది.

కొత్తగా ప్రారంభం అయిన ఈ 3 వందే భారత్‌ రైళ్లతో ఉత్తర్‌ప్రదేశ్‌, తమిళనాడు, కర్ణాటక రాష్ట్రాల రైలు ప్రయాణికులకు ప్రయోజనం కలగనుంది. ఇక ఈ మూడు వందే భారత్ రైళ్లు ఏ రూట్లో ప్రయాణించనున్నాయో అధికారులు వెల్లడించారు. ఇందులో ఒకటి మీరట్‌-లక్నో మార్గంలో ప్రయాణించనుంది. మరొకటి మధురై-బెంగళూరు మార్గంలో.. ఇంకొకటి చెన్నై-నాగర్‌కోయిల్‌ మార్గాల్లో ప్రయాణికులకు సేవలు అందించనున్నాయి.

చెన్నై ఎగ్మోర్-నాగర్‌కోయిల్ వందే భారత్ రైలు అందుబాటులోకి రావడంతో ఈ రెండు నగరాల మధ్య ప్రయాణాన్ని 2 గంటలకు పైగా సమయం ఆదా అవుతుందని తెలిపారు. చెన్నై ఎగ్మోర్ నుంచి నాగర్ కోయిల్ మధ్య నడిచే ఈ వందే భారత్ రైలు ప్రతీ బుధవారం మినహా వారం మొత్తం అందుబాటులో ఉంటుందని పేర్కొన్నారు. ఉదయం 5 గంటలకు ఎంజీఆర్ చెన్నై సెంట్రల్ స్టేషన్ నుంచి ప్రారంభమై మధ్యాహ్నం 1.50 గంటలకు నాగర్ కోయిల్ చేరుకుంటుందని తెలిపారు. తిరిగి 2.20 గంటలకు నాగర్ కోయిల్ నుంచి ప్రారంభమై తిరిగి రాత్రి 11 గంటలకు చెన్నై చేరుకుంటుందని పేర్కొన్నారు.

మీరట్ సిటీ-లక్నో మధ్య నడిచే ఈ వందే భారత్ రైలు.. ఈ రెండు నగరాల మధ్య ప్రస్తుతం ఉన్న రైలు ప్రయాణ సమయాన్ని ఒక గంట తగ్గిస్తుందని అధికారులు వెల్లడించారు. ఇక మధురై-బెంగళూరు మధ్య నడిచే వందే భారత్ రైలు రెండు నగరాల మధ్య ప్రయాణాన్ని గంటన్నర తగ్గిస్తుందని పేర్కొన్నారు. మధురై నుంచి బెంగుళూరు మధ్య తిరిగే వందే భారత్ రైలు ప్రతీ మంగళవారం మినహా అన్ని రోజులు ప్రయాణికులకు అందుబాటులో ఉంటుందని అధికారులు తెలిపారు. మధురై నుంచి ఉదయం 5.15 గంటలకు ప్రారంభమై.. మధ్యాహ్నం ఒంటి గంటకు బెంగుళూరుకు చేరుకుంటుందని పేర్కొన్నారు. తిరిగి 1.30 గంటలకు బెంగుళూరు నుంచి బయల్దేరి రాత్రి 9.45 గంటలకు మధురై చేరుకుంటుందని చెప్పారు.