మహిళలపై పెరుగుతున్న అత్యాచారాలు.. ప్రధాని మోదీ కీలక వ్యాఖ్యలు

గత కొన్ని రోజులుగా దేశంలో మహిళలపై జరుగుతున్న అత్యాచారాలు, దాడులు, దారుణాలు, అకృత్యాలు తీవ్ర దుమారం రేపుతున్నాయి. ఇక ఇటీవల కోల్‌కతా ట్రైనీ డాక్టర్‌పై అత్యాచారం, హత్య.. మహారాష్ట్ర థానే జిల్లాలోని బద్లాపూర్ పాఠశాలలో చిన్న పిల్లలపై స్కూల్ సిబ్బంది లైంగిక వేధింపుల ఘటనలు పెను సంచలనం సృష్టించాయి. ఇవే కాకుండా ఇంకా చాలా ఘటనలు జరుగుతున్నా.. ఈ రెండు ఘటనలు మాత్రం ఇటీవలి కాలంలో దేశవ్యాప్తంగా మారుమోగిపోయాయి. ఈ క్రమంలోనే మహిళలపై జరుగుతున్న నేరాలపై ప్రధానమంత్రి నరేంద్ర మోదీ తాజాగా స్పందించారు. సమాజంలో మహిళలపై నేరాలు తీవ్ర ఆందోళన కలిగిస్తున్నాయని.. ఇలాంటి కేసుల్లో వేగంగా విచారణ పూర్తి చేసి నిందితులకు కఠిన శిక్షలు విధించాలని పేర్కొన్నారు.

దేశంలో మహిళలు, యువతులు, చిన్న పిల్లలపై జరుగుతున్న దాడుల ఘటనల్లో వేగవంతమైన విచారణ, శిక్షల ఖరారు ఎంతో అవసరమని ప్రధాని మోదీ తెలిపారు. శనివారం భారత్‌ మండపంలో జిల్లా న్యాయవ్యవస్థలపై జరిగిన జాతీయ సదస్సులో ప్రధాని పాల్గొని ఈ వ్యాఖ్యలు చేశారు. సుప్రీంకోర్టు ఏర్పాటు చేసి 75 ఏళ్లు పూర్తయిన నేపథ్యంలో ఏర్పాటు చేసిన వార్షికోత్సవం సందర్భంగా ఈ జిల్లా న్యాయవ్యవస్థపై ప్రత్యేక సదస్సును నిర్వహించారు. ఈ ప్రత్యేక సదస్సులో ప్రధానమంత్రి నరేంద్ర మోదీ, సుప్రీంకోర్టు ప్రధాన న్యాయమూర్తి డీవై చంద్రచూడ్‌, సుప్రీంకోర్టు న్యాయమూర్తులు, న్యాయవాదులు పాల్గొన్నారు. సుప్రీంకోర్టు 75 ఏళ్ల వార్షికోత్సవానికి గుర్తుగా స్మారక చిహ్నం స్టాంప్‌ను, 75 రూపాయల నాణేన్ని విడుదల చేశారు.

ఇక దేశంలో మహిళల భద్రత కోసం ఇప్పటికే ఎన్నో చట్టాలు ఉన్నాయని ప్రధాని తెలిపారు. 2019లో ఫాస్ట్‌ట్రాక్‌ కోర్టు చట్టాన్ని అందుబాటులోకి తీసుకువచ్చినట్లు చెప్పారు. ఈ ఫాస్ట్‌ట్రాక్ కోర్టు చట్టం కింద సాక్షులను రక్షించే కేంద్రాలను ఏర్పాటు చేసినట్లు వివరించారు. ఇందులో జిల్లా పర్యవేక్షక బృందాలు కీలక పాత్ర పోషిస్తున్నాయని ప్రధాని చెప్పారు. వీటిని మరింత బలోపేతం చేసుకోవాల్సిన అవసరం ఉందని.. అప్పుడే మహిళపై నేరాల విషయంలో కోర్టులు వేగంగా తీర్పులు ఇచ్చేందుకు అవకాశం ఉంటుందని ఉద్ఘాటించారు.

ప్రస్తుతం దేశంలో మహిళలు, చిన్నారులపై జరిగే నేరాలు సమాజంలో తీవ్ర ఆందోళనకరంగా మారాయని ప్రధాని మోదీ పేర్కొన్నారు. ఈ అమృత్‌కాల్‌ సమయంలో 140 కోట్ల మంది దేశ ప్రజలు అభివృద్ధి చెందిన, సరికొత్త భారత్‌ను చూడాలని ఆశిస్తున్నట్లు చెప్పారు. గత 10 ఏళ్లలో తమ ప్రభుత్వం.. కేసుల విచారణలో జరుగుతున్న ఆలస్యాన్ని తగ్గించేందుకు తీసుకున్న చర్యలను మోదీ వివరించారు.

కోల్‌కతాలో ట్రైనీ డాక్టర్ హత్యాచార ఘటన నేపథ్యంలో పశ్చిమ బెంగాల్‌ ముఖ్యమంత్రి, తృణముల్ కాంగ్రెస్ పార్టీ అధినేత్రి మమతా బెనర్జీ కేంద్ర ప్రభుత్వానికి లేఖ రాశారు. హత్యాచారం వంటి ఘటనల్లో శిక్షలు కఠినంగా ఉండేందుకు వీలుగా ప్రస్తుతం ఉన్న చట్టాలను మరింత బలోపేతం చేయాలని ఆమె నరేంద్ర మోదీ సర్కార్‌కు సూచించారు. ఈ నేపథ్యంలోనే ప్రధాని మోదీ ఈ వ్యాఖ్యలు చేయడం ప్రాధాన్యం సంతరించుకుంది. ఇక మమతా బెనర్జీ లేఖకు స్పందించిన కేంద్ర ప్రభుత్వం.. ప్రస్తుతం ఉన్న చట్టాల ద్వారా ఇలాంటి నేరాలను అదుపు చేయవచ్చని.. అయితే వీటిని బలంగా అమలు చేయాలని రాష్ట్ర ప్రభుత్వానికి కౌంటర్ ఇచ్చింది.