టెడ్డీ బేర్లకు పిల్లల మూత్రం పూసి.. యూపీలో కిల్లర్ తోడేళ్ల కోసం వేట

ఉత్తర్ ప్రదేశ్‌లో తోడేళ్లు కంటిమీద కునుకులేకుండా చేస్తున్నాయి. తోడేళ్ల దాడిలో ఏడుగురు చిన్నారుల సహా 9 మంది ప్రాణాలు కోల్పోయారు. శనివారం బరూచ్‌ జిల్లాలో ఓ తొమ్మిదేళ్ల బాలుడుతో పాటు మరో వ్యక్తికి తోడేళ్ల దాడిలో గాయాలయ్యాయి. పూరే దిల్‌దార్‌సింగ్‌ గ్రామానికి చెందిన పరాస్‌ అనే బాలుడు ఆరుబయట నిద్రిస్తుండగా తోడేలు దాడి చేసింది. మైకుపుర్‌ గ్రామంలో పున్నిలాల్‌(55) అనే వ్యక్తిపైనా ఆదివారం తెల్లవారుజామున తోడేలు దాడిచేసినట్టు అధికారులు తెలిపారు. వీరిద్దరికి ఆస్పత్రిలో చికిత్స కొనసాగుతోందని, దాడి చేసింది తోడేలా? కాదా? అన్న కోణంలో దర్యాప్తు చేస్తున్నట్లు పేర్కొన్నారు.

బరూచ్ జిల్లా మహసి ప్రాంతంలో మార్చి నుంచి తోడేళ్ల దాడి ఘటనలు నమోదవుతున్నాయి. ఇప్పటివరకు ఎనిమిది మంది మృతిచెందగా.. 30 మందికిపైగా గాయపడ్డారు. మొత్తం ఆరు తోడేళ్లతో కూడిన గుంపు సంచరిస్తోందని అటవీశాఖ అధికారులు గుర్తించారు. వాటిని పట్టుకోడానికి ‘ఆపరేషన్‌ భేడీయా’ను చేపట్టిన అటవీ సిబ్బంది.. ఇప్పటివరకు నాలుగింటిని పట్టుకున్నారు. ఉచ్చులు, బోన్లు ఏర్పాటు చేయడంతో పాటు డ్రోన్ల సాయంతో వాటిని ట్రాక్‌ చేస్తున్నారు. తోడేళ్లు ఎప్పటికప్పుడు తమ స్థావరాలను మార్చుకోవడంతో వాటిని బంధించడం కష్టతరంగా మారింది.

శనివారం థర్మల్‌ సెన్సార్‌ కెమెరాలో రెండు తోడేళ్లు కనిపించాయని.. కానీ, అర్ధరాత్రి కావడంతో అటవీ సిబ్బంది వాటిని పట్టుకోలేకపోయారని అధికారులు తెలిపారు. ఈ జంతువులను పట్టుకోడానికి బొమ్మలకు పిల్లల మూత్రం పూసి ఉచ్చులోకి లాగే ప్రయత్నం చేస్తున్నారు. ‘తోడేళ్లు ప్రధానంగా పిల్లలను లక్ష్యంగా చేసుకుంటాయి కాబట్టి, ఉచ్చుల దగ్గర మానవ ఉనికిని తప్పుడు భావాన్ని సృష్టించేందుకు మేము రంగురంగుల దుస్తులను ధరించి, పిల్లల మూత్రంలో ముంచిన పెద్ద బొమ్మలను పెట్టాం.. సహజంగా మానవుల వాసన తోడేళ్లను ఉచ్చులకు దగ్గరగా ఆకర్షిస్తుంది’ అని డివిజనల్ ఫారెస్ట్ అధికారి అజిత్ ప్రతాప్ సింగ్ చెప్పారు.

పక్షుల నుంచి పంటలను కాపాడేందుకు పొలాల్లో దిష్టిబొమ్మలను ఎలా వినియోగిస్తారో అదే తరహాలో అటవీ శాఖ వినియోగిస్తున్న టెడ్డీలను ఎరగా పరిగణించవచ్చని మరో అధికారి తెలిపారు. తోడేళ్లను తరిమికొట్టేందుకు అటవీ శాఖ ఏనుగుల పేడను కూడా ఉపయోగిస్తోంది. ‘ఏనుగుల ఉనికిని అనుకరించే సువాసనను సృష్టించేందుకు పేడకు నిప్పంటించారు. ఏనుగుల వంటి పెద్ద జంతువులను చూస్తే తోడేళ్లు భయంతో తప్పించుకుంటాయి’ అని ఒక అధికారి తెలిపారు.