12 ఏళ్లుగా రోజుకు అరగంటే నిద్ర.. అయినా ఆరోగ్యంగానే 40 ఏళ్ల వ్యక్తి!

మనం సాధారణంగా రోజూ 6 నుంచి 8 గంటల వరకు నిద్రపోతూ ఉంటాం. అయితే కొందరైతే 8 నుంచి 10 గంటల వరకు నిద్రపోతారు. ఆరోగ్యంగా ఉండేందుకు మనుషులు రోజుకు కనీసం 6 నుంచి 8 గంటలు నిద్ర పోవాలని డాక్టర్లు సూచిస్తూ ఉంటారు. అతి నిద్ర అయినా, నిద్ర లేమి అయినా.. మనుషుల ఆరోగ్యంపై ప్రభావం చూపిస్తుందని ఇప్పటికే ఎంతో మంది డాక్టర్లు.. ఎన్నో అధ్యయనాలు వెల్లడించాయి. మనుషులకు తిండి ఎంత ముఖ్యమో.. నిద్ర కూడా అంతే అవసరం. కానీ ఓ వ్యక్తి మాత్రం రోజుకు 30 నిమిషాలు మాత్రమే నిద్రపోతూ అందర్నీ షాక్‌కు గురి చేస్తున్నాడు. అతడే జపాన్‌కు చెందిన డైసుకీ హోరి. ఇలా రోజుకు అరగంట మాత్రమే పడుకోవడం వల్ల తాను మరింత పనిసామర్థ్యం మెరుగుపడిందని చెబుతున్నాడు.

జపాన్‌లో హ్యూగో ప్రిఫెక్చర్‌కు చెందిన డైసుకీ హోరీ.. గత 12 ఏళ్లుగా నిత్యం అరగంట మాత్రమే నిద్రపోతున్నట్లు తెలిపాడు. దీనివల్ల తాను మరింత ఎక్కువ సమయం పని చేస్తున్నట్లు వివరించాడు. రోజూ 30 నిమిషాలు మాత్రమే పడుకునేలా తన శరీరానికి, మెదడుకు.. ట్రైనింగ్ ఇచ్చినట్లు చెప్పాడు. గత 12 ఏళ్లుగా ఇలా నిద్రను తగ్గించుకోవడం ప్రారంభించినట్లు పేర్కొన్నారు. అలా చేయడం వల్లే ఇప్పుడు తాను 30 నిమిషాలే నిద్రపోయినా అలిసిపోవడం లేదని తెలిపాడు. 12 సంవత్సరాల నుంచి క్రమ క్రమంగా నిద్ర పోవడం తగ్గించినట్లు వెల్లడించాడు. భోజనానికి ఒక గంట ముందు గేమ్స్ ఆడటం లేదా కాఫీ తాగడం వంటివి చేయడం వల్ల నిద్రను తరిమికొట్టే వచ్చని చెబుతున్నాడు.

ఇక ఎవరైతే ఎక్కువ పని చేయాలని, తమ సామర్థ్యాన్ని పెంచుకోవాలనుకునే వాళ్లు సుదీర్ఘంగా నిద్రపోవడం కంటే తక్కువ సమయం నాణ్యమైన నిద్ర పోవడం వల్ల ఎక్కువ ప్రయోజనం కలుగుతుందని వివరించాడు. ఇలాంటి విధానాలు పాటించడం వల్లే డాక్టర్లు, అగ్నిమాపక సిబ్బంది తక్కువసేపు నిద్రపోయినా అధిక సామర్థ్యాన్ని కలిగి ఉంటారని చెప్పాడు. జపాన్‌లోని యోమియూరి అనే ఒక టీవీ ఛానల్ రోజుకు 30 నిమిషాలు మాత్రమే డైసుకీ హోరీ.. ఎలా జీవిస్తున్నాడో చూపించేందుకు ఒక "విల్ యు గో విత్ మీ" రియాలిటీ షోను ఏర్పాటు చేసింది. ఈ రియాలిటీ షోలో భాగంగా వారు 3 రోజుల పాటు డైసుకీ హోరీని గమనించారు. ఒక ఎపిసోడ్‌లో మాత్రం డైసుకీ హోరీ కేవలం 26 నిమిషాలు మాత్రమే నిద్రపోయినట్లు అందర్నీ ఆశ్చర్యపరిచారు.

అయితే అరగంట మాత్రమే నిద్రపోయిన తర్వాత కూడా డైసుకీ హోరీ.. చాలా ఉత్సాహంగా లేచి, బ్రేక్‌ఫాస్ట్ చేసి పనికి వెళ్లడం, జిమ్‌ చేయడం వంటివి చేసినట్లు గుర్తించారు. అంతేకాకుండా 2016లో డైసుకీ హోరీ.. జపాన్‌ షార్ట్‌ స్లీపర్స్‌ ట్రైనింగ్‌ అసోసియేషన్‌ అనే సంస్థను స్థాపించాడు. ఆ సంస్థలో 2 వేలకు పైగా విద్యార్థులకు తనలాగే తక్కువసేపు నిద్రపోవడం ఎలాగో వారికి ట్రైనింగ్ ఇచ్చాడు. అయితే ఇలా అల్ట్రా షార్ట్‌ స్లీపర్స్‌కు ఎందుకు ఎలాంటి అనారోగ్య సమస్యలు రావడం లేదనేది డాక్టర్లకు కూడా అర్థకాని ప్రశ్నలా నిలిచింది.

రోజూ గంటల తరబడి నిద్రపోవడం కంటే.. పడుకున్న కాస్తసేపైనా నాణ్యమైన నిద్ర పోతే అది ఆరోగ్యానికి అసలైన మేలు కలిగిస్తుందని డైసుకీ హోరీ వివరించాడు. ఇలా నాణ్యమైన నిద్రపోవడం వల్ల ఏకాగ్రత కూడా పెరుగుతుందని చెప్పాడు. జీవితంలో లక్ష్యంపైనే దృష్టి పెట్టాలనుకుని భావించే వారు.. ఇలాంటి విధానంతో ఎక్కువ లాభపడతారని డైసుకీ తెలిపాడు. ఇక గతంలో వియత్నాంలో కూడా ఇలాంటి ఘటనే ఒకటి వెలుగులోకి వచ్చింది. థాయ్ ఎన్‌గాక్ అనే 80 ఏళ్ల వ్యక్తి ఏకంగా 60 ఏళ్లపాటు అసలు నిద్రేపోలేదు. 1962లో ఆయనకు ఒకసారి తీవ్రమైన జ్వరం వచ్చిందని.. ఆ తర్వాత నుంచి తాను అసలు నిద్రేపోలేదని థాయ్ ఎన్‌గాక్ తెలిపాడు. నిద్రలేమిని దూరం చేసుకునేందుకు రకరకాల థెరపీలు మందులు వాడినా కూడా ఫలితం లేకపోయిందని.. దీంతో తాను నిద్రపోకుండానే ఉంటున్నట్లు వివరించాడు.