బంగ్లాదేశ్ బెదిరింపులు..భారత్‌తో చేతులు కలిపిన మాల్దీవులు

హిందూ మహాసముద్ర ద్వీప దేశమైన మాల్దీవులు.. చైనా ప్రభావంతో గత కొంత కాలంగా భారత్‌ వ్యతిరేక వైఖరిని కనబర్చిన సంగతి తెలిసిందే. చైనా అనుకూలుడైన మహ్మద్ ముయిజ్జూ మాల్దీవులు అధ్యక్ష పగ్గాలు చేపట్టిన తర్వాత.. ఆ దేశ వైఖరిలో స్పష్టమైన మార్పు వచ్చింది. ‘ఇండియా ఔట్’ నినాదంతో మాల్దీవులు ఎన్నికల్లో గెలిచిన ముయిజ్జూ.. అధికారంలోకి వచ్చాక దూకుడు కొనసాగించారు. మాల్దీవులు మంత్రులు అయితే.. లక్షదీవులు పర్యటనకు వెళ్లిన ప్రధాని మోదీని టార్గెట్‌ చేసుకొని అనుచిత వ్యాఖ్యలు చేశారు.

అయితే భారత్ సాయం లేనిదే తాము మనుగడ సాగించడం కష్టమనే విషయం అర్థం కావడానికి మాల్దీవులు ప్రభుత్వాధినేతకు ఎంతో కాలం పట్టలేదు. దీంతో తిరిగి భారత్‌తో సంబంధాలు పునరుద్ధరించుకునే దిశగా మాల్దీవులు అడుగులేస్తోంది. అందులో భాగంగా.. హిందు మహాసముద్రంలో తీరప్రాంత భద్రతకు సంబంధించి భారత్‌తో మాల్దీవులు చేతులు కలిపింది. ఇందులో మారిషస్, శ్రీలంక, సీషెల్స్ దేశాలు కూడా భాగం కానున్నాయి.

  ఈ ఒప్పందం కోసం ఆయా దేశాల జాతీయ భద్రతా సలహాదారులు (ఎన్ఎస్ఏ) ఇటీవల సమావేశం అయ్యారు. ది ఛార్టర్ ఆఫ్ కొలంబో సెక్యూరిటీ కాన్‌క్లేవ్ (సీఎస్‌సీ), ఎంవోయూలపై ఎన్‌ఎస్ఏల అత్యున్నత స్థాయి సమావేశంలో సంతకాలు చేశారు. శ్రీలంక అధ్యక్షుడి జాతీయ భద్రతా సలహాదారు సగల రత్నాయక, మాల్దీవులు ఎన్‌ఎస్ఏ ఇబ్రహీం లతీఫ్, శ్రీలంకలోని మారిషస్ హైకమిషనర్ హేమన్‌దోయల్ డిల్లిమ్, భారత ప్రధాని జాతీయ భద్రతా సలహాదారు అజిత్ ధోవల్ ఈ ఒప్పందంపై సంతకాలు చేశారు.

సీఎస్‌సీ‌ ఒప్పందంపై సంతకాలు చేయడం ద్వారా.. సముద్ర భద్రత, తీవ్రవాదానికి, రాడికలైజేషన్‌కు వ్యతిరేకంగా పని చేయడం; డ్రగ్స్, ఆయుధాల అక్రమ రవాణాను అరికట్టడం, వ్యవస్థీకృత నేరాలకు వ్యతిరేకంగా పోరాడటం, సైబర్ సెక్యూరిటీ, కీలకమైన మౌలిక సదుపాయాల పరిరక్షణ, మావనతా సాయం, విపత్తుల వేళ సాయం లాంటి విషయాల్లో ఆయా దేశాలు కలిసి పని చేస్తాయి.

దగ్గరవుతోన్న మాలే.. దూరమవుతోన్న ఢాకా..

భారత్‌తో స్నేహం విలువను అర్థం చేసుకున్న మాల్దీవులు మళ్లీ ఢిల్లీకి చేరువ కావడానికి ప్రయత్నిస్తుండగా.. మరో పొరుగుదేశమైన బంగ్లాదేశ్ మాత్రం భారత్ వ్యతిరేక ధోరణిని కనబరుస్తోంది. ఈ సీఎస్‌సీ ఒప్పందం వేళ పరిశీలక దేశం హోదాలో బంగ్లాదేశ్‌ను ఆహ్వానించగా.. ఆ దేశం మాత్రం భేటీకి డుమ్మా కొట్టింది.

ఇటీవల బంగ్లాదేశ్‌లో చోటు చేసుకున్న ఆందోళనల నేపథ్యంలో షేక్ హసీనా ఆ దేశ ప్రధాని పదవికి రాజీనామా చేసి భారత్‌కు పారిపోయి వచ్చిన విషయం తెలిసిందే. షేక్ హసీనాను తమకు అప్పగించాలని బంగ్లాదేశ్ ప్రభుత్వం డిమాండ్ చేస్తోంది. భారత్, బంగ్లాదేశ్ మధ్య సంబంధాలు సజావుగా సాగాలంటే హసీనాను తమకు అప్పగించాల్సిందేనని.. లేకపోతే ఇరు దేశాల మధ్య సంబంధాలు దెబ్బతింటాయి. బంగ్లాదేశ్ నేషనలిస్ట్ పార్టీ ఢిల్లీ పెద్దలను హెచ్చరించింది. తాము అధికారంలోకి వస్తే షేక్ హసీనా హయాంలో భారత్‌తో చేసుకున్న ఒప్పందాలను సైతం పునఃసమీక్షిస్తామని చెబుతోంది. బంగ్లాదేశ్‌లో మారిన పరిణామాలు, ఆ దేశ పాలకులు, పార్టీల వైఖరి చూస్తుంటే.. భారత్‌, బంగ్లాదేశ్ మధ్య మరింత దూరం పెరిగే సూచనలు కనిపిస్తున్నాయి.