అతడు సమాజానికి ప్రమాదకారి.. హత్యకు గురైన అభిమానిపై హీరో దర్శన్ సంచలన వ్యాఖ్యలు

యూట్యూబర్ రేణుకాస్వామిని హత్య చేసిన కేసులో అరెస్టయిన కన్నడ హీరో దర్శన్.. ఇటీవల బెయిల్‌పై విడుదలైన సంగతి తెలిసిందే. దాదాపు నాలుగున్నర నెలలు జైల్లో ఉన్న అతడు.. అనారోగ్య కారణాలు చూపించి వెన్నెముక శస్త్ర చికిత్స చేయించుకోవాలని మధ్యంతర బెయిల్ పొందారు. ఆ బెయిల్ గడువు త్వరలో ముగియనుంది. ఈ నేపథ్యంలో తనకు పూర్తిస్థాయిలో బెయిల్ మంజూరు చేయాలని కోరుతూ దర్శన్ కర్ణాటక హైకోర్టును ఆశ్రయించారు. దర్శన్ తరఫున సీనియర్ న్యాయవాది సీవీ నగేష్ హైకోర్టులో వాదనలు వినిపిస్తున్నారు.

దర్శన్ బెయిల్ పిటిషన్‌పై మంగళవారం హైకోర్టు విచారణ జరిపింది. దర్శన్ తరఫు అడ్వకేట్ సీవీ నగేష్.. హత్యకు గురైన రేణుకాస్వామిపై కీలక వ్యాఖ్యలు చేశారు. చనిపోయిన వ్యక్తి ఈ సమాజానికి హానికరమని అన్నారు. ఎంతో మంది మహిళలను అతడు వేధించాడని ఆరోపించారు. మహిళలకు అసభ్యకరమైన మెసేజ్‌లు, పోర్నో కంటెంట్ పంపాడని కోర్టుకు వెల్లడించారు. ఇవి దర్శన్ మాటలుగా కోర్టుకు నగేష్ విన్నవించారు.

‘‘అతడికి మహిళల పట్ల గౌరవం లేదు. మహిళలకు పోర్నోగ్రాఫిక్ కంటెంట్ పంపుతూ ఉండేవాడు... చాలా మంది మహిళలకు న్యూడ్ ఫొటోలు పంపేవాడు. గౌతమ్ అనే పేరుతో ఇలాంటి అసభ్యకరమైన మెసేజ్‌లు, ఫొటోలు మహిళలకు పంపుతూ వేధింపులకు గురిచేశాడు.. ఈ సమాజానికి అతడు ఎంతో హానికరం. అలాంటి అసభ్యకరమైన మెసేజ్‌లు ప్రధాన నిందితురాలైన పవిత్ర గౌడకు మాత్రమే కాదు.. చాలా మంది ఆడవాళ్లకు పంపాడు..’’ అని కోర్టుకు సీవీ నగేష్ వివరించారు.

ఈ కేసులో అరెస్టయిన తర్వాత దర్శన్ ఇమేజ్ ఎలా మారిపోయిందో కూడా కోర్టుకు నగేష్ వివరించారు. రేణుకాస్వామిని ఉద్దేశించి మాట్లాడుతూ.. ‘మహిళలపై జాలి, కనీస మర్యాదలేని వ్యక్తి, చట్టాలంటే ఖాతరులేని వ్యక్తి.. ఈరోజు అందరితో కీర్తించబడ్డాడని, నేషనల్ హీరో అయిపోయాడు’ అని నగేష్ అన్నారు. మరోవైపు, దర్శన్ పరువుకు మాత్రం పూర్తిగా భంగం వాటిల్లిందని, రియల్ లైఫ్‌లో అతడొక రీల్ హీరోగా మిగిలిపోయాడని తెలిపారు.

తన వాదనలో భాగంగా పోలీస్ విచారణలో లూప్ హోల్స్ కూడా ఉన్నాయని దర్శన్ తరఫు లాయర్ నగేష్ కోర్టుకు విన్నవించారు. అసలు రేణుకాస్వామిని చిత్రదుర్గలో కిడ్నాప్ చేసి బెంగళూరుకు తీసుకొచ్చారు అనడానికి ఆధారాలే లేవని వాదించారు. ఈ మేరకు రేణుకాస్వామి తండ్రి కాశీనాథయ్య ఇచ్చిన వాంగ్మూలాన్ని కోర్టుకు చదివి వినిపించారు. రేణుకాస్వామి తల్లి కూడా అతడు స్నేహితులతో కలిసి బయటికి వెళ్లాడనే చెప్పారని నగేష్ గుర్తు చేశారు. చిత్రదుర్గ నుంచి బెంగళూరుకు వెళ్లే క్రమంలో మధ్యలో ఒక రెస్టారెంట్‌లో రేణుకాస్వామి బిల్ పే చేశాడని న్యాయవాది వెల్లడించారు. కిడ్నాప్‌కు గురైన వ్యక్తి ఒక రెస్టారెంట్‌లో రూ. 640 బిల్ పే చేస్తాడా అని నగేష్ ప్రశ్నించారు.

అలాగే, రేణుకాస్వామి మృతదేహానికి సంబంధించి జూన్ 12న జరిగిన పంచనామాను ఉద్దేశించి కూడా నగేష్ కీలక వ్యాఖ్యలు చేశారు. ఇదొక తప్పుడు పంచనామా అని ఆయన ఆరోపించారు. జూన్ 9న శవాన్ని స్వాధీనం చేసుకుంటే.. ఘటనా స్థలంలో దొరికిన వస్తువులను పోలీసులు వెంటనే ఎందుకు సీజ్ చేయలేదని.. జూన్ 12వ తేదీ వరకు ఎందుకు వెయిట్ చేశారని ప్రశ్నించారు. ఈ బెయిల్ పిటిషన్‌పై వాదనలను దాదాపు రెండు గంటలపాటు విన్న న్యాయమూర్తి జస్టిస్ ఎస్. విశ్వజిత్ శెట్టి.. తదుపరి విచారణను నవంబర్ 28కి వాయిదా వేశారు.

బెంగళూరులోని కామాక్షిపాళ్య వద్ద మురుగు నీటి కాలువలో ఈ ఏడాది జూన్ 9న రేణుకాస్వామి మృతదేహాన్ని పోలీసులు గుర్తించారు. రేణుకాస్వామిది హత్యేనని తేల్చిన పోలీసులు.. ఆ తర్వాత రెండు రోజులకే దర్శన్‌తో పాటు ఆయన స్నేహితురాలు, నటి పవిత్రా గౌడ, మరికొంత మంది సన్నిహితులను అరెస్ట్ చేశారు.