దశ తిప్పిన లాటరీ టికెట్.. లక్కీ డ్రాలో ఏకంగా రూ.1800 కోట్లు, ఒక్కసారిగా వందల కోట్లు

లాటరీ టికెట్ కొని, అదృష్టం వరించి.. ఒక్కరోజులోనే కోటీశ్వరులు అయినవారిని మనం చాలా మందిని చూస్తూనే ఉన్నాం. ఇక మెగా లాటరీలు, బంపర్ లాటరీలు అంటూ గెలిచిన వారికి భారీ మొత్తంలో డబ్బు ముట్టజెప్పే లక్కీ డ్రాలను కూడా చూశాం. తాజాగా ఓ వ్యక్తికి ఏకంగా రూ.1800 కోట్ల లాటరీ తగలడం ఇప్పుడు అందర్నీ ఆశ్చర్యంలో ముంచెత్తుతోంది. బ్రిటన్‌లో తీసిన ఈ లక్కీడ్రాలో విజేతకు రూ.1800 కోట్లు వచ్చాయి. ఇది బ్రిటన్ లాటరీ చరిత్రలోనే మూడో అత్యధిక లాటరీ అని.. సంబంధిత వర్గాలు పేర్కొంటున్నాయి. బ్రిటన్‌లోని నేషనల్ లాటరీలో భాగంగా తీసిన లక్కీ డ్రాలో ఆ వ్యక్తి.. ఏకంగా 177 మిలియన్ పౌండ్లు అంటే మన భారత కరెన్సీలో అక్షరాలా రూ.1804.16 కోట్లు గెలుచుకున్నాడు. దీంతో ఈ వార్త ఇప్పుడు తెగ వైరల్ అవుతోంది.

బ్రిటన్‌లోని నేషనల్ లాటరీ తాజాగా మంగళవారం డ్రా తీసింది. ఇందులో 07, 11, 25, 31, 40 నంబర్లు లక్కీ డ్రా గెలుచుకున్నాయి. ఇక 09, 12 నంబర్ గల టికెట్లకు లక్కీ స్టార్స్ అని నేషనల్ లాటరీ తెలిపింది. ఇందులో ఒక నంబర్‌కు మాత్రం బంపర్ డ్రా తగిలినట్లు చెప్పింది. ఆ నంబర్‌ లాటరీ టికెట్‌పై ఏకంగా 177 మిలియన్ పౌండ్లు అంటే మన కరెన్సీలో ఏకంగా రూ.1800 కోట్లకు పైగానే గెలుచుకున్నట్లు వెల్లడించింది.

ఇక ఆ లాటరీ టికెట్‌ను ఒకే వ్యక్తి కొనుగోలు చేసినట్లయితే అతడి పంట పండినట్లేనని నేషనల్ లాటరీకి చెందిన ఒక అధికారి ఆండీ కార్టర్ వెల్లడించారు. ఇక ఆ వ్యక్తి.. ఈ ఏడాది సండే టైమ్స్‌ రిచ్‌ లిస్ట్‌లో ఉన్న సంగీత కళాకారులు హ్యారీ స్టైల్స్‌, అడెలెల కంటే ధనవంతుడిగా నిలుస్తాడని ఆయన పేర్కొన్నారు. అయితే ఈ లక్కీ డ్రా ఎవరికి దక్కింది.. ఆ విజేత ఎవరు అనే విషయాలను మాత్రం నేషనల్ లాటరీ గోప్యంగా ఉంచింది.

ఇక ఆ లక్కీ డ్రా బ్రిటన్‌లోనే ఇప్పటివరకు అత్యధిక డబ్బు గెలుచుకున్న లాటరీల్లో ఒకటిగా నిలిచింది. 2022 జులై 19వ తేదీన తీసిన ఓ లాటరీ ప్రైజ్‌మనీ బ్రిటన్‌లోనే అతిపెద్ద జాక్‌పాట్‌గా నిలిచింది. అందులో ఏకంగా 195 మిలియన్ పౌండ్లు అంటే భారత కరెన్సీలో ఏకంగా రూ.2వేల కోట్లకు పైగానే దక్కింది. అంతకుముందు అదే 2022 ఏడాదిలోనే మే 10వ తేదీన తీసిన లాటరీలో 184 మిలియన్ పౌండ్లు అంటే రూ.1950 కోట్ల లక్కీ డ్రాను అధిగమించింది. ఇప్పటివరకు బ్రిటన్ చరిత్రలో ఇవే అతిపెద్ద 3 లక్కీ డ్రాలుగా నిలిచాయి.