వెనక్కి తగ్గిన ఏక్‌నాథ్ షిండే.. మహారాష్ట్ర సీఎం పదవిపై ఉత్కంఠ వీడినట్లేనా

మహారాష్ట్ర సీఎం పదవిపై ఉత్కంఠ వీడుతున్నట్లు కనిపిస్తోంది. బీజేపీ హైకమాండ్.. సీఎం ఎంపికపై మహాయుతి కూటమి నేతలతో చేసిన చర్చలు ఫలించేలా కనిపిస్తున్నాయి. ముఖ్యమంత్రిగా దేవేంద్ర ఫడ్నవీస్‌ను చేసేందుకు కమలం పార్టీ పెద్దలు చేసిన ప్రయత్నాలు సఫలం అయినట్లే తెలుస్తోంది. ముఖ్యమంత్రి పీఠం కోసం మొదటి నుంచి పట్టుబట్టిన ఏక్‌నాథ్ షిండే కొంత వెనక్కి తగ్గినట్లు కనిపిస్తోంది. దీంతో మహారాష్ట్రలో గత కొన్ని రోజులుగా సాగుతున్న సస్పెన్స్‌కు తెరపడి.. కొత్త ప్రభుత్వం ఏర్పాటు అయ్యేందుకు మార్గం సుగమం అయినట్లే సూచనలు కనిపిస్తున్నాయి.

ఈ నేపథ్యంలోనే తాజాగా మీడియాతో మాట్లాడిన ఆపద్ధర్మ ముఖ్యమంత్రి ఏక్‌నాథ్ షిండే.. కొత్త సీఎం ఎంపిక, ప్రభుత్వ ఏర్పాటు విషయంలో ప్రధానమంత్రి నరేంద్ర మోదీ, కేంద్రమంత్రి అమిత్‌ షాలతే తుది నిర్ణయమని తేల్చి చెప్పారు. వారు తీసుకునే నిర్ణయానికి తాను కట్టుబడి ఉంటానని స్పష్టం చేశారు. ఈ సందర్భంగా మహారాష్ట్రలో మహాయుతి కూటమికి ఘన విజయం అందించిన ప్రజలకు ధన్యవాదాలు చెప్పిన షిండే.. తన దృష్టిలో సీఎం అంటే కామన్‌ మ్యాన్‌ అని తెలిపారు. మహాయుతి కూటమి విజయం సాధించేందుకు.. ముఖ్యమంత్రిలా కాకుండా, ఒక కార్యకర్తలా పనిచేసినట్లు తెలిపారు. ఎన్నికల సమయంలో రోజుకు 2, 3 గంటలు మాత్రమే నిద్రపోయి.. తెల్లవార్లు పనిచేసినట్లు చెప్పారు.

  తాను ఒక సామాన్య రైతు కుటుంబం నుంచి వచ్చానని.. అన్ని వర్గాల కష్టాలు తెలుసని ఏక్‌నాథ్ షిండే వెల్లడించారు. అందుకే సీఎం అంటే కామన్‌ మ్యాన్‌ అని పేర్కొన్నారు. మహిళలు, రైతులు ఇలా అన్ని వర్గాల సంక్షేమం కోసం తమ ప్రభుత్వం పథకాలు తీసుకొచ్చినట్లు చెప్పారు. సీఎంగా ఎలాంటి అసంతృప్తి లేదని.. తాను ముఖ్యమంత్రిగా ఉన్న సమయంలో ప్రధానమంత్రి నరేంద్ర మోదీ, కేంద్రమంత్రి అమిత్‌ షాలు అండగా ఉన్నట్లు వివరించారు. మహారాష్ట్రలో ఎన్నికల తర్వాత నెలకొన్న పరిణామాలపై మోదీ, అమిత్ షాలతో ఫోన్‌లో మాట్లాడినట్లు చెప్పిన షిండే.. సీఎం ఎంపికపై వారి నిర్ణయానికి కట్టుబడి ఉంటానని చెప్పినట్లు వెల్లడించారు.

ఇక మహాయుతి కూటమిలో ముఖ్యమంత్రి ఎంపికపై ఏకాభిప్రాయం కుదరలేదని వస్తున్న వార్తలపై దేవేంద్ర ఫడ్నవీస్‌ స్పందించారు. సీఎం పదవిపై మహాయుతి కూటమిలో ఇంకా ఎలాంటి నిర్ణయం జరగలేదని.. 3 పార్టీలు కలిసి మహారాష్ట్రలో కొత్త ప్రభుత్వాన్ని ఏర్పాటు చేస్తాయని స్పష్టం చేశారు. ఈ నేపథ్యంలోనే ఏక్‌నాథ్‌ షిండే, దేవేందర్ ఫడ్నవీస్, అజిత్‌ పవార్‌లు ఢిల్లీకి రావాలని బీజేపీ హైకమాండ్ నుంచి పిలుపువచ్చినట్లు తెలుస్తోంది. వీరు ముగ్గురూ అమిత్‌ షాతో భేటీ అయి.. ఆ తర్వాత సీఎం ఎంపిక, ప్రభుత్వ ఏర్పాటుపై ఒక క్లారిటీ ఇచ్చే అవకాశమున్నట్లు మహారాష్ట్ర రాజకీయాల్లో చర్చ జరుగుతోంది.

ఇక కొత్తగా మహాయుతి కూటమి నేతృత్వంలో ఏర్పడనున్న మహారాష్ట్ర ప్రభుత్వంలో తన కుమారుడు శ్రీకాంత్‌ షిండేకు డిప్యూటీ సీఎం పదవి ఇవ్వాలని.. ఏక్‌నాథ్‌ షిండే బీజేపీ హైకమాండ్ ముందు మరో కొత్త ప్రతిపాదన పెట్టినట్లు తెలుస్తోంది. మహారాష్ట్రలోని కల్యాణ్‌ లోక్‌సభ స్థానం నుంచి శ్రీకాంత్ షిండే ప్రస్తుతం ఎంపీగా కొనసాగుతున్నారు. అంతేకాకుండా మహాయుతి కూటమి కన్వీనర్‌ పదవి తనకు ఇవ్వాలని ఏక్‌నాథ్‌ షిండే డిమాండ్ చేస్తున్నట్లు వార్తలు వస్తున్నాయి.