ఆర్మీ మహిళా అధికారులకు అహం.. మేం చెప్పిందే వినాలంటారు: లెఫ్టినెంట్ జనరల్ సంచలన నివేదిక

సైన్యంలో మహిళా కమాండింగ్ అధికారిణిల పనితీరుకు సంబంధించిన ఓ లెఫ్టినెంట్ జనరల్ ఇచ్చిన ఫీడ్‌బ్యాక్ ఇప్పుడు తీవ్ర వివాదాస్పదమవుతోంది. ఆర్మీలోని మహిళా కల్నల్‌లకు అహం ఎక్కువ అని.. వారి మాటే వినాలనే దోరణిని ప్రదర్శిస్తారని, ఇతరుల భావోద్వేగాలను అర్థం చేసుకోరంటూ ఉన్నతాధికారులకు ఆయన లేఖ రాశారు. ఓ అధికారి తన కింద ఉండే యూనిట్ల గురించి కాకుండా.. ప్రత్యేకించి ‘మహిళా కమాండింగ్‌ అధికారులు’ అంటూ అందులో ప్రస్తావించడంతో విమర్శలు వెల్లువెత్తుతున్నాయి. వాస్తవానికి ఆర్మీలో మహిళలకు కమాండింగ్‌ అధికారి హోదా ఇచ్చేవారు కాదు.

దీనిపై 2020లో సుప్రీంకోర్టు తీవ్రంగా స్పందించి, లింగవివక్ష తగదని హితవుపలికింది. 108 మంది మహిళా సిబ్బందికి కల్నల్‌గా పదోన్నతి కల్పించాలని ఫిబ్రవరి 2023లో కోర్టు ఆదేశించింది. కల్నల్‌గా ప్రమోషన్ పొందిన మహిళ అధికారిణిల్లో ఎనిమిది మంది 17 మౌంటైన్‌ స్ట్రైక్‌ కార్ప్స్‌లో విధులు నిర్వర్తిస్తున్నారు. ఈ కార్ప్స్‌ లెఫ్టెనెంట్‌ జనరల్‌ రాజీవ్‌ పూరి అక్టోబరు 1న తన పైఅధికారి, ఈస్ట్రన్‌ కమాండ్‌కు చెందిన జనరల్‌ ఆఫీసర్‌ కమాండింగ్‌ ఇన్‌ చీఫ్‌ రామ్‌చందర్‌ తివారీకి లేఖ రాశారు.

మహిళా కల్నల్‌ల మధ్య నియంత్రణలేని పిచ్చిపిచ్చి ఈగో సమస్యలు ఉన్నాయని ఆయన వివరించారు.

‘మహిళా కమాండింగ్ ఆఫీసర్ల తీరుతో.. వ్యక్తుల మధ్య పరస్పర సంబంధాలపై దుష్ప్రభావాలు కనిపించే ప్రమాదాలున్నాయి’ అని తెలిపారు. దీంతో, ఆర్మీలో లింగ వివక్షపై నెటిజన్లు దుమ్మెత్తిపోస్తున్నారు. మహిళలకు నాయకత్వ బాధ్యతలు అప్పగించేందుకు సైన్యం చేస్తున్న ప్రయత్నాల గురించి ఈ లేఖ చర్చలకు దారితీసింది. అయితే, లెఫ్టినెంట్ జనరల్ పూరి తీసుకున్న శాంపిల్ చాలా తక్కువని, ఆయన కేవలం 17 కార్ప్స్‌లోని ఏడుగురి మహిళా కల్నల్‌లను మాత్రమే పరిశీలించారని ఆర్మీ వర్గాలు అంటున్నాయి. ఇది ఆయన వ్యక్తిగత పరిశీలనను ప్రతిబింబిస్తుందని పేర్కొన్నాయి.

లెఫ్టినెంట్ జనరల్ పూరి.. మహిళా కమాండింగ్ ఆఫీసర్ల నేతృత్వంలోని యూనిట్లలో నిర్వహణ సమస్యలను ఎత్తిచూపారు. వ్యక్తిగత అవసరాల పట్ల అధికారులు, సబార్డినేట్‌ల మధ్య సమన్వయం లేకపోవడాన్ని ఉదహరించారు. వారు ఫిర్యాదు చేసే అతిశయోక్తి ధోరణిని తప్పుబట్టారు. చిన్న ఫిర్యాదులు అంతర్గతంగా పరిష్కరించబడకుండా నేరుగా సీనియర్ కమాండర్ల వద్దకు వెళ్తున్నాయని వివరించారు. మహిళా COలు వ్యక్తిగత అధికారాలను డిమాండ్ చేయడం, యూనిట్ల అవసరాల కంటే సౌకర్యానికి ప్రాధాన్యత ఇవ్వడం వంటి సందర్భాలను నివేదిక పేర్కొంది. ఈ ప్రవర్తన, పురుషు అధికారుల్లో చాలా అరుదుగా ఉన్నప్పటికీ, మహిళా అధికారుల నేతృత్వంలోని యూనిట్లలో ఎక్కువగా ఉందని ఆ నివేదిక తెలిపింది. కానీ, దీనిని పలువురు తప్పుబడుతున్నారు.