ఏపీ వరద బాధితులకు,,, విద్యుత్ ఉద్యోగుల రూ.10 కోట్ల 60 లక్షలు విరాళం

ఆంధ్రప్రదేశ్‌లో వరద బాధితుల్ని ఆదుకునేందుకు ఎంతోమంది దాతలు ముందుకొస్తున్నారు. ముఖ్యమంత్రి సహాయనిధికి భారీగా విరాళాలను అందజేస్తున్నారు. సినీ, రాజకీయ, వ్యాపార ప్రముఖులతో పాటుగా ప్రభుత్వ ఉద్యోగులు కూడా పెద్ద మనసు చాటుకుంటున్నారు. ఇప్పటికే పలు ప్రభుత్వ ఉద్యోగ సంఘాల నేతలు ముఖ్యమంత్రి చంద్రబాబును కలిసి విరాళాలపై ప్రకటన చేశారు.. తమ జీతాల్లో నుంచి వరద బాధితులకు విరాళాలను అందజేస్తున్నట్లు తెలిపారు. తాజాగా విద్యుత్ ఉద్యోగులు కూడా అదే బాటలో నడిచారు.

వరద బాధితులకు తాము అండగా ఉన్నామంటూ.. విద్యుత్ ఉద్యోగులు ముందుకు వచ్చారు. తమ ఒకరోజు జీతాన్ని వరద బాధితులకు విరాళంగా అందజేశారు. విద్యుత్‌శాఖ మంత్రి గొట్టిపాటి రవికుమార్ నేతృత్వంలో విద్యుత్ ఉద్యోగుల జేఏసీ నేతలు.. ముఖ్యమంత్రి చంద్రబాబును ఎన్టీఆర్ జిల్లా కలెక్టరేట్‌లో కలిశారు. తమ ఒక్క రోజు జీతాన్ని సీఎం రిలీఫ్ ఫండ్‌కు విద్యుత్ ఉద్యోగులు విరాళంగా ఇచ్చారు.. మొత్తం రూ. 10కోట్ల 60 లక్షలు వరద సాయం కింద ఇస్తున్నారు. విద్యుత్ ఉద్యోగులను ముఖ్యమంత్రి చంద్రబాబు అభినందించారు.

రాష్ట్రవ్యాప్తంగా వరదల్లో విద్యుత్ ఉద్యోగులు కష్టపడి పని చేశారన్నారు మంత్రి గొట్టిపాటి రవికుమార్. వరద ప్రభావిత ప్రాంతాల్లో విద్యుత్ పునరుద్దరించడంలో ఉద్యోగులు అద్బుతంగా పని చేశారని.. వరద బాధితులకు సేవలతో పాటు.. వరద సాయం కింద ఒక్క రోజు జీతాన్ని ఇవ్వడం శుభపరిణామం అన్నారు. ముఖ్యమంత్రి చంద్రబాబు పడుతున్న కష్టానికి వారు కూడా ఊడతా భక్తిగా చేయూతనిచ్చారన్నారు. మంత్రి కూడా విద్యుత్ ఉద్యోగుల్ని అభినందించారు.

మరోవైపు మాజీమంత్రి సోమిరెడ్డి చంద్రమోహన్ రెడ్డి.. సర్వేపల్లి నియోజకవర్గం నుంచి దాదాపు రూ.3 కోట్లు విరాళంగా ముఖ్యమంత్రి చంద్రబాబుకు అందజేశారు. వీరిలో ముఖ్యమంత్రి సహాయ నిధికి జెమినీ ఎడిబుల్ ఆయిల్స్ అండ్ ఫాట్స్ లిమిటెడ్ రూ.2కోట్లు.. సీల్ సెమ్‌కార్ప్ థర్మల్ పవర్ ప్రాజెక్టు తరపున మరో రూ.50 లక్షలు విరాళం అందజేశారు. ఇతర పామాయిల్ పారిశ్రామిక వేత్తలు నుంచి దాదాపు మరో రూ.50 లక్షలు కలిపి మొత్తం రూ.3 కోట్లు చంద్రబాబుకు అందజేశారు. ఇలా ప్రతిరోజు పలువురు తమ విరాళాలను ముఖ్యమంత్రి చంద్రబాబుకు అందజేస్తున్నారు.

మరోవైపు రాష్ట్రంలో వరదలపై ముఖ్యమంత్రి చంద్రబాబు సమీక్ష చేశారు. ఉత్తరాంధ్రలో భారీ వర్షాలు కురవడంతో.. ఆ జిల్లాల మంత్రులకు కీలక బాధ్యతలు అప్పగించారు. మంత్రులు వెంటనే క్షేత్రస్థాయిలో తిరిగి సమీక్షిస్తూ ఎప్పటికప్పుడు తనకు నివేదించాలన్నారు. ఇటు విజయవాడలో ఇవాళ సాయంత్రంలోపు నగరంలో సాధారణ స్థితి ఉండాలని ఆదేశించారు. విజయవాడలో

ముంపునకు గురైన 32 వార్డుల్లో 26 చోట్ల సాధారణ పరిస్థితి ఉందని.. మూడు షిఫ్టుల్లో పారిశుద్ధ్య కార్మికులు పనులు చేస్తున్నట్లు మంత్రి నారాయణ తెలిపారు. అలాగే నగరంలో 95 శాతం విద్యుత్ పునరుద్ధరణ జరిగిందని మంత్రి గొట్టిపాటి రవికుమార్‌ సీఎంకు వివరించారు. 6 డివిజన్లలో వరద నీరు ఉందని.. ఈ సాయంత్రానికి పరిస్థితి సాధారణ స్థితి వస్తే పూర్తి స్థాయిలో విద్యుత్ పునరుద్దరిస్తామన్నారు.

మరోవైపు ఆప్కో, ఇతర సంస్థల నుంచి దుస్తులు తెప్పించి సర్వం కోల్పోయిన బాధితులకు పంపిణీ చేయాలని చంద్రబాబు ఆదేశించారు. వరద సహాయక చర్యల పర్యవేక్షణకు మాజీ మంత్రులు, ఎమ్మెల్యేలకు బాధ్యతలు అప్పగించారు.