వైసీపీ ఎమ్మెల్యే సాహసం.. ప్రాణాలకు తెగించి యువకుడ్ని కాపాడారు

వైఎస్సార్‌సీపీ ఎమ్మెల్యే పెద్ద సాహసమే చేశారు.. ప్రాణాలకు తెగించి వరదలో చిక్కుకున్న ఓ యువకుడ్ని రక్షించారు. అల్లూరి సీతారామరాజు జిల్లాలో కురిసిన వర్షాలకు.. పాడేరు మండలంలోని రాయగడ్డ కాజ్‌వేపై వరద పారుతోంది. అయితే ఓ యువకుడు రాయిగడ్డ దగ్గర కాజ్‌వేపై వరదను దాటే ప్రయత్నం చేయగా.. బైక్‌తో సహా కొట్టుకుపోయాడు. కొందరు స్థానికులు గమనించి కాపాడే ప్రయత్నం చేసినా ఫలితం దక్కలేదు. అయితే ఆ సమీపంలో ఉన్న పాడేరు ఎమ్మెల్యే మత్స్యరాస విశ్వేశ్వరరాజు ఈ విషయాన్ని గమనించారు.. వెంటనే అప్రమత్తం అయ్యారు.

ఎమ్మెల్యే విశ్వేశరరాజు వెంటనే గెడ్డలో దిగి బయటకు ఆ యువకుడ్ని లాగే ప్రయత్నం చేసినా.. సదరు బైకిస్ట్‌ తన బండిని వదలకపోవడంతో కిందకు కొట్టుకుపోయాడు. ఎమ్మెల్యే కేకలతో ఈ.కొత్తూరు, బొక్కేల ప్రజలు బైకిస్ట్‌ని అతి కష్టం మీద తాడును ఎమ్మెల్యేకు అందించగా.. ఇద్దరు జాగ్రత్తగా ఒడ్డుకు చేరారు. ఎమ్మెల్యే కూడా ఈ గెడ్డ వరద ఉధృతి నుంచి సురక్షితంగా బయటపడటంతో అందరూ ఊపిరి పీల్చుకున్నారు.

విశాఖపట్నం మర్రిపాలేనికి చెందిన యువకుడు పాడేరు సమీపంలో గుండేలిలో ఓ గిరిజన యువతిని వివాహం చేసుకున్నాడు. అత్తగారింటికి వచ్చిన ఆయన.. భారీ వర్షంతో కాజ్‌వే మీదుగా మత్యగెడ్డ ఉధృతంగా ప్రవహిస్తున్న సమయంలో గెడ్డను దాటే ప్రయత్నం చేశాడు. వరద పెరగడంతో.. అతడు కొట్టుకుపోయాడు. గెడ్డ ఉధృతిని పరిశీలించేందుకు వచ్చిన పాడేరు ఎమ్మెల్యే విశ్వేశ్వరరాజు స్ధానిక గిరిజనుల చొరవతో అతడ్ని కాపాడారు. యువకుడ్ని జాగ్రత్తగా ఒడ్డుకు చేర్చిన ఎమ్మెల్యేను స్థానికులు ప్రశంసించారు. ఎమ్మెల్యే యువకుడ్ని కాపాడే వీడియో సోషల్ మీడియాలో వైరల్ అవుతోంది.

మరోవైపు పాడేరు మండలం రాయిగడ్డ దగ్గర మరో ఘటన కూడా జరిగింది. ఓ యువకుడు బైక్ మీద వాగు దాటేందుకు ప్రయత్నించగా.. వరద ప్రవాహంలో కొట్టుకుపోయాడు. బైక్‌పై వాగు దాటుతుండగానే వరద ప్రవాహం పెరగడంతో.. యువకుడు వంతెనపై బైక్ పట్టుకుని దాదాపు గంటసేపు అక్కడే ఉండిపోవాల్సి వచ్చింది. వరద మరింత పెరగడంతో యువకుడు, బైక్‌తో పాటు వాగులో పడిపోయాడు. అతడు ఈదుకుంటూ వాగును దాటుకుని ఒడ్డుకు చేరుకోవడంతో అందరూ ఊపిరి పీల్చుకున్నారు. అతడి బైక్ మాత్రం వాగులో కొట్టుకుపోయింది.