ఏపీకి మరో వందేభారత్ రైలు!.. షెడ్యూల్, టైమింగ్స్ వివరాలు ఇవే..

ఆంధ్రప్రదేశ్‌కు కేంద్రం మరో శుభవార్త వినిపించనున్నట్లు తెలిసింది. ఏపీకి మరో వందేభారత్ రైలును కేటాయించనున్నట్లు సమాచారం. ఏపీ మీదుగా ఇప్పటికే ఐదు వందేభారత్ రైళ్లు నడుస్తున్నాయి. విశాఖపట్నం- సికింద్రాబాద్ మధ్య రెండు, సికింద్రాబాద్- తిరుపతి, విజయవాడ- చెన్నై, కాచిగూడ- బెంగళూరు మార్గంలో ఇప్పటికే వందేభారత్ రైళ్లు నడుస్తున్నాయి. తాజాగా విశాఖపట్నానికి మూడో వందేభారత్ రైలును నడిపేందుకు ప్రయత్నాలు జరుగుతున్నాయి. విశాఖపట్నం నుంచి ఒడిశాలోని దుర్గ్‌కు వందేభారత్ ట్రైన్ నడిపే యోచనలో రైల్వే అధికారులు ఉన్నట్లు సమాచారం. అయితే వాల్తేరు డివిజన్ నుంచి దీనిపై ఎలాంటి అధికారిక ప్రకటన లేదు.

మరోవైపు దుర్గ్- విశాఖపట్నం వందేభారత్ రైలు ఉదయం ఆరు గంటలకు దుర్గ్‌లో బయల్దేరనుంది. మధ్యాహ్నం 1.55 గంటలకు విశాఖపట్నం చేరుకుంటుంది. ఇక తిరిగి మధ్యాహ్నం 2 గంటల 50 నిమిషాలకు విశాఖపట్నం నుంచి బయల్దేరి రాత్రి పది గంటల 50 నిమిషాలకు దుర్గ్ చేరుకోనున్నట్లు తెలిసింది. మరోవైపు ఏపీ నుంచి బెంగళూరుకు సైతం వందేభారత్ రైళ్లు నడపాలనే ప్రతిపాదనలు వస్తున్నాయి. తెలుగు రాష్ట్రాలలో వందేభారత్ రైళ్లకు మంచి స్పందన వస్తోంది. ఈ నేపథ్యంలోనే విజయవాడ నుంచి బెంగళూరుకు సైతం వందేభారత్ రైళ్లను నడపాలని రైల్వేశాఖకు ప్రతిపాదనలు వెళ్లాయి. ఈ ప్రతిపాదనను పరిశీలిస్తామని రైల్వే శాఖ మంత్రి అశ్వినీ వైష్ణవ్ కూడా చెప్పారు. దీంతో ఈ మార్గంలో కూడా వందేభారత్ రైలు నడుపుతారనే వార్తలు వస్తున్నాయి.

కాచిగూడ నుంచి బెంగళూరుకు ఓ వందేభారత్ రైలు ప్రస్తుతం నడుస్తోంది. అయితే ఇది అనంతపురం, ధర్మవరం మీదుగా నడుస్తోంది. రాజధాని ప్రాంతం నుంచి నేరుగా బెంగళూరుకు వందేభారత్ రైలు లేదు. దీంతో ఈ మార్గంలోనూ వందేభారత్ రైలు నడపాలనే డిమాండ్లు వస్తున్నాయి. దీనిపై కేంద్రం కూడా సానుకూలత వ్యక్తం చేసింది. అయితే అటు విజయవాడ నుంచి ముంబైకు కూడా వందేభారత్ రైలు నడపాలని డిమాండ్లు వచ్చాయి. అయితే ఈ ప్రతిపాదనలను కేంద్ర రైల్వేశాఖ అంగీకరించలేదు. విజయవాడ నుంచి మంబయి మధ్య వందేభారత్ రైలు పగటిపూట నడపటం అసాధ్యమని ఇటీవల అశ్వినీ వైష్ణవ్ తేల్చేశారు. ఈ నేపథ్యంలో అన్నీ అనుకున్నట్లు జరిగితే విశాఖ - దుర్గ్‌తో పాటు.. విజయవాడ- బెంగళూరు మధ్యన కూడా వందేభారత్ రైలు నడవనుంది.