పాక్‌లో భారీగా చమురు, గ్యాస్ నిక్షేపాలు.. బిగ్ ట్విస్ట్ ఇచ్చిన ఉన్నతాధికారి

ఆర్థికంగా, రాజకీయంగా, అభివృద్ధి పరంగా, శాంతి భద్రతల పరంగా.. ఇలా అన్ని రంగాల్లో అథఃపాతాళానికి పడిపోయిన పాకిస్తాన్.. ప్రపంచ దేశాలు, సంస్థలు ఇచ్చే రుణాలపై కాలం వెళ్లదీస్తోంది. విదేశీ మారక నిల్వలు పూర్తిగా అడుగంటిపోవడంతో దిగుమతులు తగ్గిపోయి.. పాక్‌లో నిత్యావసర ధరలు భారీగా పెరిగిపోయాయి. దీంతో జనం రోడ్లపైకి వచ్చి తీవ్ర ఆందోళనలు, నిరసనలు చేస్తున్నారు. ఇలాంటి క్రమంలోనే పాకిస్తాన్‌కు ఊహించని జాక్‌పాట్ తగిలింది. పాక్‌లో భారీగా ఆయిల్, గ్యాస్ నిల్వలు ఉన్నాయంటూ ఓ సర్వే నివేదిక వెల్లడించింది. ఈ విషయాన్ని పాక్ సీనియర్ భద్రతా అధికారి ఒకరు డాన్ న్యూస్‌కు చెప్పారు. పాక్‌లో ఈ సహజవాయు నిల్వలు కనుగొనేందుకు మరో మిత్రదేశం సహకారంతో 3 ఏళ్ల పాటు సర్వే చేశామని డాన్ న్యూస్‌కు వివరించారు. ఈ నివేదిక ప్రకారం.. ప్రపంచంలోనే నాలుగో అతిపెద్ద చమురు, గ్యాస్ నిక్షేపాలు పాకిస్తాన్ ఉన్నట్లు తేలిందని చెప్పారు.

అయితే ఈ నిక్షేపాలతో పాక్ దశ తిరిగిపోతుందని అంతా భావించారు. అదే సమయంలో మరో బిగ్ ట్విస్ట్ వచ్చి పడింది. ఆయిల్ అండ్ గ్యాస్ డెవలప్‌మెంట్ కంపెనీ-ఓజీడీసీఎల్‌కు చెందిన ఓ ఉన్నతాధికారి షాకింగ్ విషయాలు వెల్లడించారు. అది కేవలం అరేబియా సముద్రంలో భూకంపాలకు సంబంధించిన అంచనా మాత్రమేనని తేల్చి చెప్పారు. అయితే ఈ సర్వే డేటాను ఇంకా విశ్లేషిస్తున్నామని తెలిపారు. అందులో హైడ్రోకార్బన్ వనరుల సామర్థ్యాన్ని అంచనా వేయడానికి సమాచారాన్ని విశ్లేషిస్తున్నామని.. ఇలాంటి సమయంలోనే భారీగా హైడ్రో కార్బన్ నిల్వలు కనిపెట్టామని చెప్పడం తొందరపాటు చర్య అవుతుందని పేర్కొన్నారు. ఈ భూకంప అంచనా మాత్రమేనని.. దీని ఆధారంగా పాకిస్తాన్‌లో ఆయిల్, గ్యాస్ నిక్షేపాలను గుర్తించినట్లు కాదని చెప్పారు.

ఈ భూకంప సర్వే అనేది కేవలం సముద్ర ఉపరితలం కింద ఉన్న నిర్మాణాల గురించి మాత్రమే విషయాలు చెబుతుందని సదరు అధికారి పేర్కొన్నారు. ఇంతకుముందు 2018లో కూడా ఇలాంటి ప్రయత్నం చేసినట్లు చెప్పారు. ప్రస్తుతం దివాళా అంచున ఉన్న పాకిస్తాన్‌‌.. విదేశీ, ప్రభుత్వ-ప్రైవేటు పెట్టుబడులను పెంచేందుకు.. తమ దేశంలో వనరుల కోసం తీవ్రంగా ప్రయత్నాలు చేస్తోంది. ఈ క్రమంలోనే చమురు, గ్యాస్ నిల్వలను అన్వేషించడానికి ఆర్థిక పెట్టుబడి, సర్వే, సెర్చింగ్ కోసం కనీసం 3 బిలియన్ డాలర్లు అంటే మన భారత కరెన్సీలో రూ.25వేల కోట్లు అవసరం అవుతాయని అంచనా వేశారు.

ఇక 2018లో అమెరికాకు చెందిన ఎక్సాన్‌మొబైల్ అనే మల్టీనేషనల్ ఆయిల్ అండ్ గ్యాస్ కంపెనీ.. పాకిస్తాన్‌లో అన్వేషణ ప్రారంభించింది. ఆయిల్ నిల్వల కోసం 5వేల మీటర్ల వరకు డ్రిల్లింగ్ చేసి తనిఖీలు చేసింది. 17సార్లు ప్రయత్నించినా ఎలాంటి నిల్వలు దొరక్కపోవడంతో.. తన ఆపరేషన్‌ను రద్దు చేసుకుంది. 2023లో పాకిస్తాన్ మొత్తంగా 17.5 బిలియన్ డాలర్ల ఎనర్జీని దిగుమతి చేసుకుంది. వచ్చే 7ఏళ్లకు అది దాదాపు రెట్టింపు అంటే 31 బిలియన్ డాలర్లు అవుతుందని ఎక్స్‌ప్రెస్ ట్రిబ్యూన్ రిపోర్ట్ అంచనా వేసింది. ప్రస్తుతం పాకిస్తాన్ తమ దేశ అవసరాల కోసం 29శాతం గ్యాస్, 85శాతం ఆయిల్, 20శాతం బొగ్గు, 50శాతం ఎల్పీజీని దిగుమతి చేసుకుంటోంది.