ఏపీ మంత్రికి తప్పని పాస్‌పోర్ట్ కష్టాలు.. సేమ్ జగన్‌లానే, ఏపీ హైకోర్టులో పిటిషన్

ఆంధ్రప్రదేశ్‌ మంత్రికి కూడా పాస్‌పోర్ట్ కష్టాలు తప్పలేదు.. ఆయన కూడా ఏపీ హైకోర్టును ఆశ్రయించారు. తన పాస్‌పోర్ట్‌ను పునరుద్ధరించేలా ప్రాంతీయ పాస్‌పోర్ట్‌ అధికారిని ఆదేశించాలని కోరుతూ మంత్రి కొల్లు రవీంద్ర హైకోర్టులో పిటిషన్ దాఖలు చేశారు.. గురువారం విచారణ జరిపింది. క్రిమినల్‌ కేసులు పెండింగ్‌లో ఉన్నాయనే కారణంతో పాస్‌పోర్ట్‌ను తిరస్కరించొద్దని సుప్రీంకోర్టు, హైకోర్టులు పలు సందర్భాల్లో తీర్పులిచ్చాయని పిటిషనర్‌ తరఫున లాయర్ ఎంవీ రమణకుమారి వాదనలు వినిపించారు. అయితే దీనికి సంబంధించి పూర్తి వివరాలు సమర్పించాలని కేంద్ర హోంశాఖ, విజయవాడ ప్రాంతీయ కార్యాలయం పాస్‌పోర్ట్‌ అధికారిని ఆదేశించింది. తదుపరి విచారణను హైకోర్టు శుక్రవారానికి వాయిదా వేసింది. ఈ మేరకు న్యాయమూర్తి జస్టిస్‌ నిమ్మగడ్డ వెంకటేశ్వర్లు ఉత్తర్వులిచ్చారు.

తనపై క్రిమినల్‌ కేసులు పెండింగ్‌లో ఉన్నాయని.. ఆ కారణంగా తన పాస్‌పోర్ట్‌ను పునరుద్ధరించకపోవడం సరికాదని పిటిషన్‌లో మంత్రి రవీంద్ర పేర్కొన్నారు. తాను ఈనెల 24 నుంచి 26 వరకు అమెరికాలో జరగనున్న మైన్‌ ఎక్స్‌పో కార్యక్రమానికి హాజరవ్వాల్సి ఉందని.. అందుకే తన పాస్‌పోర్ట్‌ను పునరుద్ధరించేలా ఆదేశాలివ్వాలని హైకోర్టును ఆశ్రయించారు. మరి హైకోర్టు మంత్రి పాస్‌పోర్ట్ పునరుద్ధరణపై ఎలాంటి నిర్ణయం తీసుకుంటుందన్నది చూడాలి.

మరోవైపు వైఎస్ జగన్‌కు కూడా పాస్‌పోర్ట్ కష్టాలు ఎదురయ్యాయి. దీంతో ఆయన కూడా హైకోర్టును ఆశ్రయించగా.. కోర్టు కీలక తీర్పు ఇచ్చింది. జగన్ పాస్‌పోర్ట్‌ను ఐదేళ్లకు పొడగించాలని ఆదేశించింది.. అయితే పాస్‌పోర్ట్‌కు ఎన్వోసీ జారీ విషయంలో షరతులు వర్తిస్తాయని తెలిపింది. తమ ముందు హాజరై రూ.20 వేల సొంత పూచీకత్తు సమర్పించాలని విజయవాడ ప్రత్యేక కోర్టు విధించిన షరతు విషయంలో జోక్యం చేసుకోబోమని చెప్పింది. కోర్టు ఇచ్చిన ఆదేశాలకు ఎవరైనా కట్టుబడి ఉండాల్సిందేన్న విషయం ప్రజా జీవితంలో ఉన్న పిటిషనర్‌ (జగన్‌)కు బాగా తెలుసని అభిప్రాయపడింది. ఓవైపు కోర్టు విచారణ ప్రక్రియకు లోబడి ఉన్నానని చెబుతూనే.. మరోవైపు పూచీకత్తు సమర్పించాలని ప్రత్యేక కోర్టు ఇచ్చిన ఉత్తర్వులను ప్రశ్నించడంపై జగన్ తీరును తప్పుపట్టింది.

అలాగే విజయవాడలోని కోర్టుకు హాజరైతే భద్రతాపరమైన ఇబ్బందులు ఎదురవుతాయని జగన్‌ చెబుతున్నారని.. కానీ రాజకీయ ప్రముఖుల కేసులను విచారణను విజయవాడ ప్రత్యేక కోర్టు దగ్గర సర్వసాధారణమే అన్నారు. విజయవాడ ప్రత్యేక కోర్టు పూచీకత్తు నిమిత్తం విధించిన షరతు కఠినమైనది కాదని అభిప్రాయపడింది. ఆ విషయంలో తాము జోక్యం చేసుకోవాల్సిన అవసరం లేదని చెప్పింది. విజయవాడ ప్రత్యేక కోర్టు జగన్ పాస్‌పోర్ట్‌ వ్యవహారంలో ఎన్వోసీ ఇచ్చేందుకు స్వయంగా హాజరై పూచీకత్తు సమర్పించాలని షరతు విధించింది. అలాగే ఏడాది కాలానికి మాత్రమే పాస్‌పోర్ట్‌ జారీకి ఎన్వోసీ ఇవ్వడాన్ని జగన్ హైకోర్టు సవాల్ చేశారు.. పిటిషన్ దాఖలు చేయగా విచారణ జరిపి తీర్పును ఇచ్చింది.