ఐటీ ఉద్యోగికి బ్యాంక్ నుంచి ఫోన్.. ఆయనకు తెలియకుండా రూ.13 లక్షలు లోన్

తిరుపతికి చెందిన సాఫ్ట్‌వేర్ ఉద్యోగికి బ్యాంక్ నుంచి ఫోన్ కాల్ వచ్చింది. 'మీరు మా బ్యాంక్‌లో రూ.13.8 లక్షలు తీసుకున్నారు'అంటూ సమాచారం ఇచ్చారు. దీంతో అవాక్కైన ఉద్యోగి ఏం జరిగిందా అని ఆలోచిస్తే అసలు సంగతి గుర్తుకొచ్చింది. ఆయన చేసిన చిన్న తప్పుతో ఈ మోసం మొత్తం జరిగింది. నగరంలోని విద్యానగర్‌కు చెందిన సాఫ్ట్‌వేర్‌ ఉద్యోగి రూప్‌కుమార్‌కు ఈ నెల 5న ఓ ఫోన్ కాల్ వచ్చింది.. లిఫ్ట్ చేయగానే.. అవతలి వ్యక్తి సైబర్‌ క్రైమ్‌ పోలీస్ అధికారిగా పరిచయం చేసుకున్నాడు.

ఇరాన్‌కు వస్తువులు అక్రమంగా సరఫరా చేశారంటూ రూప్‌కుమార్‌ను బెదిరించారు. ఈ కేసు విచారణ కోసం ముంబై రావాలని చెప్పి.. బ్యాంకు అకౌంట్ వివరాలు, ఓటీపీలు తీసుకున్నారు. ఆయన కూడా అమాయకంగా వారికి వివరాలన్నీ చెప్పారు. కొద్ది రోజులు గడిచిన తర్వాత.. బ్యాంక్ నుంచి రూప్‌కుమార్‌కు బ్యాంక్ నుంచి ఫోన్ కాల్ వచ్చింది.. రూ.13.8 లక్షలు రుణం తీసుకున్నట్లు బ్యాంకు సిబ్బంది చెప్పడంతో అవాక్కయ్యారు. తనకు తెలియకుండా లోన్ ఎవరో తీసుకున్నారని గ్రహించిన రూప్‌కుమార్.. 10 రోజుల క్రితం ఏం జరిగిందో గుర్తుతెచ్చుకున్నారు.. అప్పుడు తాను మోసపోయినట్లు గుర్తించారు.

రూప్‌కుమార్ వెంటనే తిరుపతి జిల్లా ఎస్పీ సుబ్బారాయుడికి ఫిర్యాదు చేశారు. ఈ ఘటనపై తిరుపతి రూరల్ పోలీసు స్టేషన్‌లో కేసు నమోదైంది. ఇటీవల కాలంలో ఇలాంటి సైబర్ మోసాలు పెరిగిపోయాయి.. పోలీసులు, జీఎస్టీ అధికారులు, సీబీఐ అధికారులమటూ కాల్స్ చేస్తూ కొందరు కేటుగాళ్లు అమాయకుల్ని మోసం చేస్తున్నారు. డ్రగ్స్ కేసులో, అక్రమ ఆయుధాల రవాణా కేసుల్లో చిక్కుకున్నారంటూ బెదిరింపులకు దిగుతున్నారు. అలాగే కొరియర్లు ( బుక్ చేసిన కొరియర్‌లో డ్రగ్స్) పేరుతో కూడా బెదిరిస్తున్నారు. ఇలాంటి ఫేక్ కాల్స్‌పై పోలీసులు ఇప్పటికే ప్రజల్ని అప్రమత్తం చేశారు. ఇలాంటి కాల్స్ విషయంలో జాగ్రత్తగా ఉండాలని.. ఒకవేళ ఈ కాల్స్‌పై అనుమానాలు ఉంటే వెంటనే పోలీసుల్ని సంప్రదించాలని సూచించారు. అలాగే వ్యక్తిగత సమాచారం, బ్యాంక్ అకౌంట్.. క్రెడిడ్, డెబిట్ కార్డుల వివరాలను ఎవరితోనూ షేర్ చేసుకోవద్దని సూచిస్తున్నారు.