ఏపీలో మరో కొత్త పార్టీ ఏర్పాటు,,,,,మాజీ ఎంపీ హర్షకుమార్

ఏపీలో మరో కొత్త పార్టీ ఏర్పాటు దిశగా అడుగులుపడుతున్నాయి.. ఈ మేరకు మాజీ ఎంపీ కీలక ప్రకటన చేశారు. రాష్ట్రంలో ఎస్సీ వర్గీకరణకు వ్యతిరేకంగా కలసివచ్చే వ్యక్తులు, సంఘాలతో త్వరలోనే సరికొత్త రాజకీయ పార్టీని స్థాపిస్తున్నామని చెప్పారు మాజీ ఎంపీ జీవీ హర్షకుమార్‌. ఎస్సీ రిజర్వేషన్‌ వర్గీకరణ - క్రీమీలేయర్‌ను వ్యతిరేకిస్తూ గుంటూరులో జరిగిన సదస్సులో ముఖ్య అతిథిగా హాజరయ్యారు. ఈ సందర్భంలో కొత్త పార్టీపై ఆయన ప్రకటన చేశారు. రాష్ట్రంలో అధికార, ప్రతిపక్ష పార్టీలు వర్గీకరణకు అనుకూలంగా ఉండడంతో.. కొత్త పార్టీ ఏర్పాటుపై నిర్ణయం తీసుకున్నట్లు తెలిపారు. కొత్త పార్టీకి సంబంధించిన విధి, విధానాలు, నాయకుడు ఎవరు? అనే అంశాలపై త్వరలోనే కార్యాచరణ ప్రకటిస్తామన్నారు.

ఎస్సీ వర్గీకరణను దేశం మొత్తం వ్యతిరేకిస్తుంటే.. తెలుగు రాష్ట్రాల్లో మాత్రం మాదిగలు భిన్నంగా వ్యవహరిస్తున్నారన్నారు హర్షకుమార్. ఓ వ్యక్తి సృష్టించిన ఉద్యమంతో.. రెండు రాష్ట్రాలకు చెందిన మాదిగలు పోరాటంలోకి వెళ్తున్నారని వ్యాఖ్యానించారు. ఉద్యోగస్తుల పిల్లలకు క్రీమీలేయర్‌ను పొందుపరిచిన కారణంగా అన్యాయం జరుగుతుందని.. ఈ విషయంలో కేంద్రం మరోసారి సమీక్షకు వెళ్లే అవకాశం ఉందని అభిప్రాయాన్ని వ్యక్తం చేశారు. రాష్ట్రంలో జిల్లాల వారీగా వర్గీకరణ ఎలా చేపడతారో ప్రభుత్వమే సమాధానం చెప్పాలని హర్షకుమార్ డిమాండ్ చేశారు.

సుప్రీం కోర్టు మార్గదర్శకాలకు అనుగుణంగా వర్గీకరణ చేపడతామని గుంటూరు జిల్లా తాడికొండ ఎమ్మెల్యే తెనాలి శ్రావణ్‌కుమార్‌ చెప్పుకొచ్చారు. అలాగే రాష్ట్రంలో జిల్లాల వారీగా వర్గీకరణ చేస్తామని చంద్రబాబు చెప్పడం అభినందనీయం అన్నారు. వర్గీకరణ కంటే ముందు ప్రభుత్వ కొలువుల కోసం పోరాటం చేయాలని.. దీనిపై యువతను చైతన్య పరచాలి అన్నారు. ఎస్సీ వర్గీకరణను హర్షకుమార్ వ్యతిరేకిస్తున్నారు.. క్రిమీలేయర్ వల్ల మొత్తం దళిత జాతి నష్టపోతుందని చెబుతున్నారు.

జీవీ హర్షకుమార్ 2004, 2009లో అమలాపురం నుంచి కాంగ్రెస్ పార్టీ తరఫున ఎంపీగా గెలిచారు. రాష్ట్ర విభజన తర్వాత కొద్దిరోజులు రాజకీయాలకు దూరంగా ఉన్నారు.. 2019 ఎన్నికలకు ముందు అనూహ్యంగా టీడీపీలో చేరారు. ఆ తర్వాత కొంతకాలానికి ఆ పార్టీకి రాజీనామా చేసి మళ్లీ కాంగ్రెస్ పార్టీలో చేరారు.. కొంతకాలం తర్వాత కాంగ్రెస్‌ కార్యక్రమాలకు దూరంగా ఉంటున్నారు. తాజాగా ఎస్సీ వర్గీకరణకు వ్యతిరేకంగా పోరాటం చేస్తున్నారు.