సిరియాపై అమెరికా సైన్యం వైమానిక దాడి.. 37 మంది ఐఎస్ ఉగ్రవాదులు హతం

లెబనాన్‌లోని హెజ్బొల్లా మిలిటెంట్లే లక్ష్యంగా ఇజ్రాయేల్‌ వరుస దాడులతో పశ్చిమాసియా రగిలిపోతోంది. రోజు రోజుకు పెరుగుతోన్న ఉద్రిక్తతలతో ప్రాంతీయ యుద్ధ విస్తరణ భయాలు కమ్ముకుంటున్నాయి. ఈ తరుణంలో సిరియాలో అమెరికా సైన్యం వైమానిక దాడులతో విరుచుకుపడింది. ఈ దాడుల్లో ఇస్లామిక్ స్టేట్ గ్రూప్, ఆల్‌ఖైదా అనుబంధ సంస్థ హుర్రాస్ అల్-దీన్‌కు చెందిన 37 మంది ఉగ్రవాదులు హతమైనట్టు అమెరికా ప్రకటించింది. తాము మట్టుబెట్టినవారిలో ఇద్దరు కీలక నేతలు కూడా ఉన్నట్లు పేర్కొంది. వాయువ్య, సెంట్రల్ సిరియాలో రెండు వేర్వేరు ఆపరేషన్లు చేపట్టినట్టు అమెరికా సెంట్రల్ కమాండ్ తెలిపింది.

అల్‌ఖైదా అనుబంధ ఉగ్రవాద సంస్థ‘హుర్రాస్ అల్-దీన్‌’కు చెందిన ఓ కీలక నేతతోపాటు మరో ఎనిమిది మందిని లక్ష్యంగా చేసుకుని వాయువ్య సిరియాపై మంగళవారం దాడి చేసినట్లు వెల్లడించింది. ఆ సీనియర్‌ కమాండర్ స్థానికంగా సైనిక కార్యకలాపాలను పర్యవేక్షిస్తున్నట్టు తెలిపింది. ఉగ్రవాద నిరోధక ప్రయత్నాలకు విఘాతం కలిగించేలా దాడులకు ఈ గ్రూప్ కుట్ర పన్నడం, సమన్వయం చేసుకోవడం కొనసాగిస్తోందని చెప్పారు. అంతకు ముందు మధ్య సిరియాలోని ఐసిస్‌ ఉగ్రవాద శిక్షణ శిబిరంపై పెద్దఎత్తున వైమానిక దాడలు నిర్వహించి.. 28 మంది ఉగ్రవాదులను అంతమొందించినట్లు చెప్పింది. వీరిలో సిరియాకు చెందిన నలుగురు కీలక ఉగ్రవాదులు ఉన్నారని వివరించింది.

తాజా దాడులతో ఐసిస్‌ శక్తిసామర్థ్యాలు దెబ్బతిన్నట్లు అమెరికా ప్రకటించింది. తమ ప్రయోజనాలకు విఘాతం కలిగించే, మిత్రదేశాలు, భాగస్వాములకు వ్యతిరేకంగా కార్యకలాపాలు సాగించేవారి విషయంలో ఉపేక్షించబోమని తెలిపింది. ఇదిలా ఉండగా.. గతంలో పెద్దఎత్తున సిరియా భూభాగాన్ని తమ అధీనంలోకి తీసుకున్న ఐసిస్‌ గ్రూప్‌.. మళ్లీ విస్తరించకుండా అడ్డుకునేందుకు అక్కడ అమెరికా ప్రస్తుతం దాదాపు 900 మంది భద్రత సిబ్బందిని మోహరించింది.

స్థానిక భాగస్వాములు కుర్దిష్ నాయకత్వంలోని సిరియన్ డెమొక్రాటిక్ ఫోర్స్‌తో కలిసి అమెరికా పనిచేస్తోంది. ఇరాన్ మద్దతున్న ఉగ్రవాద సంస్థలు కార్యకలాపాలు సాగిస్తోన్న వ్యూహాత్మకంగా కీలకమైన వాయువ్య సిరియాపై అమెరికా దృష్టిసారించింది. ఇరాక్‌ సరిహద్దులకు సమీపంగా ఉండే ఈ ప్రాంతం.. ఇరాన్, సిరియా, ఇరాక్ మధ్య ఆయుధాలు, సిబ్బంది తరలింపునకు కీలకమైంది.