ఎయిర్‌పోర్టులో పేలిన రెండో ప్రపంచ యుద్ధం నాటి బాంబు.. పేలుడు ధాటికి భారీ గుంత

రెండో ప్రపంచ యుద్ధం జరిగి ఇప్పటికి దాదాపు 80 ఏళ్లు అవుతోంది. అయితే వివిధ దేశాల్లో ఇప్పటికీ రెండో ప్రపంచ యుద్ధం నాటి బాంబులు బయటపడుతున్నాయి. కొన్ని ప్రాంతాల్లో అవి పేలడం కూడా చూస్తున్నాం. తాజాగా రెండో ప్రపంచ యుద్ధం కాలం నాటి ఒక భారీ బాంబు జపాన్‌లో పేలింది. అమెరికాకు చెందిన ఈ బాంబు.. పేలుడుతో అంతా ఒక్కసారిగా ఉలిక్కి పడ్డారు. ఈ భారీ బాంబు పేలడంతో ఆ ప్రాంతంలో పెద్ద గొయ్యి కూడా ఏర్పడింది. అయితే అదృష్టవశాత్తు ఈ బాంబు పేలుడులో ఎలాంటి ప్రాణ నష్టం సంభవించలేదని అధికారులు వెల్లడించారు.

జపాన్‌లోని మియాజాకీ ఎయిర్‌పోర్టులో ఈ బాంబు పేలినట్లు అక్కడి అధికారులు వెల్లడించారు. దాదాపు 500 పౌండ్ల బరువు అంటే 225 కిలోల బరువు ఉన్న ఆ భారీ బాంబు ఎయిర్‌పోర్టులో పేలడం పెను సంచలనం సృష్టించింది. అయితే అది అమెరికాకు చెందిందని.. దాన్ని రెండో ప్రపంచ యుద్ధ సమయంలో పాతిపెట్టినట్లు జపాన్ అధికారులు గుర్తించారు. ఇక ఆ బాంబు పేలుడు సమయంలో దానికి సమీపంలో ఎయిర్‌పోర్టులో విమానాలు లేకపోవడంతో పెను ప్రమాదం తప్పినట్లు స్థానిక అధికారులు వెల్లడించారు. ఈ ఘటనలో ఎవరికీ ఎలాంటి గాయాలు కాలేదని చెప్పారు. అయితే బాంబు పేలుడు ధాటికి ఆ ప్రాంతంలో పెద్ద గుంత ఏర్పడినట్లు చెప్పారు.

ఇక ఈ బాంబు పేలుడు సమాచారం అందుకున్న జపాన్ సెల్ఫ్‌ డిఫెన్స్‌ ఫోర్స్‌, స్థానిక పోలీసులు హుటాహుటిన ఘటనా స్థలానికి చేరుకున్నారు. అయితే ఆ భారీ గొయ్యి కారణంగా దాదాపు మియాజాకీ ఎయిర్‌పోర్టు నుంచి రాకపోకలు సాగించే 80కి పైగా విమానాలను రద్దు చేసినట్లు ఎయిర్‌పోర్టు అధికారులు వెల్లడించారు. పరిస్థితిని చక్కదిద్దడానికి ఒక రోజు పడుతుందని.. తర్వాతి రోజు నుంచి విమానాలు యథాతథంగా సేవలు అందిస్తాని జపాన్ చీఫ్‌ కేబినెట్‌ సెక్రటరీ యోసిమాస హయాషీ వెల్లడించారు.

ఇక ఆ మియాజాకీ ఎయిర్‌పోర్టును 1943లో నిర్మించారు. రెండో ప్రపంచ యుద్ధ సమయంలో మాజీ ఇంపీరియల్‌ జపనీస్‌ నేవీ ఫైట్‌ ట్రేనింగ్‌ ఫీల్డ్‌గా ఈ మియాజాకీని ఉపయోగించేవారు. ఆత్మాహుతి దాడి ఆపరేషన్‌లో భాగంగా కొందరు పైలట్లు ఈ మియాజాకీ ఎయిర్‌పోర్టు నుంచి వెళ్లేవారు. అయితే రెండో ప్రపంచ యుద్ధం సమయంలో అమెరికా సైన్యం వేసిన కొన్ని బాంబుల్లో అప్పుడు పేలనివి ఈ ప్రాంతంలో ఉన్నట్లు జపాన్ రక్షణ మంత్రిత్వశాఖ అధికారులు తెలిపారు. ఇలా ఎన్నో పేలని బాంబులను జపాన్‌ భూభాగం చుట్టూ పాతిపెట్టినట్లు తెలుస్తోంది.