వారిని ప్రత్యేక విమానంలో భారత్‌కు తరలింపు.. ఎన్నికల వేళ అమెరికా కీలక నిర్ణయం

అధ్యక్ష ఎన్నికల వేళ అమెరికా కీలక నిర్ణయం తీసుకుంది. తమ దేశంలోని అక్రమ వలసల నియంత్రణకు ప్రయత్నిస్తోన్న యూఎస్ డిపార్ట్‌మెంట్ ఆఫ్‌ హోంల్యాండ్‌ సెక్యూరిటీ (డీహెచ్‌ఎస్‌).. పలు దేశాలకు చెందిన వారిని వెనక్కి పంపుతోంది. ఇందులో భాగంగా తమ దేశంలో అక్రమంగా ఉంటున్న భారతీయులను వెనక్కి పంపించినట్లు డీహెచ్‌ఎస్‌ వెల్లడించింది. ప్రత్యేక విమానంలో అక్టోబరు 22న వీరిని పంపినట్లు తెలిపింది. భారత ప్రభుత్వ సహకారంతోనే ఈ చర్యలు చేపట్టామని స్పష్టం చేసింది. ‘చట్టవిరుద్ధంగా అమెరికాలో ఉంటున్న భారతీయ పౌరులను వెనక్కి పంపాలని నిర్ణయించుకున్నాం.. వలస వచ్చిన విదేశీయులు స్మగ్లర్ల చేతిలో బందీలు కాకుండా ఉండేందుకే ఈ చర్యలు తీసుకుంటున్నాం’ అని డీహెచ్ఎస్‌ సీనియర్‌ అధికారి క్రిస్టీ ఎ.కనెగాల్లో ఓ ప్రకటనలో పేర్కొన్నారు.

గత జూన్‌‌లో ది బోర్డర్‌ ప్రెసిడెన్షియల్‌ విడుదల చేసిన నివేదిక ప్రకారం.. అమెరికా నైరుతి సరిహద్దుల్లో అనధికారిక వలసలు 55 శాతం తగ్గినట్లు డీహెచ్‌ఎస్ గుర్తించింది. ఈ క్రమంలోనే 2024 ఆర్థిక సంవత్సరంలో దాదాపు 1,60,000 మంది అక్రమ వలసదారులను వెనక్కి పంపినట్లు తెలిపింది. 495కు పైగా ప్రత్యేక విమానాల్లో 145 దేశాలకు చెందిన పౌరులను వెనక్కి పంపామని పేర్కొంది. వీరిలో భారత్‌తో పాటు కొలంబియా, ఈక్వెడార్‌, పెరూ, ఈజిప్ట్‌, మారిటానియా, సెనెగల్‌, ఉజ్బెకిస్థాన్‌, చైనా దేశాల పౌరులు ఉన్నారని తెలిపింది.

ఈ చర్యలు కఠినమైన సరిహద్దు సమస్యలను పరిష్కరించడం, అక్రమ వలసలను నిరోధించడంతో పాటు చట్టబద్ధమైన వలసల మార్గాలను ప్రోత్సహించేందుకేనని అమెరికా స్పష్టం చేసింది. చట్టబద్ధమైన అనుమతి లేకుండా అమెరికాలో ఉన్న వారి పౌరులను స్వదేశానికి తీసుకెళ్లేలా ఆయా విదేశీ ప్రభుత్వాలతో నిరంతరం సంప్రదింపులు జరుపుతున్నామని పేర్కొంది.

అగ్రరాజ్యంగా చలామణి అవుతోన్న అమెరికా అభివృద్ధి చెందిన దేశం కావడంతో ఉద్యోగ, ఉపాధి అవకాశాలు మెండుగా ఉంటాయి. అందుకే ఉద్యోగాలను వెతుక్కూంటూ ప్రపంచ దేశాల్లోని ప్రజలు అమెరికాలో అడుగుపెడతారు. అక్కడే స్థిరపడేందుకు ఎన్నో రకాల ప్రయత్నాలు చేస్తూ ఉంటారు. అయితే అమెరికాలోకి ఏటా ఎంత మందిని అనుమతించాలి అనేది అక్కడి ప్రభుత్వం నిర్ణయిస్తుంది. ఒక్కో దేశానికి సంవత్సరానికి కొన్ని వర్కింగ్ వీసాలు మంజూరు చేస్తుంది. కానీ, చాలా మంది వీసాలు లేకుండా అక్రమ మార్గాల్లో సరిహద్దులు దాటి అమెరికాలోకి ప్రవేశిస్తూ ఉంటారు. ఇలాంటి వారు అధికారులకు చిక్కి.. జైలు జీవితం అనుభవించాల్సి ఉంటుంది. ఈ క్రమంలోనే అమెరికాలో నివసిస్తున్న అక్రమ వలస దారుల్లో భారతీయులు మూడో స్థానంలో ఉంది. మన కంటే ముందు మెక్సికో, ఎల్‌సాల్విడార్ ఉన్నాయి.