అయోధ్యలో దీపావళి వేడుకలు.. రామమందిర ట్రస్ట్ గొప్ప నిర్ణయం

దీపావళి వేడుకలకు అయోధ్య నగరం ముస్తాబవుతోంది. అయోధ్యలో దివ్య రామ మందిర నిర్మాణం జరిగి.. ప్రాణ ప్రతిష్ఠ పూర్తి చేసుకున్న తర్వాత తొలి దీపావళి పండగ కావడంతో.. అయోధ్యలోని శ్రీరామ జన్మభూమి తీర్థ క్షేత్ర ట్రస్ట్.. అంగరంగ వైభవంగా ఏర్పాట్లు చేస్తోంది. దేశం నలుమూలల నుంచి రామ భక్తులు భారీగా తరలివస్తారని అంచనా వేస్తున్న ట్రస్ట్.. అందుకు అవసరమైన చర్యలను చేపట్టింది. మరోవైపు.. దీపావళికి ముందు రోజు.. అయోధ్యలోని సరయూ నది ఒడ్డున 28 లక్షల దీపాలను వెలిగించి.. గతేడాది వెలిగించిన 25 లక్షల గిన్నిస్ రికార్డును బద్దలు కొట్టేందుకు యోగి ఆదిత్యనాథ్ సర్కార్ ఏర్పాట్లు కూడా చేస్తోంది. ఈ నేపథ్యంలోనే ట్రస్ట్ అధికారులు కీలక నిర్ణయం తీసుకున్నారు. బాలరాముడి మందిరం అలంకరణలో చైనా వస్తువులను వాడకూడదని నిర్ణయించింది. స్థానికంగా తయారు చేసిన హస్తకళలకు ప్రాధాన్యత ఇచ్చేందుకే ఈ నిర్ణయం తీసుకున్నట్లు ట్రస్ట్ వర్గాలు పేర్కొన్నాయి.

ఇక గత 8 ఏళ్లుగా అయోధ్యలో దీపావళి వేడుకలను అత్యంత అంగరంగ వైభవంగా నిర్వహిస్తున్నారు. సరయూ నది ఒడ్డున లక్షలాది దీపాలను వెలిగిస్తున్నారు. ఈ ఏడాది జనవరి 22వ తేదీన బాలరాముడి ప్రతిష్ఠాపన జరిగిన తర్వాత జరుగుతున్న తొలి దీపావళి వేడుకలు కావడంతో శ్రీరామ జన్మభూమి తీర్థక్షేత్ర ట్రస్ట్‌ మరింత ప్రతిష్ఠాత్మకంగా తీసుకుని ఏర్పాట్లు చేస్తోంది. రామమందిరంతోపాటు పరిసర ప్రాంతాలను దీపాలతో అలంకరించేలా ప్రణాళికలు సిద్ధం చేసింది.

ఇక 500 ఏళ్ల తర్వాత అయోధ్యలో జరగబోతున్న దీపావళి వేడుకలు చరిత్రాత్మకమని ప్రధానమంత్రి నరేంద్ర మోదీ పేర్కొన్నారు. ఇవి రామ్‌లల్లా తన సొంతింటికి వచ్చిన తర్వాత జరుగుతున్న తొలి దీపావళి వేడుకలు అని.. వీటి కోసం ఎన్నో తరాలు వేచి చూసినట్లు తెలిపారు. అయోధ్య రాముడి సన్నిధిలో దీపావళి వేడుకులు కళ్లారా చూడాలని ప్రజలు తరతరాలుగా వేచి చూశారని.. కానీ వాళ్ల ఆశలు నెరవేరలేదని వెల్లడించారు. కానీ ప్రస్తుత తరం ఎంతో అదృష్టం చేసుకుందని.. రామ్‌లల్లా తన జన్మస్థలానికి చేరుకున్న వేళ.. మనమంతా ఘనంగా దీపావళి వేడుకలను నిర్వహించుకోవాలని ప్రధాని మోదీ పిలుపునిచ్చారు.