సీఎం గొప్ప మనసు.. మహిళ రిక్వెస్ట్, వెంటనే ఓకే చెప్పిన చంద్రబాబు

ఆంధ్రప్రదేశ్‌లో దీపం 2.0 పథకాన్ని ముఖ్యమంత్రి నారా చంద్రబాబు నాయుడు స్వయంగా ప్రారంభించారు. ఈ క్రమంలోనే శ్రీకాకుళం జిల్లా ఇచ్ఛాపురం మండలం ఈదుపురంలో పర్యటించారు. ఈ సందర్భంగా శాంతమ్మ అనే మహిళ ఇంటికి వెళ్లిన సీఎం చంద్రబాబు.. ఆమెకు ఉచిత గ్యాస్ సిలిండర్‌ను అందించారు. ఆ తర్వాత జానకమ్మ అనే మహిళ ఇంటికి వెళ్లిన ముఖ్యమంత్రి.. ఆమెకు స్వయంగా ఒంటరి మహిళ పింఛన్ అందించారు. ఈ సందర్భంగా సీఎం తన ఇంటికి రావడం పట్ల జానకమ్మ సంతోషం వ్యక్తం చేశారు.

ఈ సందర్భంగా తన ఇంటికి వచ్చిన ముఖ్యమంత్రి చంద్రబాబు ముందు జానకమ్మ.. తన మనసులో ఉన్న కోరికను బయటపెట్టింది. తాను ఎప్పటినుంచో సొంతిల్లు కట్టుకోవాలని ప్రయత్నిస్తున్నానని.. అయితే తన కోరిక.. కోరికగానే మిగిలిపోయిందని వాపోయింది. తనకు ఒక ఇంటిని కట్టించి ఇవ్వాలని సీఎంకు విజ్ఞప్తి చేసింది. అందుకు స్పందించిన సీఎం చంద్రబాబు.. ఆమెకు ఇల్లు కట్టిస్తానని హామీ ఇచ్చారు. రేపటి నుంచే మీ ఇంటి పని ప్రారంభిస్తామని చంద్రబాబు జానకమ్మకు సూచించారు. ఈ సందర్భంగా రేపటి నుంచే జానకమ్మ ఇంటి నిర్మాణ పనులు ప్రారంభించాలని జిల్లా కలెక్టర్‌ను సీఎం చంద్రబాబు ఆదేశించారు. ఈ సందర్భంగా జానకమ్మ కుటుంబ బాగోగులను ముఖ్యమంత్రి చంద్రబాబు అడిగి తెలుసుకున్నారు.

అయితే తాను డ్వాక్రా సంఘంలో లీడర్‌గా ఉన్నానని జానకమ్మ సీఎం చంద్రబాబుకు వివరించింది. వెంటనే స్పందించిన చంద్రబాబు.. డ్వాక్రా సంఘం లీడర్ అయి ఉండి డబ్బులు సంపాదించుకోవాలి కదా అమ్మ అని సలహా ఇచ్చారు. ఈ సందర్భంగా థైరాయిడ్, డయాబెటిక్‌కు జనరిక్ మెడిసిన్స్ ఉంటే చూడాలని జిల్లా కలెక్టర్‌కు చంద్రబాబు సూచించారు. గతంలో ఒంటరి మహిళ పెన్షన్ రూ. 500 ఉండగా.. ఇప్పుడు రూ.4వేలు అందుకుంటున్నానని చంద్రబాబుతో జానకమ్మ చెప్పారు. మీరు మాకు దేవుడు అంటూ సీఎంను పొగడ్తలతో ముంచెత్తారు. గత 20 ఏళ్లుగా తాను పేదరికంలోనే మగ్గుతున్నానని సీఎంతో జానకమ్మ చెప్పగా.. ఆమెను చంద్రబాబు ఓదార్చారు.