కార్తీక మాసం సందర్భంగా ఆర్టీసీ బంపరాఫర్.. కేవలం రూ.650లకే

రెండు తెలుగు రాష్ట్రాల్లో కార్తీక మాస శోభ నెలకొంది. దేవాలయాలు శివనామస్మరణతో మార్మోగుతున్నాయి. ప్రముఖ శైవక్షేత్రాలను సందర్శించేందుకు భక్తులు ఆసక్తి చూపిస్తున్నారు. కార్తీక మాసంలో పుణ్యస్నానాలు ఆచరించి ఆ శివయ్యను దర్శించుకుంటే అంతా మంచి జరుగుతుందనేది భక్తుల విశ్వాసం. అందుకే ఆలయాలు భక్తులతో కిటకిటలాడుతున్నాయి. అయితే కార్తీక సోమవారాలకు ఈ మాసంలో ఎక్కువ ప్రాధాన్యం ఉంటుంది. ఆ రోజుల్లో ప్రముఖ శైవక్షేత్రాలను దర్శించుకునేందుకు, దీపారాధన చేసేందుకు భక్తులు పోటీపడుతుంటారు. ఈ నేపథ్యంలో కార్తీక మాసం సందర్భంగా ప్రయాణికులు ఏపీఎస్ఆర్టీసీ బంపర్ ఆఫర్ ఇచ్చింది. అయితే ఇది మొత్తం కాదండోయ్. కర్నూలు ఆర్టీసీ డిపో అధికారులు భక్తుల కోసం కీలక నిర్ణయం తీసుకున్నారు.

కార్తీక మాసం సందర్భంగా పంచ శైవ క్షేత్ర దర్శనీ పేరుతో కర్నూలు ఆర్టీసీ డిపో అధికారులు ప్రత్యేక టూర్ ప్యాకేజీని ప్రారంభించారు. ఈ టూర్‌లో భాగంగా ఉమ్మడి కర్నూలు జిల్లాలోని ప్రసిద్ధ శైవక్షేత్రాలను సందర్శించవచ్చు. పంచ శైవక్షేత్ర దర్శని యాత్రలో భాగంగా యాగంటి, మహానంది, ఓంకారం, భోగేశ్వరం, కాల్వబుగ్గ పుణ్యక్షేత్రాలకు కర్నూలు ఆర్టీసీ డిపో అధికారులు ప్రత్యేక బస్సులు నడుపుతున్నారు. కార్తీక మాసంలో ప్రతి సోమవారం ఈ ప్రత్యేక టూర్ అందుబాటులో ఉంటుంది. నవంబర్ 4, 11, 18, 25వ తేదీల్లో ఈ టూర్ అందుబాటులో ఉంటుంది. ఉదయం ఆరు గంటలకు కర్నూలులో ప్రారంభమై.. రాత్రికల్లా తిరిగి కర్నూలు చేరుకుంటారు. ఆల్ట్రా డీలక్స్ బస్సులను ఇందుకోసం ఏర్పాటు చేయగా.. పిల్లలకు రూ.400, పెద్దలకు రూ.650లను టికెట్ ధరలుగా నిర్ణయించారు.

మరోవైపు కార్తీక మాసంలో ప్రముఖ శైవక్షేత్రం శ్రీశైలానికి భక్తులు పోటెత్తుతుంటారు. తెలుగు రాష్ట్రాలతో పాటుగా కర్నాటక నుంచి కూడా భక్తులు వస్తుంటారు. ఈ నేపథ్యంలో కర్నూలు నుంచి శ్రీశైలానికి ప్రత్యేక సర్వీసులు నడపనున్నట్లు కర్నూలు ఆర్టీసీ డిపో అధికారులు తెలిపారు. ఇక శ్రీశైలంలో భక్తుల రద్దీ పెరుగుతోంది. తెల్లవారుజామనుంచే భక్తులు మల్లన్న దర్శనానికి బారులు తీరుతున్నారు. ఈ నేపథ్యంలో తాత్కాలికంగా స్పర్శ దర్శనాలు అధికారులు రద్దుచేశారు. అలాగే ఈ నెల మొత్తం శ్రీశైలంలో వీఐపీ బ్రేక్ దర్శనాలుు, గర్భాలయంలో అభిషేకాలను కూడా రద్దు చేశారు. అమ్మవారికి కుంకుమార్చన సేవను సైతం అధికారులు రద్దు చేశారు.